Wunghana ni vanhu va matiko manʼwani

Ka mhaka leyi

Loku hi ti hambanisa ni vanhu va midhawuku hi kalako hi nga yi tsakeli, a cihlawulela ca hina ci ta kula. Loku hi maha wunghana basi ni vanhu lava hi alakanyako ku va fana na hina, a maalakanyo ya hina, ni kutizwa ka hina ni mitiro ya hina hi ta zvi wona zvi hi zva chukwana a ku hundza zva van’wani.

Tshinya ga nayo ga Bhibhiliya

“Vhululani timbilu ta n’wina tontlhe”. — 2 VA LE KORINTE 6:13.

Lezvi zvi wulako zvona: A “mbilu” ya hina yi nga komba kutizwa ka hina, ni lirandzo la hina. Loku hi randza a vanhu lava va fanako na hina basi, a mbilu ya hina yi ta ku gwee ka valavo basi. Kasi ku potsa cikarato leco hi fanele ku ti karatela ku maha wunghana ni wihi munhu a hambanileko na hina hi hlonge.

A ku maha wunghana ni vanhu va midhawuku yin’wani zvi nga hi vhunisa kuyini?

Laha hi yaku hi tiva vanhu van’wani, hi ta simama ku zwisisa ku hikuyini va mahako zvilo hi ndlela yo hambana ni ya hina. Niku laha hi yaku hi va tiva khwatsi, hi ta pola lezvaku va maha cipandze ca mudhawuku wa hina. Hi ta sangula ku va nyika nguvhu lisima, ni ku hi ta va zwela nguvhu wusiwana.

Wona cikombiso ca Nazaré. I wa karateka hi cihlawulela ci nga mahiwa hi vanhu va nghata hi ka matiko man’wani. I hlawutela lezvi zvi mu vhunileko: “Ndzi mbetile cikhati co leha navo niku ndzi wa tiara navo. Ndzi kumile vanhu va nga hambene nguvhu ni lezvi a van’wani va zvi wulako xungetano hi mudhawuku wabye. A cikhati u mahako wunghana ni vanhu va mudhawuku wun’wani, u wona lezvaku a hi vontlhe va fanako, hi ku landzela u ta va randza u tlhela u va nyika lisima.

Lezvi u nga mahako

Zama ku kuma thomo ga ku bhula ni vanhu va hlonge ni lirimi lo hambana ni la wena. U nga va:

Wutisa kasi va ku byela zvitsongwani xungetano hi vona.
Ramba kasi mu taga zvin’we.
Ingisela khwatsi a cikhati va hlawutelako a matimu yabye, kasi u tiva leci ci nga ca lisima ka vona.

Loku u ti karatela ku zwisisa a matshango ya lezvi va nga kumana nazvo, u ta zwisisa lezvi va nga zvona, niku lezvo zvi ta ku vhuna kuva munhu wo fana navo kutani wa midhawuku yin’wani.

Zvikombiso zva zvilo zvi mahekileko: Kandasamy na Sookamah (Canada)

“Hi kulele le Jhoni nguveni ya aparteide (cihlawulela ca hlonge). A vanhu va tilhonge to hambana va sindzisilwe ku tshama ka tindhawu to hambana, lezvo zvi byalile a moya wa cihlawulela ka vanhu vo hambanahambana hi tihlonge. Hi wa nga hi valungu, niku a valungu hi wa va nyenya hakuva va wa hi wona kota vanhu va nyalidede. Ka cikhati leco hi wa nga zvi poli ku hi wa hi ni cihlawulela. Kanilezvi hi no guma hi pola lezvaku ci wa hi thapele.

“Kasi ku potsa a tshamela lego, hi no zama ku lava vanghana va mudhawuku wo hambana ni lowu wa hina. Laha hi nga sangula ku ti tlhanganisa ni valungu, hi no guma hi pola ku hi wa nga hi vanhu vo hambana nguvhu. Hi lwisana ni zvikarato zvo fana.

“Hi londzowotile lunghelo ga ku rurelwa hi patswa wokari wa valungu va nga hi endzele hi cikhati co leha. Hi tivene khwatsi. Hi sangulile ku wona lezvaku hi wa fana niku hi wa hi vanghana. Kota wuyelo ga kona, hi sangulile ku wona a valungu vontlhe hi ndlela ya yinene.”