Ala moya wa makangwa, lowu wu kombisiwako hi vanhu vo tala nyamutlha

XANA wa zvi wona lezvaku a vanhu vo tala nyamutlha va alakanya ku va fanele ku nyikiwa malungelo yo hlawuleka, tifanelo to hlawuleka ni ku khomiwa hi ndlela yo hlawuleka? Niku hambu loku va khomiwa hi ndlela yo hlawuleka, a zvi va eneleli. A maalakanyo lawo ma seketelwa ka moya wa ku ti alakanyela ku hundza mpimo ni ku kala kubonga, ku nga matshamela lawa ma wonekako nguvhu masikwini lawa yo gumesa. — 2 Tim. 3:2.

Kunene, a makangwa a hi ya nyamutlha. Adhamu na Evha va bohile ku hlawula hi voce lezvi zvi nga zvinene ni lezvi zvi bihileko niku lezvo zvi mahile ku va tshovela kubava. Andzhako ka mazanazana ya malembe, hosi Uziya wa Judha i alakanyile lezvaku i wa ringanelwa hi ku nyikela libani tempeleni, kanilezvi i wo ti kalavela. (2 Kro. 26:18, 19) Hi kufanana, a Vafarisi ni Vasadhusi va wa kholwa lezvaku va fanele ku khomiwa hi ndlela yo hlawuleka hi Nungungulu ntsena hi lezvi va nga hi va pswalo wa Abrahama. — Mat. 3:9.

A tiko gi tele hi vanhu va makangwa ni va ku ti wonela hehla, niku a matshamela yabye ma nga hi thapela. (Gal. 5:26) Hi nga sangula ku alakanya ku ha ringanelwa hi ku kuma malungelo yo kari kutani ku khomiwa hi ndlela yo hlawuleka. Hi nga ma potsisa kuyini a maalakanyo lawo? A co ranga, ku hi tiva mawonela ya Jehovha hi mhaka leyi. Ku na ni matshinya mambiri ya Bhibhiliya ma nga hi vhunako.

Jehovha hi yena a bohako ku zvini zvi hi ringanako. Wona zvikombiso zvo kari.

Laha ngangweni, a nuna i lava kuzwa lezvaku a sati wakwe wa mu kombisa cichavo niku a sati i lava kuzwa lezvaku a nuna wakwe wa mu randza. (Efe. 5:33) A lirandzo la nuna ni sati li fanele ku kombisiwa ka vona vambiri basi, na ku nga hi ka munhu mun’wani. (1 Kor. 7:3) A vapswali va na ni fanelo ya ku lava ku a vana vabye va va ingisa, niku a vana va fanele ku randziwa nguvhu ni ku seketelwa hi vapswali vabye. — 2 Kor. 12:14; Efe. 6:2.
Lomu bandleni, a madhota lawa ma tirako hi kutitsitsirita ma ringanelwa hi ku kombisiwa cichavo. (1 Tes. 5:12) Kanilezvi a ma na fanelo ya ku fumela a vamakabye vabye. — 1 Ped. 5:2, 3.
Nungungulu i nyikile mifumo ya vanhu a fanelo ya ku londza mikhupo ni ku nyikiwa wudzundzo hi vanhu lava yi va fumelako. — Rom. 13:1, 6, 7.

Hi lirandzo, Jehovha i hi nyika zvo hundza lezvi zvi hi fanelako. Hi kota ya lezvi hi nga vawonhi, ho ringanelwa hi kufa basi. (Rom. 6:23) Hambulezvo, Jehovha i hi nyika makatekwa yo tala hi kota ya lirandzo lakwe li nga mbheliko. (Lis. 103:10, 11) Ni wahi makatekwa kutani malungelo a hi nyikako, hi ma kuma hi kota ya tipswalo takwe ta ku a ti hi ringani. — Rom. 12:6-8; Efe. 2:8.

HI NGA WU POTSISA KUYINI A MOYA WA KU TI WONA NA HI HI VA LISIMA A KU HUNDZA VAN’WANI?

Ti wonele ka moya wa tiko. Na hi nga zvi poli, hi nga sangula ku alakanya lezvaku hi ringanelwa hi ku kuma zvotala ku hundza van’wani. Jesu i kombile lezvaku zva olova nguvhu a ku hiva ni mawonela lawo hi ku hlawutela mufananiso wa vatiri lava va nga holisiwa dhenario. A vatiri vo kari va sangulile ku tira ni mixo nguvhu niku va tirile siku gontlhe na vaswa hi mumu; kanilezvi a van’wani va no tira hora yin’we basi. A ntlawa lowu wo sangula wu no alakanya lezvaku wu wa fanele ku holisiwa mali yo tala hi kota ya lezvi wu nga tirile siku gontlhe na wuswa hi mumu. (Mat. 20:1-16) Laha a nga tlhamusela mufananiso lowu, Jesu i kombile lezvaku a valandzeli vakwe va fanele ku tsaka hi lezvi Nungungulu a hlawulako ku va nyika.

Vatiri vo kari va wuliwako ka mufananiso wa Jesu va khalako ka n’winyi wa simu. — A vavanuna lava va tirileko siku gontlhe va wa alakanya lezvaku va wa hi ni fanelo ya ku kuma muholo wo tala

Bonga, u nga londzi. (1 Tes. 5:18) Pimanyisa mupostoli Pawule, loyi a nga kala ku kombela vamakabye va le Korinte lezvaku va mu seketela hi tlhelo ga nyama, hambu lezvi a nga hi ni fanelo ya ku maha lezvo. (1 Kor. 9:11-14) Hi fanele ku bonga ni wahi makatekwa lawa hi nyikiwako, wutshan’wini ga ku londza.

Hi mupostoli Pawule ni vavanuna vambiri va mahako matenda. — Mupostoli Pawule a nga londzangi lezvaku a vamakabye va mu seketela hi tlhelo ga nyama

Ti koramise. Loku a munhu a ti byela, a kutala ka zvikhati i alakanya lezvaku i ringanelwa hi zvo hundza lezvi a nga nazvo. A kutikoramisa hi wona muri wa maalakanyo lawo ya hava.

Mifota: 1. Muprhofeti Dhaniyeli na a khosahele. 2. Dhoropa ga kale ga Bhabhuloni. 3. Dhaniyeli na a ha hi muswa ni majaha manharu ya vaHebheru. — A kutikoramisa ka muphrofeti Dhaniyeli ku mahile ku ava wa lisima ka Jehovha

Muphrofeti Dhaniyeli i hi vekele cikombiso ci nene mhakeni leyi ya ku ti koramisa. I wa pswalilwe ka ngango wa nduma, i wa sasekile, i wa tiva nguvhu, niku i wa hi ni wutlhari gin’wani go tala. Hikwalaho, na a alakanyile lezvaku i wa ringanelwa hi ku khomiwa hi ndlela yo hlawuleka kutani ku i wa ringanelwa hi malungelo lawa a nga hi nawo. (Dhan. 1:3, 4, 19, 20) Kanilezvi Dhaniyeli i simamile ku ti koramisa niku a tshamela lego gi mahile ku ava wa lisima ka Jehovha. — Dhan. 2:30; 10:11, 12.

Ngha hi potsa makangwa, a moya wa ku ti wona na hi hi va lisima ku hundza van’wani lowu wu kombisiwako nguvhu hi vanhu vo tala nyamutlha. Ahandle ka lezvo, nga hi simama ku tsaka hi makatekwa wontlhe lawa Jehovha a hi nyikako hi kota ya wuxinji gakwe.