Wutomi ga ngango ni vanghana
A vanhu vo tala zva va karatela a ku simama vava ni kuzwanana ku nene ngangweni ni ka vanghana. Wona matshinya yo kari ya milayo ma nga ku vhunako ku chukwatisa a kuzwanana ka wena ni van’wani.
KOMBISA KUKHATALA
TSHINYA GA NAYO GA BHIBHILIYA: “Na mu nga ti laveli lezvi zvi tsakisako n’wina basi, kanilezvi mu lava ni lezvi zvi tsakisako van’wani.” — Va Le Filipi 2:4.
LEZVO ZVI WULA YINI? Hi tava ni kuzwanana ku nene loku hi veka kupima ka lezvi hi nga vhunisako zvona van’wani ku hundza ku alakanyela hi lezvi vona va nga hi mahelako. Loku u nga khatali hi van’wani, a wunghana ga wena na vona gi nga wonheka. Hi cikombiso, loku a nuna kutani sati a nga khatali hi mun’wani, a mun’we wabye a nga kanganyisa munghana wakwe. Ku engetela kwalaho, a nga kona munhu a lavako kuva ni munghana loyi contlhe cikhati a ti dzundzako hi lezvi a nga nazvo ni lezvi a zvi tivako. A bhuku go kari ga cinyan’waka gi ngalo: “A vanhu lava va alakanyelako hi zvilo zvabye basi va nga tshuki va alakanyela hi van’wani va tava ni zvikarato zvo tala”.
LEZVI U NGA MAHAKO:
Vhuna van’wani. A vanghana va va nene va tsumbana niku va ti yimisele ku vhunana. A kambisiso wo kari wu kombile lezvaku a vanhu lava va vhunako van’wani va karateka kutsongwani mbilwini va tlhela va ti nyika lisima.
Kombisa kuzwela wusiwana. Hi kombisa a zwela wusiwana mbilwini ya hina loku hizwa a kubayisa loku wo kari a ku zwako. Loku u kombisa kuzwela wusiwana, u nga ta tolovela ku tirisa magezu yo tlhava, ku nga magezu yo hlakana kanilezvi na wu xuva ku khunguvanyisa a kutizwa ka mun’wani munhu.
Loku u kombisa a kuzwela wusiwana, u nga ta veka kupima ka zvihoxo zva van’wani. Hi ndlela leyo, a kuzwela wusiwana ku nga ku vhuna kuva u potsa cihlawulela u tlhela u maha vanghana ni vanhu va midhawuko ni matshamela yo hambanahambana.
Ti lavele cikhati co bhula. Laha u mbhetako cikhati na u bhula ni van’wani, u taya u va tiva khwatsi. Loku u lava kuva ni vanghana va va nene u fanele ku bhula hi zvilo lezvi zvi va karatako ni zva lisima ka vona. Va ingisele khwatsi. Kombisa ku khatala hi zvikarato zva vanghana va wena. A cigondzo co kari ci wulile lezvi: “A mabhulo yo eta hakunene ma nga maha munhu a tsaka.”
HLAWULA VANGHANA VA VA NENE
TSHINYA GA NAYO GA BHIBHILIYA: “A ku tolovelana ni vakubiha zva bihisa a mahanyela ma nene.” — 1 Va Le Korinte 15:33.
LEZVO ZVI WULA YINI? A vanhu lava u mbhetako cikhati navo va na ni kucetelo wa hombe ka wena — ku ngava wa wunene kutani wa kubiha. A titlhari ta ku gondza a kutshamiseka ka mingango ti kholwa lezvaku a kucetelo lowo wu nga khumba a wutomi ga wena. Hi cikombiso, a titlhari ti wula lezvaku loku u randzelwe hi vanhu va randzako ku dzaha kutani vanhu va tlhatlhileko wukati, wenawu u ta xuva ku maha zvo fana ni lezvi va mahako, u sangula ku dzaha kutani ku lava ku tlhatlha wukati.
LEZVI U NGA MAHAKO: Maha wunghana ni vanhu va kombisako matshamela ni mahanyela u lavako ku ma pimanyisa. Hi cikombiso, hlota ku tolovelana ni vanhu va va nene, va nga ni cichavo, vo hana, ni vo rurela vapfhumba.
MAN’WANI MATSHINYA YA MILAYO YA BHIBHILIYA
Wona tivhidhyu ti seketelwako ka Bhibhiliya ti mahelwako ku vhuna mipatswa, ni lava va nga tangeni yo sangula ku ti tshotshota, ni vanana kasi va chukwatisa a wutomi ga ngango
POTSA MAGEZU YO TLHAVA.
‘Timhaka ti tlhavako khwatsi i supadho.’ — MAVINGU 12:18.
RANDZA KU NYIKA.
“A muhefemulo wa wuhana wu ta kuluka”. — Mavingu 11:25.
MAHELA VAN’WANI LEZVI U LAVAKO KU VA KU MAHELA.
“Zvontlhe lezvi mu lavako ku a vanhu va mu mahela, n’winawu va maheleni zvalezvo.” — Matewu 7:12.