Xigonzo 13

Xana U Nga Gi Kumisa Kuyini A Wukhongeli Ga Lisine?

Xana Nungungulu i tsakisiwa hi zikholwa zontlhe kutani i tsakisiwa hi xinwe ntsena? (1)

Hi kuyini ku nga ni zikholwa zinyingi zi ti wulako kuva za wuKristu? (2)

Xana u nga ma tivisisa kuyini a maKristu ya lisine? (3-7)

1. Jesu i wumbile xikholwa xinwe ntsena xa wuKristu ga lisine. Hi kota ya lezo, nyamuthla ku fanele ku va ni hlengeletano kutani ntlawa munwe ntsena wa vakhozeli va Jehova Nungungulu, va lisine. (Johani 4:23, 24; Va Le Efesusi 4:4, 5) A Biblia gi gonzisa lezaku mbatsongwani ntsena va lanzako a ndlela yo hlongana yi yisako wutomini. — Mateu 7:13, 14.

2. A Biblia gi wa sina gi wulile lezaku, anzhako ka kufa ka vapostoli, a zigonzo za hava ni mikhuwo yi nga hiko ya wuKristu zi wa ta nghena bandleni ga wuKristu, hi kutsongwani-kutsongwani. A vanhu va wa ta hambukisa makholwa kasi ku ma lanza vona, ma tsika Kristu. (Mateu 7:15, 21-23; Mitiro 20:29, 30) Lexo hi xona xigelo xa ku hi wona zikholwa zinyingi zo hambana-hambana, zi ti wulako kuva za wuKristu. Hi nga ma tivisisa kuyini a maKristu ya lisine ke?

3. Lexi xi dlunyatisako nguvu a maKristu ya lisine hi ku ma ranzana hakunene. (Johani 13:34, 35) A ma gonzisiwi lezaku ma ti wona ku va chukwana a ku hunza vanhu va tinwani tixaka kutani yinwani mihlowo ya xikhumba. Kambe a ma gonzisiwi lezaku ma nyenya vanhu va matiko manwani. (Mitiro 10:34, 35) Hi mhaka leyo, a ma hlengeli tiyimpini. A maKristu ya lisine ma hanyisana zinwe kota vamakabye va xinuna ni va xisati. — 1 Johani 4:20, 21.

4. A xinwani xikombekiso xa wukhongeli ga lisine hi ku a ziro za gona zi nani xichawo xa hombe ka Biblia. Zi gi amukela kota Gezu ga Nungungulu na zi kholwa lezi gi zi wulako. (Johani 17:17; 2 Timote 3:16, 17) Zi chela lisima la hombe ka Gezu ga Nungungulu a ku hunza ka miehleketo kutani mikhuwo ya vanhu. (Mateu 15:1-3, 7-9) Zi zama ku va ni mahanyela yo fambisiwa hi Biblia. Hizalezo, a zi xumayeli nchumu wunwe, na zi djika zi maha wunwanyani. — Titusi 1:15, 16.

5. A xikholwa xa lisine xi fanele kambe a ku xi dzunza a vito ga Nungungulu. (Mateu 6:9) Jesu i tivisile a vito ga Nungungulu, Jehova, ka vanwani vanhu. A maKristu ya lisine ma fanele a ku maha zalezowo. (Johani 17:6, 26; Va Le Roma 10:13, 14) Hi vamani, lomu xipanzeni xa nwina, va wulawulako ni vanhu hi vito ga Nungungulu?

6. A maKristu ya lisine ma fanele ku xumayela a Mufumo wa Nungungulu. Jesu i wa maha zalezo. Xikhati xontlhe i wa wulawula hi Mufumo. (Luka 8:1) I rumile a vapizani vakwe lezaku va kanela mahungu yalawo misaveni yontlhe. (Mateu 24:14; 28:19, 20) A maKristu ya lisine makholwa lezaku a Mufumo wa Nungungulu hi wona ntsena wu ta nga tisa a kurula ka lisine ni kutiyiseka laha misaveni. — Tisimu 146:3-5.

7. A vapizani va Jesu a va fanele kuva xipanze xa misava leyi yo biha. (Johani 17:16) A va ti ngheniseli ka timhaka to yelana ni mafumela, ge hambu lomu ka kukanetisana hi mahanyisanela ya vanhu misaveni. Va potsa a mahanyela, a mikhuwo ni matshamela ya hava, lawa ma tolovelekeko misaveni leyi. (Jakobe 1:27; 4:4) Xana, lomu xipanzeni xa nwina, u nga zi kota a ku hlawula a ntlawa wa vakhongeli wu nga ni zikombekiso lezi zi wonekako, zi dlunyatisako a wuKristu ga lisine?

[Mifota ka phajina 27]

A maKristu ya lisine ma ranzana, ma chava Biblia ni kambe ma xumayela a Mufumo wa Nungungulu