Hikuyini hi faneleko ku tira?

ZINI u zi ranzako nguvu? Ku tira niku ku hlakana? — Hi lisine, a ku hlakana a zi bihangi. A Biblia gi wulawula hi doropa ga Jerusalema ‘gi teleko hi vafana ni vanhanyana, va hlakanako lomo.’ — Zakaria 8:5.

Mugonzisi wa Hombe i wa tsaka hi ku wona vanana na va hlakana. Na a nga seta laha misaveni, Jesu i wulile lezi: ‘Nzi wa hi zinwe naye, kukotisa xigogo xa mitiro. Na nzi tsaka xontlhe xikhati mahlweni kakwe.’ Jesu i vitaniwa ku “xigogo xa mitiro” hi lezi a tirileko zinwe na Jehova le tilweni. Niku a xikhati lexi a nga hi leyo, i lo wula lezi kambe: ‘Nzi wa tsakisiwa hi vana va vanhu.’ Kota lezi hi zi gonzileko, Mugonzisi wa Hombe i wa khatala nguvu hi vanhu vontlhe, a ku patsa ni vanana. — Mavingu 8:30, 31.

U alakanya lezaku Jesu i wa hlakana a xikhati lexi a nga hi nwanana? — Kuzilava i wa hlakana. Kanilezi, kota lezi a nga tirile kota “xigogo xa mitiro” le tilweni, xana i wa tira kambe ni laha misaveni? —  Jesu i wa vitaniwa ku i “n’wana wa muvatli.” Kanilezi, i wa vitaniwa a ku “muvatli” kambe. Zi komba yini lezo? — Zi komba lezaku kota lezi Josefa a nga wundla Jesu kota n’wana wakwe, i mu gonzisile kuvatla. Hikwalaho, Jesu yenawu i lo maha muvatli. — Mateu 13:55; Marku 6:3.

Kota lezi a nga hi “xigogo xa mitiro” le tilweni, lezi zi kombako lezaku i wa hi mutiri wa wutlhari ga hombe, ni laha misaveni konawu i wa hi muvatli wa wutlhari ga hombe, a hi zona? — Xikhatini lexo, a ntiro wa kuvatla wu wa binza nguvu. Kuzilava zi wa lava lezaku Jesu a ya tsema tisinya, a panzelela zigodo zi maha mapulango a famba nawo kaya a ya ma sasekisela kasi a maha timeza, tibako, ni zinwani.

U alakanya lezaku a ntiro lowo wu wa mu tsakisa Jesu? — U wa ta tsaka loku u wo zi kota ku maha timeza to saseka, zitulo ni zinwani kasi a vanhu va zi tirisa? — A Biblia gi wula lezaku zi nene loku a munhu “a tsakela mitiro yakwe.” A kuhlakana a zi nge ku nyiki litsako li kumiwako hi ku tira. — Mutshawuteli 3:22.

Hi lisine, a ntiro wu vuna maalakanyo ni miri wa hina. A vanana vo tala va ranza ku tshama va wona televizawu, va bhula kutani ku hlakana ni vanghana vabye. Hi kota ya lezo, va gumesa va maha vanhu vo kuluka ni va wulolo, va tlhela va nga kumi litsako. Niku ne a va tsakisi vanwani kambe. Makunu zini hi faneleko ku maha kasi hi tsaka? —

Lomu ka Xipimo 17 xa bhuku legi hi gonzile lezaku a kunyika ni ku maha zilo kasi ku vuna vanwani zi neha litsako. (Mitiro 20:35, NM) Makunu, a zi hlamalisi loku a Biblia giku Jehova i Nungungulu wo tsaka! (1 Timote 1:11, NM) Niku kota lezi hi gonzileko lomu ka Mavingu, Jesu i wa “tsaka xontlhe xikhati mahlweni kakwe.” Hikuyini Jesu a nga hi munhu wo tsaka? — I wulile a xinwe xa zigelo laha a ngaku: ‘Papai wa ha tira ni lezi, na mina nza tira.’ — Johani 5:17.

A xikhati lexi Jesu a nga hi laha misaveni, a nga tirangi kota muvatli wutomi gakwe gontlhe. Jehova i wa hi ni ntiro wo hlawuleka a nga lava lezaku Jesu a wu maha. Wa zi tiva a ku ku wa hi ntiro muni? — Jesu ite: “Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.” (Luka 4:43) Ka zikhati zinwani, lava Jesu a nga kari a va xumayela va wa kholwa lezi a nga va byela, va tlhela va bhulela vanwani lezi a nga va byelile, a ku fana ni lezi a nga maha a wasati loyi wa muSamaria u mu wonako laha ka mufota. — Johani 4:7-15, 27-30.

I wa ti zwisa kuyini Jesu hi ku maha ntiro lowo? U alakanya lezaku i wa zi lava a ku wu maha? — Jesu i te ngalo: “A zakuga za mina hi ku maha a kuranza ka loyi a nzi rumileko, ni ku mbhetisa a ntiro wakwe.” (Johani 4:34) Wa tsaka loku mu lava kuga zakuga u zi ranzako? — Lezi zi ku vuna ku wona lezi Jesu a nga wu ranzisa zona a ntiro lowu Nungungulu a nga mu nyikile lezaku a wu maha.

Nungungulu i hi mahile hi ndlela ya ku hi tsaka hi ku gonza a ntiro wo kari. I wula lezaku a xinyikiwo lexi a nyikileko vanhu hi lezaku ‘va tsakela a ntiro wabye.’ Hikwalaho, loku u gonza a ku tira na wa ha hi nwanana, a wutomi ga wena gontlhe gi ta tsakisa. — Mutshawuteli 5:19.

Lezo a zi wuli lezaku a nwanana a nga maha ntiro wo fana ni wa munhu wa hombe, kanilezi hontlheni hi nga maha ntiro wo kari. Kuzilava a vapswali va wena siku ni siku va suka laha kaya vaya ntirweni kasi ku kuma mali ya ku xava zakuga, ni ku kuma muti wo tshama kona. Niku kota lezi u zi tivako, ku na ni ntiro wo tala wu faneleko ku mahiwa laha kaya, kasi a muti wu hlayiseka ni ku tshama na wu basile.

I ntiro muni u nga wu mahako lowu wu nga vunako vontlhe laha kaya? — U nga va vuna a ku veketela tiparato laha mezeni, u suselela u hlaza, u wola chaka, u basisa lomu u etlelako kona, ni ku tlhelisa lezi u hlakanako hi zona lomu zi tshamako kona. Kuzilava wa maha zilo zo kari hi zi kumbukileko laha. A ntiro lowo hakunene wa vuna vontlhe laha kaya.

A hi wone a ku hikuyini a ntiro wo fana ni lowo wu vunako. Anzhako ka kuva u mbhetile ku hlakana, u fanele ku suselela lezi u nga hlakana hi zona. U alakanya lezaku hikuyini lezo zi nga za lisima? — Zi maha lezaku laha kaya ku nga hi na wufenze zi tlhela zi vikela timhango. Loku u tsika lezi u hlakanako hi zona na zi mbambamele, mamani a nga tshuka a wuya na a rwele zilo zo binza, zonake a ti gumula hi zona awa a ti bayisa. Zi nga tshuka zi lava a ku aya xipitali. Zi wa nga tava zi bihile nguvu lezo? — Hikwalaho, loku u tiva ku suselela lezi u hlakanako hi zona, u ya zi veka lomu zi tshamako kona, zi ta vuna vontlhe laha kaya.

Ku na ni ntiro wunwani lowu a vanana va faneleko ku maha. Hi xikombiso, a T.P.C. Le xikoleni u gonza a ku lera. A vanana vanwani za va tsakisa a ku lera, kanilezi a vanwani za va karatela. Hambu loku a kusanguleni zi wonekisa ku khwatsi za ku karatela, loku u gumesa u zi kota ku lera khwatsi, u ta tsaka. U ta zi kota ku lera a Biblia ha wece, a bhuku ga Nungungulu. Makunu, loku u ti karatela ku maha khwatsi a T.P.C., zi ta ku vuna nguvu, a hi zona ke? —

Ku na ni vanhu vo kari va kalako va nga zi ranzi ku tira. Kuzilava wa tiva wo kari a kalako a nga zi ranzi. Kanilezi, kota lezi Nungungulu a hi mahileko lezaku hi tira, hi fanele ku gonza ku ranza ku tira. Xana Mugonzisi wa Hombe wu wa mu tsakisa nguvu a ntiro lowu a nga kari a wu maha? — Ina, zi wa fana ni kuga a zakuga lezi a nga zi ranza. Kanilezi i ntiro muni lowu a nga wulawula hi wona? — Ku wa hi ku wulawula ni vanwani xungetano hi Jehova Nungungulu, ni lezi va faneleko ku maha kasi va kuma wutomi ga pinzukelwa.

Lexi xi nga hi vunako ku tsakela ku tira, ku ti wutisa lezi: ‘Hikuyini a ntiro lowu wu faneleko ku mahiwa?’ Loku u zi tiva a ku hikuyini a ntiro wo kari wu nga wa lisima, zi maha lezaku u tsaka nguvu hi ku wu maha. Niku kani a ntiro lowo wutsongwani, kani wa hombe, wu mahe khwatsi. Loku u wu maha khwatsi, u ta tsaka hi ntiro lowu u wu mahileko, a ku fana ni lezi Mugonzisi wa hina wa Hombe a nga maha.