Timhaka ta mabhuku ma tako ka Cibhukwana ca Mutlhangano
1-7 KA ABRIL
TITSHOMBA TI NGA KA MHAKA YA NUNGUNGULU | 1 VA LE KORINTE 7-9
“A ku nga chadhi cinyikiwo”
(1 Va Le Korinte 7:32) Kunene, ndzi lava lezvaku mu tlhatlheka ka kukarateka. A wanuna loyi a nga kala ku chadha i karatekela a zvilo zva Hosi, lezvaku i ta yi tsakisisa kuyini Hosi.
w11 15/1 17-18 ¶3
Londzowota khwatsi a ciyimo ca wena co kala u nga chadhangi
A ku tala ka zvikhati a munhu a nga chadhangiko i na ni cikhati co tala ni ku tlhatlheka a ku hundza loyi a chadhileko. (1 Kor. 7:32-35) A ku nga chadhi zvi ni mabhindzu yo tala ma nga fananisiwiko ni man’wani, zvi vhuna lava va nga chadhangiko a ku andzisa ntiro wabye, ku tirisa khwatsi a cikhati cabye ni ntamu wabye kasi ku vhuna van’wani ni ku tshinela nguvhu ka Jehovha. Hikwalaho, a maKristu yo tala ma yi wona a lisima la ku nga chadhi niku ma boha ku “maha lezvo” hi cikhati co kari. A van’wani kuzvilava kusanguleni va wa nga lavi ku tshama va nga chadhi, kanilezvi loku a zviyimo zvabye zvi cicile, va khongele nguvhu hi zvona va gumesa va zvi wona ku Jehovha i ta va vhuna ku chavelela a timbilu tabye. Hikwalaho, va ti zwananisa ni zviyimo zvabye va tlhela va boha ku nga chadhi. — 1 Kor. 7:37, 38.
(1 Va Le Korinte 7:33, 34) Kanilezvi a wanuna loyi a chadhileko i karatekela a zvilo zva tiko, lezvaku i ta mu tsakisisa kuyini a sati wakwe, 34 niku i avanyekile. A wasati a nga kala ku chadha, a ku patsa ni nhwana, i karatekela a zvilo zva Hosi lezvaku a fela ku basa mirini ni moyeni wakwe. Kanilezvi a wasati loyi a chadhileko i karatekela a zvilo zva tiko, lezvaku i ta mu tsakisisa kuyini a nuna wakwe.
w08 15/7 27 ¶1
Timhaka-tshinya ta papilo ga Va Le Korinte
7:33, 34 — Zvini “a zvilo zva tiko” lezvi lava va chadhileko va zvi karatekelako? Pawule i wa wulawula hi zvilo zva tiko lezvi a maKristu ma chadhileko ma vekako kupima ka zvona. Lezvi zvi patsako zvakuga, tinguwo, ni ka ku etlela kona, kanilezvi na ku nga wuliwa a zvi zva tiko legi, lezvi a maKristu ma zvi potsako. — 1 Johani 2:15-17.
(1 Va Le Korinte 7:37, 38) Kanilezvi loku a wokari a hlambanyile mbilwini yakwe, na zvi nga mu karati a ku tshama a nga chadhi, na a zvi kota ku fumela kunavela kakwe, ni loku a tiyisile mbilwini yakwe a ku tshama a nga chadhi, i maha khwatsi. 38 Loyi a chadhako i maha khwatsi, kanilezvi loyi a nga chadhiko i maha khwatsi nguvhu.
w96 15/10 12-13 ¶14
A ku nga chadhi zvi maha ku u tira na u nga karateki hi nchumu
A muKristu a nga chadhangiko loyi a tirisako a cikhati cakwe kasi ku tatisa mixuvo ya nyama a nga mahi “khwatsi nguvhu” ku hundza maKristu ma chadhileko. A nga tshami a nga chadhi “hi kota ya Mufumo”, kanilezvi hi kota ya zvigelo zva yena wutsumbu. (Matewu 19:12) A wanuna kutani wasati a nga chadhangiko i fanele ku “karatekela a zvilo zva Hosi,” a tlhela a karateka hi ku “i ta yi tsakisisa kuyini Hosi,” ni ku ‘tirela Hosi contlhe cikhati na a nga colopetelwi hi nchumu.’ Lezvi zvi wulako ku pinyamela ku maha kurandza ka Jehovha na Jesu Kristu na a nga colopetelwi hi nchumu. Ntsena loku a maha lezvo, hi kona a muKristu a nga chadhangiko a mahako “khwatsi nguvhu” a ku hundza a maKristu ma chadhileko.
Kela titshomba ta moya
(1 Va Le Korinte 7:11) Kanilezvi loku a sati a hambana ni nuna wakwe, i wa tshame a nga chadhi kutani ku tlhela a zwanana ni nuna wakwe; ni nuna a nga tsiki a sati wakwe.
lvs 251
Tlhamuselo
Ka zvikhati zvin’wani, a nuna ni sati va nga maKristu va boha ku hambana hambu loku a mun’we wabye a nga mahangi wubhayi. (1 Va Le Korinte 7:11) Ka zviyimo zvi landzelako, a muKristu a nga boha ku hambana ni nuna kutani sati wakwe.
• Loku a wanuna a ala ku wundla ngango ha womu: I ala ku hlayisa a ngango wakwe hi tlhelo ga nyama, laha ka kuza a ngango wakwe wu vhumala ni mali kutani zvakuga. — 1 Timote 5:8.
• Loku a xanisa a nuna kutani sati: Hi kuba sati wakwe kutani nuna wakwe laha ka ku a wutomi gakwe giva mhangweni. — Va Le Galatiya 5:19-21.
• Loku a zama ku tsema wuxaka gakwe na Jehovha: Hi ku maha a nuna kutani sati a nga tireli Jehovha. — Mitiro 5:29.
(1 Va Le Korinte 7:36) Kanilezvi loku a wokari a alakanya lezvaku a nga ha zvi koti ku ti khoma hi ku tshama a nga chadhi, ni loku a hundzile ka tanga ya wun’wanana, i wa mahe lezvi a zvi lavako; i wa chadhe, a hi ciwonho.
w00 15/7 31 ¶2
U nga simama ni mahanyela ma nene ka tiko legi ga wubhayi
A vaswa a va faneli ku hatlisela ku chadha zvalezvi a manyawunyawu ya masango ma sangulako. A wukati gi lava kubohana niku zvi lava kuva munhu wo buvha kasi u zvi kota ku khatalela a wutihlamuleli lego. (Genesisi 2:24) Zvi nene a ku rindzela kala ku ‘hundza tanga ya wun’wanana’, ku nga tanga leyi a manyawunyawu ya masango ma nga ya hombe laha ka kuza a munhu a tsandzeka ku ma fumela. (1 Va Le Korinte 7:36) Zvi wa tava wupumbu ni ciwonho a ku a munhu a kulileko a xuva ku chadha ni munhu wa mahanyela yo biha, hi kota ya lezvi zvi wonekisako ku khwatsi a nga mu kumi loyi a nga xuva ku chadha naye!
8-14 KA ABRIL
TITSHOMBA TI NGA KA MHAKA YA NUNGUNGULU | 1 VA LE KORINTE 10-13
“Jehovha i tsumbekile”
(1 Va Le Korinte 10:13) A mu se welwa hi ndzhingo wo hambana ni lowu wu welako vanhu. Nungungulu i tsumbekile, a nga ta mu tsika mu ringiwa a ku hundza a ntamu wa n’wina; kanilezvi loku mu welwa hi ndzhingo, i ta mu vhululela ndlela ya kupona, kasi mu zvi kota ku wu timisela.
Kela titshomba ta moya
(1 Va Le Korinte 10:8) Ne hi nga maheni wubhayi a ku khwatsi hi vokari vabye va nga maha wubhayi, ku gumesa kufa a 23 000 wa vona hi siku gin’we.
w04 1/4 29
Zviwutiso zva vagondzi
Hikuyini 1 Va Le Korinte 10:8 a wulako lezvaku i 23 000 wa vaIzrayeli va ngafa hi siku gin’we hi ku maha wubhayi kuveni Mitsengo 25:9 i wula lezvaku i 24 000 wa vona?
Ku na ni zvigelo zvo tala zvi mahako lezvaku kuva ni kuhambana ka mavhesi lawa ya mambiri. A co olova, hi ku zvi ngava zvi mahilwe hi lezvi a hlayo ya lisine yi nga hi kwalomu cikari ka 23 000 ni 24 000, lezvi zvi nga maha ku zvi koteka ku yi engetelwa kutani ku hunguliwa.
Cin’wani conawu ca ku kuzvilava ci ngava cona ci nga vanga kuhambana loku, hiku mupostoli Pawule i wo tshaha lezvi zvi nga humelela vaIzrayeli le Xittime kota citlharihiso ka maKristu ya le Korinte, gi nga hi dhoropa gi nga tiviwa hi wubhayi. I tsalile lezvi: “Ne hi nga maheni wubhayi a ku khwatsi hi vokari vabye va nga maha wubhayi, ku gumesa kufa a 23 000 wa vona hi siku gin’we.” Na a wula basi hi lava va delweko hi Jehovha hi kota ya wubhayi, Pawule i te i 23 000 wa vona. — 1 Va Le Korinte 10:8.
Hambulezvo, Mitsengo cipimo 25 i hi byela lezvaku ‘Izrayeli i no ti tlhanganyisa na BhaaliPeyori, zvonake a zanga ya Jehovha yi no vhura yi vhukela Izrayeli’. Jehovha a gumesa a laya Mosi lezvaku a daya ‘vontlhe a varangeli va vanhu va ka Izrayeli’. Mosi yenawu a laya lezvaku ku dayiwa vontlhe lava va nga sangulile ku khozela BhaaliPeyori. Hi magumo, laha Finiyasi a nga tekela ku suka a daya muIzrayeli loyi a nga wuya ni wasati wa muMidhiyani lomu matendeni ya vaIzrayeli, a “ntungu wu lo khawula”. A matimu lawa ma gumesa hi magezu lawa: “A vanhu lava va ngafa hi ntungu lowo va wa hi 24 000.” — Mitsengo 25:1-9.
Zvi laha kubaseni lezvaku a hlayo yi kumekako ka Mitsengo yi patsa a ‘varangeli va vanhu va ka Izrayeli’ lava va delweko hi valamuli ni lava va delweko hi Jehovha hi ku kongoma. Kuzvilava ku file a 1000 wa varangeli lava va delweko hi valamuli ku nga vona va mahako lezvaku va kala va chikela a ntsengo wa 24 000. Kani a varangeli lavo va no maha wubhayi, kutani va no hlengela ka mibuzo hambu hi ku ti patsa ni lava va nga maha mibuzo leyo, a lisine hi ku va wa hi ni nandzu hi kota ya lezvi va ti “tlhanganyisileko na Bhaali-Peyori”.
Xungetano hi gezu ‘kutlhanganyisa’ a bhuku go kari gi wula lezvaku a gezu legi gi nga wula ‘ku bohana ka vanhu vambiri’. A vaIzrayeli va wa hi vanhu va nga ti nyikele ka Jehovha, kanilezvi a cikhati leci va nga ti ‘tlhanganyisa na Bhaali-Peyori’, va no tsema wuxaka gabye na Nungungulu. Kwalomu ka 700 wa malembe andzhako ka lezvo, hi ku tirisa muphrofeti Hoseya, Jehovha i no byela a vaIzrayeli aku: ‘Kanilezvi vona va nota le Bhaali-Peyori, va ti nyikela ka nungungulu wa tingana, vave manyalataniso ku fanana ni loyi va nga mu randza.’ (Hoseya 9:10) Vontlhe lava va mahileko lezvo va ringanelwe hi kulamulwa hi Nungungulu. Laha Mosi a nga kala a va alakanyisa aku: ‘A mahlo ya n’wina ma wonile lezvi Jehovha a mahileko hi kota ya BhaaliPeyori; hakuva vontlhe lava va nga landzela Bhaali-Peyori, Jehovha Nungungulu wa wena i lo va lovisa cikari ka n’wina.’ — Dhewuteronome 4:3.
(1 Va Le Korinte 11:5, 6) kanilezvi a wasati loyi a khongelako kutani ku phrofeta na a nga fenengetangi hloko yakwe i wisa tingana a hloko yakwe, hakuva zvi fana ni loku a no halula misisi. 6 Loku a wasati a nga fenengeti hloko yakwe, i wa tseme misisi; kanilezvi loku zvi mu wisa tingana ku tsema misisi kutani ku halula, i wa fenengete hloko yakwe.
(1 Va Le Korinte 11:10) Hikwalaho a wasati i fanele kuva ni cikombiso ca lezvaku wa ti koramisa, hi kota ya tingilozi.
22-28 KA ABRIL
TITSHOMBA TI NGA KA MHAKA YA NUNGUNGULU | 1 VA LE KORINTE 14-16
“Nungungulu i tava ‘zvontlhe ka vontlhe’”
(1 Va Le Korinte 15:24, 25) Hi kulandzela, ku ta chikela kugumesa, laha a to tlhelisa a Mufumo ka Nungungulu wakwe tlhelo Papayi, na a fuvisile a mifumo yontlhe, ni wuhosi gontlhe ni ntamu. 25 Hakuva i fanele ku fuma kala Nungungulu a veka valala vontlhe lahasi ka mikondzo yakwe.
w98 1/7 21 ¶10
‘A kufa ku ta lovisiwa’
“A ku gumesa”, ku gumesa ka Kufuma ka Kristu hi 1000 wa malembe, a cikhati leci Jesu hi ku ti koramisa ni ku tsumbeka a to tlhelisela a Mufumo ka Nungungulu tlhelo Papayi wakwe. (Kuvhululelwa 20:4) A kungo ga Nungungulu ga ku “tlhanganisa zvilo zvontlhe ka Kristu” makunu gi ta nghana gi tatisekile. (Va Le Efesusi 1:9, 10) Hambu lezvo, a kusangula Kristu i ta fuvisa “a mifumo yontlhe, ni wuhosi gontlhe ni ntamu” lezvi zvi vhukelako a wuhosi ga Nungungulu. Lezvo zvi patsa zvotala, zva ku hundza ni ku lovisa loku ka Armagedhoni. (Kuvhululelwa 16:16; 19:11-21) Pawule i te: “[Kristu] i fanele ku fuma kala Nungungulu a veka valala vontlhe lahasi ka mikondzo yakwe. A nala wo gumesa a to lovisiwa kufa.” (1 Va Le Korinte 15:25, 26) Kunene, kala loku zvontlhe lezvi zvi vangiwako hi ciwonho ca Adhamu, zvin’we ni kufa zvi fuvisilwe. A gumesa Nungungulu a humesa vontlhe “lava va nga zvilahleni” va tlhela va hanya. — Johani 5:28.
(1 Va Le Korinte 15:26) A nala wo gumesa a to lovisiwa kufa.
(1 Va Le Korinte 15:27, 28) Hakuva Nungungulu “i vekile zvilo zvontlhe lahasi ka mikondzo yakwe”. Kanilezvi loku aku: ‘A zvilo zvontlhe zvi vekilwe lahasi ka yena’, zva dlunyateka lezvaku Loyi a vekileko zvilo zvontlhe lahasi kakwe a nga hlayiwi nazvo. 28 Kanilezvi a cikhati leci a zvilo zvontlhe zvi tova lahasi kakwe, a N’wana yenawu i ta ti veka lahasi ka Loyi a vekileko a zvilo zvontlhe lahasi kakwe, kasi Nungungulu ava zvontlhe ka vontlhe.
Kela titshomba ta moya
(1 Va Le Korinte 14:34, 35) a vavasati va wa miyele lomu mabandleni, hakuva a va faneli ku wulawula. Kanilezvi va wa ti koramise kota lezvi a Nayo wonawu wu wulako. 35 Loku va lava ku tiva cokari, va wa wutise a vanuna vabye le kaya, hakuva zva wisa tingana ku a wasati a wulawula lomu bandleni.
(1 Va Le Korinte 15:53) Hakuva a miri lowu wu hinako wu fanele ku hundzuluswa wu nga ha hini, ni miri lowu wu fako wu fanele ku hundzuluswa wu nga hafi.
it-11197-1198
Ku nga hini
A ku fana ni lezvi Jesu a nga vhuxisiwa zvona hi ka vafileko, a zvigatshomba-kuloni zvin’we naye zvonawu zva vhuxiwa hi ka vafileko, na ku nga hi ku zvi hanya basi kala kupindzuka kota zvivangwa zva moya, kanilezvi zvi tlhela zvi kuma ku nga hafi ni ku nga hini. Kota lezvi va hanyako niku mu tirela hi kutsumbeka Nungungulu, va gumesa vafa ni mimiri ya nyama leyi yi hinako, va vhuxiwa va nyikwa mimiri ya moya leyi yi nga hiniko, kota lezvi Pawule a wulako laha ka 1 Va Le Korinte 15:42-54. Hi kota ya lezvo, a ku ngafi, zvi wula a wutomi legi vona va ti buzako ha gona, legi gi nga mbheliko kutani ku lova, kuveni a ku nga hini zvi wula a miri lowu Nungungulu a va nyikako, ku nga miri lowu wu nga hlakaliko, ku hina kutani ku lovisiwa. Hikwalaho, Nungungulu i va nyika a ntamu wa ku hanya na va nga khegeli ka zvin’wani zvilo laha zvi yileko, a ku khwatsi hi zvivangwa lezvi zvin’wani zva nyama ni zva moya. Ku nga cikombiso ca ku va tsumba loku Nungungulu a nga nako hi vona. Hambulezvo, a matshamela lawo yo hlawuleka a ma mahi ku va hi vanhu va nga ringanelwiko hi ku rangelwa hi Nungungulu; niku vonawu a ku khwatsi hi Hloko yabye, Jesu Kristu, va simama ku ti koramisa ka wurangeli ni kurandza ka Papayi wabye. — 1Ko 15:23-28; wona laha kaku ku ngafi; muhefemulo.
29 KA ABRIL–5 KA MAIO
TITSHOMBA TI NGA KA MHAKA YA NUNGUNGULU | 2 VA LE KORINTE 1-3
“Jehovha i ‘Nungungulu wa kuchavelela kontlhe’”
(2 Va Le Korinte 1:3) I wa dhumiswe Nungungulu tlhelo Papayi wa Hosi ya hina Jesu Kristu, a Papayi wa wuxinji ni Nungungulu wa kuchavelela kontlhe,
(2 Va Le Korinte 1:4) loyi a hi chavelelako kuxanisekeni ka hina kontlhe, kasi hi zvi kota ku chavelela van’wani kuxanisekeni kontlhe hi kuchavelelwa loku hi ku kumako ka Nungungulu.
Kela titshomba ta moya
(2 Va Le Korinte 1:22) I hi vekele cifungo cakwe a tlhela a hi nyika a moya wakwe timbilwini ta hina, wu nga citiyisekiso ca lezvi zva ha tako.
(2 Va Le Korinte 2:14-16) Kanilezvi i wa bongiwe Nungungulu loyi contlhe cikhati a hi rangelako kuhluleni na hi hi zvin’we na Kristu, loyi kambe a tirisako hina kasi ku hangalasa a masema ya lezvaku va fela ku mu tiva matshan’wini wontlhe! 15 Hakuva ka Nungungulu, hina hi masema yo nuhela ya Kristu cikari ka lava va ponisiwako ni cikari ka lava va lovako. 16 Ka lava va lovako, hi masema ya kufa ma yisako kufeni; ka lava va ponisiwako, hi masema ya wutomi ma yisako wutomini. Himani a ringanelwako hi zvilo lezvi?
w10 1/8 23
U wa zvi tiva?
Zvini lezvi Pawule a nga lava ku wula a cikhati a nga wulawula hi loyi a “hi rangelako kuhluleni”?
Pawule i tsalile lezvi: “Nungungulu . . . loyi a hi rangelako kuhluleni na hi hi zvin’we na Kristu, loyi kambe a tirisako hina kasi ku hangalasa a masema ya lezvaku va fela ku mu tiva matshan’wini wontlhe! Hakuva ka Nungungulu, hina hi masema yo nuhela ya Kristu cikari ka lava va ponisiwako ni cikari ka lava va lovako. Ka lava va lovako, hi masema ya kufa ma yisako kufeni; ka lava va ponisiwako, hi masema ya wutomi ma yisako wutomini.” — 2 Va Le Korinte 2:14-16.
Mupostoli Pawule i wa wulawula hi mubuzo lowu a vaRoma va nga maha kasi ku dzundza a komandante ya masochwa loku yi hlulile a valala va Mufumo wakwe. Ka mibuzo leyo, lezvi zvi tekilweko yimpini a ku patsa ni vanhu va kona lava va nga khomilwe seyo, va wa kombisiwa laha kubaseni niku a tihomu ti wa tekiwa va ya maha hi tona miphahlo kuveni lezvo a komandante ni masochwa yakwe va wo nyikiwa wudzundzo laha ka talo wa vanhu. Loku a mubuzo wu mbhela, va wa nyikela miphahlo ya tihomu, niku kuzvilava ku wa dawa a zvibochwa zvo tala.
A International Standard Bible Encyclopedia gi wula lezvaku a magezu lawa yo fananisa ya ku “masema yo nuhela ya Kristu” ma wulako wutomi ka vokari ni kufa ka van’wani “kuzvilava ma sukela laha ka mubuzo lowu wu nga mahiwa hi vaRoma wa ku hisa miphahlo loku va maha mubuzo.” “A masema ma wa komba litsako ka lava va hlulileko, ma alakanyisa lava va khomilweko yimpini lezvaku kuzvilava va wa ta dawa.”