Makhurisi Ya Jeriko

ZINI zi wisako makhurisi lawa ya Jeriko ke? Zi woneka ku khwatsi ma lo biwa hi bhomba ga hombe. Kanilezi ka masiku lawayani va wa nga hi na mabhomba; ge hambu kuva ni zibhamu. Lexo xihlamaliso xinwani xa Jehova! A hi tiveni a ku zi mahekisile kuyini.

Hi ngazwa lezi Jehova a byelako Joxua: ‘Wena ni masochwa ya wena mu ta renzelekela doropa. Mu ta gi renzelekela kanwe hi siku nzeni ka ntlhanu wa masiku ni ginwe. Rwalani nghaxa ya xivumelwano mu famba nayo. Ku ta famba ntlhanu wa vapristi ni vambiri mahlweni ka yona na vaba mipunzu yabye.

‘Ka siku ga wuntlhanu ni mambiri mu ta renzelekela doropa a ntlhanu wa zikhati ni zimbiri. Makunu lehisani pfumawulo wa mipunzu, ni vanhu vontlhe va wa kanyuluke hi gezu ga hombe ga kulwa. Ni makhurisi ma tawa hasi!’

Joxua ni vanhu va maha lezi Jehova a leletelako. Loku va kari va famba, a vanhu vontlhe va miyelile. A ku na loyi a wulako ni gezu. Zontlhe lezi zi kotekako ku zwiwa i pfumawulo wa mipunzu ni zigingi. Za koteka a ku a valala va vanhu va Jehova va chavile. Wa yi wona a ngoti liyani yo pswhuka yi hayekilweko laha njhaneleni? I njhanela ya mani liyani? Ina, Rahabi i mahile lezi a tihloli ti mu leleteleko ku maha. Wontlhe ngango wakwe wu lomu ndlwini na wu cuwukisela zinwe naye.

Hi kugumesa, ka siku ga wuntlhanu ni mambiri, anzhako ka kuva va renzelekele doropa a ntlhanu wa zikhati ni zimbiri, na mipunzu yi bile, a masochwa ma kanyulukile, a makhurisi ma lowa. Zonake Joxua i ngalo: ‘Dayani vanhu vontlhe lomu doropeni mu gi hisa. Hisani zontlhe. Ntsena hlayisani siliva, a nzalama, a suku, ni xiketse, mu zi nyikela xikhwameni xa tenda ga Jehova.’

Joxua aku ngalo, ka tihloli ta timbiri: ‘Yanani ndlwini ya Rahabi, mu ya humesa yena ni ngango wakwe wontlhe.’ Rahabi ni ngango wakwe va ponisilwe, kota lezi a tihloli ti nga mu tsumbisile.