A madimoni vadayi!
Satani ni madimoni va nani tihanyi niku va vanga timhango xikhati xontlhe. Xikhatini xa kale, Satani i dele a zifuyo ni malanza ya munhu wo tsumbeka, Joba. Hi kulanzela i lo daya vana va Joba va khume hi ku maha lezaku a “bhubhutsa ga hombe” gi khungumula a yindlu leyi va nga hi ka yona. Anzhako ka lezo Satani i loba Joba hi “zidlayi zo bayisa, kusukela mikonzweni yakwe kala le hlokweni.” — Joba 1:7-19; 2:7.
A masikwini ya Jesu, a madimoni ma mahile lezaku a vanhu vo kari vava timbeveve ni zikhumu. (Mateu 9:32, 33; 12:22) Ma xanisile wanuna wo kari ma tlhela ma mu maha a ti cekelela hi maribye. (Marku 5:5) Wona kambe ma mahile mufana aba huwa, ma mu puluwunzisa lahasi, ni ku mu “tsekatsekisa hi ku bayisako.” — Luka 9:42.
Xikhatini xa kale, a madimoni ma babyisile vanhu vo kari ma tlhela ma tsekatsekisa vanwani
Inyamutlha, Satani ni madimoni va ha hi vadayi a ku fana ni kale. Hi lisine, a ntiro wabye wa kubiha wa anza kusukela kuhoxweni kabye hi le tilweni. A mibiko yi tako hi matlhelo wontlhe ya misava ya tiyisa lezaku va nani tihanyi. Va xanisa vanhu vo kari hi mababyi. Vanwani va va hlupha ni wusiku hi ku va tsona wurongo kutani ku va lorisa zilo zo chavisa. Vanwani kambe va va xanisa hi ku hlengela masango navo. Ni vanwani va va hlanyisa, va va maha lezaku vava vadayi kutani ku va maha va ti sunga.
Inyamutlha, a madimoni ma maha vanhu vo kari vava va timholova; ma hlupha vanwani ni wusiku hi ku va lorisa zilo zo chavisa
Lintina, a tshamako le Suriname, i hlawutela lezaku a dimoni go kari, kutani moya wo biha, gi dele 16 wa ziro za ngango wakwe gi tlhela gi xanisa yena nyameni ni miehleketweni hi 18 wa malembe. Hi kota ya lezi yena wutsumbu a zi hanyileko, yena i ngalo a madimoni “ma tsaka hi ku xanisa vanhu va lwelako ku ti tlhatlhisa ka wona kala vafa.”
Kanilezi Jehova wa zi kota ku vikela malanza yakwe hi ka tixanisa ta Satani. — Mavingu 18:10.