Mufun’weni wa Nungungulu a ‘kurula ku ta andza’

Na ku nga hi kale a Mufumo wa Nungungulu lowu hi wu rindzeleko hi cikhati co leha — ku nga mufumo wa misava yontlhe lowu wu yimisilweko hi Nungungulu —  wu ta maha lezvaku a vanhu vontlhe va hanya zvin’we hi kurula ni kuzwanana. Kota lezvi zvi tsumbisiwako ka Lisimu 72:7 ‘a kurula ku ta andza’. Kanilezvi hi rini a Mufumo wa Nungungulu wu to sangula ku fumela misava? Wu ta zvi mahisa kuyini? Niku wena u ta vhunekisa kuyini hi wona?

WU TATA RINI A MUFUMO WA NUNGUNGULU?

A Bhibhiliya gi wulile na zvi nga se maheka a zvimaho zvo hlamalisa lezvi zvi kombako ku a mufumo wa Nungungulu wu tata lokuloku. A “zvikombiso” lezvo zvi patsa tiyimpi ta matiko yo tala, tindlala, mababyi, kutsekatseka ka misava, ni engetela ka wubihi. — Matewu 24:3, 7, 12; Luka 21:11; Kuvhululelwa 6:2-8.

A ciphrofeto cin’wani ci li: A “masikwini yo gumesa ku tava ni zvikhati zva zvikarato. Hakuva a vanhu va ta ti randza wutsumbu, va randza mali, . . . va nga ingisi vapswali vabye, va nga bongi, va nga tsumbeki, va nga randzi maxaka yabye, va womelela ka mawonela yabye, va hi valumbeti, va nga ti khomi, va hi vo leva, va nga randzi zva zvi nene, . . . va tala hi matshandza, va randza ku ti tsakisa va tsika ku randza Nungungulu.” (2 Timote 3:1-4) Ka masiku ma hundzileko, a zvilo lezvi zvi wa humelela basi ka matshamu yo kari. Kanilezvi zvezvi zvi enetile a tiko.

A zviphrofeto lezvi zvi sangulile ku tatiseka hi 1914. A vativi va matimu, ni vatsali va matimu, ni zviro zva hombe zva politika, zvi wula lezvi a tiko gi nga cicisa zvona andzhako ka 1914. Hi cikombiso, Peter Munch a mutsali wa matimu wa le Dinamarca i tsalile lezvi: ‘A yimpi ya 1914 cikombiso ca hombe ca kucica ka matimu ya vanhu. Mahlweni ka lembe legi, ku wa hi ni kurula ka hombe, . . . kanilezvi cikhatanyana andzhako ka lembe legi a zvilo zvi noya zvi engetela kubiha misaveni yontlhe, kusangula timhango, kumaheka ka zvilo zvo tshisa, livengo, ku tlhela ku nga hi na kurula misaveni yontlhe.’

Hi tlhelo gin’wani, a matshamela lawa zvalezvi ma hi chavisako nguvhu a kale ma wa nga hi kona. Lezvi zvi kombako lezvaku makunu a Mufumo lowu wu to fumela misava yontlhe wu tshinele. Jesu i wulawulile kambe hi zvilo zva zvi nene ka zvikombiso zvakwe zva masiku yo gumesa. I te: “A mahungu lawa ya ma nene ya Mufumo ma ta chumayelwa misaveni yontlhe kasi mava wukustumunyu ka matiko wontlhe, hi kona ku to chikela a kugumesa.” — Matewu 24:14.

A mahungu ya ma nene hi yona mhaka tshinya ya mahungu ya Vakustumunyu va Jehovha. Kunene, a mabhuku lawa ma tirisiwako nguvhu ya Vakustumunyu va Jehovha ma na ni hloko ya mhaka yi nge: A Murindzeli i huwelela a Mufumo wa Jehovha. Zvezvi i kumeka hi tirimi to tala ta ku hundza 338, A Murindzeli i wulawula nguvhu hi zvilo zvo hlamalisa lezvi a Mufumo wa Nungungulu wu to mahela vanhu ni misava cikhatini ci tako.

WU TA FUMISA KUYINI?

A hlamulo wu patsa a mune wa zvipandze zva lisima:

1. A Mufumo wa Nungungulu wu nga ta rangelwa hi varangeli va politika ya tiko legi.

2. A varangeli va politika ya tiko va nga ta vhumela ku tsika wuhosi gabye, kanilezvi gi tava wupumbu a ku zama kulwa ni Mufumo wa Nungungulu. — Lisimu 2:2-9.

3. A Mufumo wa Nungungulu wu ta lovisa a mifumo ya politika kasi wona wu simama ku fumela vanhu vontlhe. (Dhaniyeli 2:44; Kuvhululelwa 19:17-21) A yimpi yo gumesa ya misava yontlhe yi vitaniwa ku i Armagedhoni. — Kuvhululelwa 16:14, 16.

4. Vontlhe lava va ti yimiseleko ku ingisa a Mufumo wa Nungungulu va ta ponisiwa ka Armagedhoni, va nghena misaveni yiswa yo rula. Vona va ta wumba “citshungu ca hombe”, leci ci tova timiliyoni ta vanhu. — Kuvhululelwa 7:9, 10, 13, 14.

U NGA VHUNEKISA KUYINI HI MUFUMO WA NUNGUNGULU?

A zambo go sangula kasi u fumiwa hi Mufumo wa Nungungulu ku gondzisiwa. Jesu i khongele ka Nungungulu aku: “Kasi va kuma wutomi ga pindzukelwa va fanele ku ku tiva wena Nungungulu wece wa lisine, na Jesu Kristu loyi u mu rumileko.” — Johani 17:3.

Loku a vanhu va mu tiva Jehovha Nungungulu kota Munhu, va vhuneka hi tindlela to tala. Wona zvikombiso zvimbiri basi: Co sangula, va tiyisa kukholwa kabye ka Nungungulu. Ku nga kukholwa loku ku seketelwako ka zvikombiso, lezvi zvi tiyisako lezvaku a Mufumo wa Nungungulu wa lisine niku wu tshinele. (Mahebheru 11:1) Ca wumbiri, va tiyisa lirandzo labye hi Nungungulu ni muakelani. A lirandzo leyi li va kucako ku ingisa Nungungulu hi mbilu yontlhe. A lirandzo hi muakelani li va kuca ku tirisa magezu ya Jesu ya ku mahela van’wani lezvi vona va lavako ku mahelwa. Luka 6:31 ili: “Lezvi mu lavako ku a vanhu va mu mahela, n’winawu va maheleni zvalezvo.”

A ku fana ni papayi wa lirandzo, a Muvangi wa hina i hi xuvela zvilo zva zvi nene nguvhu. I lava lezvaku hi kuma wutomi legi a Bhibhiliya gi nge: “Wutomi legi hakunene gi nga wutomi.” (1 Timote 6:19) A wutomi nyamutlha a hi gona gi nga “wutomi legi hakunene gi nga wutomi”. A vanhu vo tala nyamutlha a wutomi ga va bindzela niku zvi lava kutikarata kasi va hanya. Kasi u wona masemanyana ya lezvi a “wutomi legi hakunene gi nga wutomi” gi to tshamisa zvona, wona zvilo zvo kari zvo hlamalisa lezvi a Mufumo wa Nungungulu wu to mahela lava va wu ingisako.