Xigonzo 9

Vamani Vanghana Va Nungungulu?

Jesu Kristu hi N’wana wa Jehova ni munghana wakwe wa laha kusuhani nguvu, a ranzekako nguvu. Na a nga se hanya Misaveni kota munhu, Jesu i hanyile tilweni kota xivangwa xa ntamu xa moya. (Johani 17:5) Anzhako i lota Misaveni kasi ku ta gonzisa vanhu a zinene hi Nungungulu. (Johani 18:37) Kambe yena i nyikele wutomi gakwe ga wumunhu kasi ku hanyisa vanhu vo ingisa kuonheni ni kufeni. (Va Le Roma 6:23) Jesu makunu i Hosi ya Mufumo wa Nungungulu, wukosi ga tilo legi gi to maha Misava leyi yiva Paradise. — Kuvululelwa 19:16.

A tingelosi na tona vanghana va Nungungulu. A tingelosi a ti sangulangi kuhanya kota vanhu Misaveni. Ti vangilwe le tilweni, na Nungungulu a nga se maha Misava. (Joba 38:4-7) Ku na ni makume ya mazana ya makume ya mazana ya tingelosi. (Danieli 7:10) Vanghana lavo va Nungungulu va le tilweni va lava lezaku vanhu va gonza zinene hi Jehova. — Kuvululelwa 14:6, 7.

Kambe Nungungulu i na ni vanghana Misaveni; yena i va vitana aku timboni takwe. Le hubyeni ya kulamula, a mboni yi hlawutela lezi yi zi tivako hi wo kari kutani nchumu wo kari. A Timboni ta Jehova ti byela vanwani lezi ti zi tivako hi Jehova ni makungo yakwe. (Isaya 43:10) Kota lezi tingelosi ti mahako, a Timboni ti lava a ku ku vuna ku gonza zinene hi Jehova. Ti lava a ku wenawo uva munghana wa Nungungulu.