Rahabi i lo kholwa ka Jehova

A hi ti alakanye na hi hi doropeni ga Jeriko. Legi i doropa ga tiko ga Kanani, lomu a vanhu va kona va nga kholwiko ka Jehova. A wasati wo kari a vitwako Rahabi i hanya kwalomu.

A xikhati lexi Rahabi a nga hi nwanana, i zwile lezaku Mosi i avanyisile a Bimbi go Pswhuka, a tlhela a humesa vaIsraeli le tikweni ga Gipite. I tlhelile azwa lezi Jehova a nga va vunisa zona ku hlula valala vabye tiyimpini. Makunu, lezi izwa lezaku a vaIsraeli va gwimbile matenda kusuhani ni Jeriko na va ti longisela ku gi dumela!

Ka gambo go kari, a vavanuna vambiri va vaIsraeli va loya Jeriko kasi ku ya hlola doropa. Vona va loya mutini wa Rahabi. Yena i lo va tsika va nghena. Xikari ka wusiku a hosi ya Jeriko yi lozwa lezaku ku nghenile a tihloli lomu doropeni, niku ti le mutini wa Rahabi. Hikwalaho, a hosi yi lo rumela vavanuna kasi ku ya khoma tihloli leto. Rahabi i lo fihla tihloli leto ta timbiri le hehla ka yindlu yakwe, a tlhela a wula lezi ka vavanuna lava va nga rumelwe hi hosi: ‘A tihloli ti wa hi kwalaha, kanilezi ti humile zezi lomu doropeni. Loku mu ti lanza zezi, mu nga ti kuma!’ Wa zi tiva ku hikuyini Rahabi a vikeleko a vavanuna lava va tihloli? — Hi lezaku yena i wa kholwa ka Jehova, i wa zi tiva kambe lezaku Jehova i ta nyikela a tiko ga Kanani ka vaIsraeli.

Na tihloli ti nga se suka mutini wa Rahabi, tona ti mu tsumbisile lezaku yena ni va ngango vakwe va ta pona loku Jeriko gi lovisiwa. Xana wa zi tiva ku zini lezi va mu byelileko lezaku a maha? — Vona va te: ‘Teka lingoti leli lo pswhuka, u li boha laha njhaneleni ya wena. Loku u maha lezo, vontlhe lava va to ngha va hi lomu ndlwini ya wena va ta pona.’ Rahabi i lo maha zontlhe lezi a tihloli ti nga mu byela. Xana wa zi tiva ku zini zi humeleleko hi kulanzela? — 

Anzhako ka masiku matsongwani, a vaIsraeli va lo renzelekela a doropa na va nga vangi guwa. Hi ntlhanu wa masiku ni ginwe, va lo renzelekela a doropa khati ginwe hi siku. Kanilezi, ka siku ga wuntlhanu ni mambiri, vona va lo renzelekela doropa a ntlhanu wa zikhati ni zimbiri. Anzhako ka lezo, vontlhe va lo banguleka hi gezu ga hombe. Jehova i lo khungumula a makhurisi lawa ma nga ranzele a doropa. Kanilezi, a yindlu leyi yi nga bohilwe a lingoti lo pswhuka laha njhaneleni a yi wangi! Xana wa yi wona laha ka xithombe? — Rahabi ni ngango wakwe va ponile!

Zini u gonzako ka xikombiso xa Rahabi? — Rahabi i wa kholwa ka Jehova hi kota ya zilo zo hlamalisa lezi a gonzileko xungetano hi yena. Wenawu wa gonza zilo zo tala zo hlamalisa xungetano hi Jehova. Xana wa kholwa kakwe a ku fana ni lezi Rahabi a nga maha? — Ha zi tiva lezaku wa kholwa!