Va zvi wonile ku a bandla ga va randza

YOMARA ni vamakabye vakwe — Marcelo na Hiver — va hanya ka cidhoropana co kari le Guatemala. Yomara i no sangula ku gondza Bhibhiliya ni Vakustumunyu va Jehovha. A vamakabye va yena vonawu va no sangula ku gondza. Kanilezvi, ku wa hi ni cikarato co kari. Vontlhe va vanharu va file matihlo, niku va wa nga zvi koti a ku lera cibraile. Hambulezvo, a mugondzisi wabye i wa va lerela mahungu lawa va nga gondza ni mavhesi ya Bhibhiliya ya cigondzo leco.

A kuya mitlhanganweni ya bandla zvonawu zvi wa va karatela. Vona voce zvi wa nga koteki a ku vaya ka Salawu yi nga hi laha kusuhani — yi nga hi ka pfhuka wa 40 minuto. Kanilezvi, a vamakabye laha bandleni va no maha malulamiselo ya ku va vhuna ku va wona mitlhangano yontlhe. A cikhati leci vontlhe va vanharu va nga sangula ku maha zvipandze mutlhanganweni wa cikari ka vhiki, a vamakabye va wa va vhuna ku va zvi khoma hi hloko lezvi va nga wa ta wulawula.

Hi Maio wa 2019, a mitlhangano yi no sangula ku mahiwa lomu ka cidhoropana cabye. Ka cikhati leco, ku wa hi ni kazali ya maphayona ya cikhati contlhe ma nga rurile ma ya tshama ka cidhoropana leco. A maphayona lawo, ma no ti vekela mixuvo ya ku va gondzisa ku lera ni ku tsala cibraile, hambu lezvi wonawu ma nga kala ma nga zvi tivi. Va noya bhibliyoteka yo kari va ya gondza cibraile ni ndlela ya ku gondzisa van’wani.

Ndzeni ka tihweti titsongwani, Yomara ni vamakabye vakwe va no zvi kota ku lera cibraile — ne zvi wa nga va karateli kambe. Lezvo zvi no va vhuna ku va simama ku kula hi tlhelo ga moya.a Zvezvi, Yomara ni vamakabye vakwe maphayona ya cikhati contlhe. Marcelo i nandza go vhunetela kambe. Kusukela Muvhulo kala Sonto, va tshama va khomekile ntirweni wa Jehovha. A kuhiseka kabye ku kuca van’wani.

Yomara ni vamakabye vakwe va gi bonga nguvhu a bandla hi lezvi gi kombisako lirandzo gi va vhuna. Yomara i wula lezvi: “Kusukela ka khati go sangula hi nga bhula ni Vakustumunyu, va kari va kombisa lirandzo la wuKristu ka hina.” Marcelo i engetela aku: “Laha bandleni ga hina, hi na ni vanghana va va nene nguvhu, niku misaveni yontlhe hi na ni vamakabye va nga ni lirandzo la hombe nguvhu.” Yomara ni vamakabye vakwe va ci rindzela hi mahlo yo pswhuka a cikhati leci va to wona misava na yi cicile yiva paradhise. — Lis. 37:10, 11; Isa. 35:5.