Rahabhi a fihla zvipiyawu

A cikhati leci a zvipiyawu zva vaIzrayeli zvi nga ya hlola dhoropa ga Jeriko, zvi yile zvi ya tshama ndlwini ya wasati wa ku hi Rahabhi. A hosi ya Jeriko yi no zvi tiva, yi se rumela masochwa maya kaya ka Rahabhi. Rahabhi i no fihla zvipiyawu lezvo zva zvimbiri le hehla ka yindlu yakwe a gumesa a byela masochwa lezvaku ma ya zvi lavetela ka tlhelo gin’wani. I no byela zvipiyawu, aku: ‘Ndzi ta mu vhuna hakuva ndza zvi tiva lezvaku Jehovha i na n’wina niku mu ta hlula tiko legi. Ndzi kombela ku mu ndzi tsumbisa lezvaku mu ta ponisa mina ni va ngango wa mina’.

A zvipiyawu zvi no byela Rahabhi zviku: ‘Ha ku tsumbisa lezvaku lava va tova lomu ndlwini ya wena va ta pona’. Va tlhela vaku: ‘Boha lingoti lo pswhuka laha janeleni ga wena. Loku u maha lezvo, a va ngango wa wena va nga ta dawa’.

Rahabhi i no chisa zvipiyawu hi lingoti hi laha janeleni gakwe. A zvipiyawu zvi noya zvitsungeni zvi ya fihlala masiku manharu na zvi nga se tlhela ka Joxuwa. A vaIzrayeli va no gumesa va tsemakanya Congo wa Jordhani va ti longisela ku teka tiko ga Jeriko. Jeriko give gona dhoropa go sangula va nga gi hlula. Jehovha i no va byela lezvaku va rendzelekela dhoropa khati gin’we hi siku hi 6 wa masiku. Ka siku ga wu 7, va gi rendzelekele 7 wa makhati. A vapristi va no gumesa vaba mimpundzu niku a masochwa ma no banguleka hi laha ma nga zvi kota hi kona. A mimuro ya dhoropa yi no khungumuka yiwa yiku hohlo! Kanilezvi, a yindlu ya Rahabhi a yi wangi, hambu lezvi yi nga hi laha ka muro. Rahabhi ni va ngango wa va ponisilwe hakuva yena i wa tsumba Jehovha.