Hi zi tivisa kuyini a ku a Har-magedoni yi laha kusuhani?

WA ZI tiva a ku xini a xikombiso? — Lomu ka Xipimo 46 hi gonzile hi xikombiso lexi Nungungulu a xi kombisileko, xa lezaku a nga ta ha lovisa tiko hi ndambi. A vapostoli va Jesu vonawu, va lo kombela ku tiva xikombiso xa kuwuya ka Jesu, ni lezaku a kugumesa ka tiko ku laha kusuhani. — Mateu 24:3.

Kota lezi Jesu a nga wa ta kala a nga woneki le tilweni, ku wa ta laveka xikombiso kasi ku a vanhu va zi tiva lezaku makunu i sangulile ku fuma. Hikwalaho, Jesu i lo byela a vapizani vakwe lezaku va wa fanele ku chela kota hi zokari zi nga wa ta humelela laha misaveni. A xikhati lexi a zilo lezo zi nga wa ta humelela, zi wa ta komba lezaku i wuyile ni lezaku i sangulile ku fuma le tilweni kota Hosi.

Kasi ku gonzisa vapizani vakwe a lisima la ku tshama na va rinzela, Jesu i lo va byela lezi: “Cuwukani a sinya ya nkuwu ni tisinya tontlhe: Loku ti sangula ku hluka, ma zi tiva ha nwece, hi ku cuwuka, lezaku a ximumu xi laha kusuhani.” Loku a ximumu xi hi laha kusuhani ni ku chikela, ha zi tiva. Niku hi nga zi tiva kambe lezaku a Har–Magedoni yi laha kusuhani, loku hi wona a zilo lezi Jesu a nga wulawula hi zona na zi humelela. — Luka 21:29, 30,  Tradução do Novo Mundo.

Ka phajina legi ni legi gi lanzelako, hi ta wona a mifota ya zilo lezi Jesu a nga wula lezaku zi wa ta maha xipanze xa xikombiso xa lezaku a Mufumo wa Nungungulu wu laha kusuhani. Loku a zilo zontlhe lezo zi humelele, a Mufumo wa Nungungulu, na Kristu kota Hosi, va ta lovisa a mifumo yontlhe leyi yinwani, khwatsi hi lezi hi zi gonzileko ka Xipimo 46.

Makunu cuwuka khwatsi a mifota yi nga ka maphajina 245 ni 246, kasi hi wulawula hi yona. A mifota leyo yi seketelwa ka bhuku ga Mateu 24:6-14 ni Luka 21:9-11. U ta wona kambe lezaku a mufota wunwe ni wunwani wu na ni nombora ya yitsongwani. A nombora leyo yi kona kambe laha kusanguleni ka nzimana leyi yi tlhamuselako a mufota lowo. Makunu zezi a hi kambisise hi wona lezaku a zilo zo tala zi yelanako ni xikombiso lexi Jesu a nga xi nyika za tatiseka inyamutlha ke.

(1) Jesu i te ngalo: ‘Mu tazwa kulwa ni wudumo ga kulwa; hakuva a tiko gi ta vukela tiko, ni mufumo wu ta vukela mufumo.’ Wa tshuka uzwa vanhu na va wulawula hi tiyimpi? — A yimpi yo sangula ya misava yontlhe yi humelele hi 1914 kala 1918. Ku lo gumesa ku humelela yinwani Yimpi ya Wumbiri ya Misava hi 1939 kala 1945. Ku wa nga se tshuka kuva ni tiyimpi ta misava yontlhe! Zezi ku na ni tiyimpi misaveni yontlhe. Zi wonekisa ku khwatsi lomu ka televizawu, lomu ka radu, ni lomu ka maphepha-hungu, siku ni siku hizwa zokari xungetano hi tiyimpi.

(2) Jesu i tlhelile a wula lezi: ‘Ku tava ni tindlala ka matshamu yo hambanahambana.’ Kuzilava wa zi tiva lezaku a hi vanhu vontlhe va nga ni zakuga zo enela. Siku ni siku kufa vanhu vo tala misaveni yontlhe hi kota ya ku vumala zakuga.

(3) Jesu i lo engeta aku: ‘Ku tava ni mitungu ka matshamu yo hambanahambana.’ Wa xi tiva ku xini a ntungu? — A ntungu mababyi ma thapelako vanhu vo tala ma tlhela ma daya. A ntungu wo kari wu vitaniwako funzeketa ga Espanya wu dele xipimo xa 20 wa timiliyoni ta vanhu hi lembe ginwe ntsena. Masikwini ya hina a vanhu vo hunza 20 wa timiliyoni kuzilava va tafa hi SIDA. Niku ku na ni kankro, mababyi ya mbilu, ni mababyi manwani ma dayako vanhu vo tala lembe ni lembe.

(4) Jesu i wulile a xipanze xinwani xa xikombiso a xikhati a ngaku: “Ku tava ni . . . kutsekatseka ka misava matshanwini ma tsalangeneko.” Wa zi tiva a ku zi wula yini a kutsekatseka ka misava? — A kutsekatseka ka misava hi loku a misava yi rurumela kutani ku kinakina lahasi. A kutala ka zikhati, ku hohloka ni tiyindlu ku tlhela kufa vanhu vo tala. Kusukela hi lembe ga 1914, lembe ni lembe ku humelela a kutsekatseka ko tala ka misava. Wa tshuka uzwa vanhu na va wulawula hi kutsekatseka ka misava? —

(5) Jesu i wulile lezaku a xipanze xinwani xa xikombiso ku wa tava ‘ku engeteleka ka kuonha.’ Hi lezo zi mahako lezaku ku hi ni vayivi vo tala ni tihanyi. Matshanwini wontlhe a vanhu va chava ku tshuka va dumelwa laha kaya kabye. Ku wa nga se tshuka kuva ni wugevenga ni tihanyi to tala misaveni yontlhe a ku fana ni nyamutlha.

(6) Jesu i lo nyika a xikombiso xa lisima nguvu a xikhati a nga wula lezi: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” (Mateu 24:14) Loku ku hi lezaku wa yi nyika lisima a “ivangeli leyi” kutani a mahungu lawa yo saseka, u fanele ku byela vanwani xungetano hi wona. Hi ndlela leyo, wenawu u tava u tatisa a xikombiso lexi.

A vanwani va wula lezaku a zilo lezi Jesu a nga zi profeta, zi sina zi maheka kusukela kale. Kanilezi, a zilo lezo zontlhe zi wa nga se tshuka zi humelela ka matshamu yo tala misaveni yontlhe hi xikhati xalexi xa xinwe. Makunu, wa zi zwisisa a ku xi wula yini a xikombiso lexi Jesu a nyikileko? — Xi wula lezaku lezi makunu hi wonako zontlhe lezi Jesu a profetileko na zi humelela, zi komba lezaku a xikhati xa ku a misava yiswa ya Nungungulu yi valeta a tiko legi ga kubiha xi laha kusuhani.

A xikhati lexi Jesu a nga nyika xikombiso lexi, i tlhelile a wulawula hi nguva yo hlawuleka ya lembe. Ite: “Khongelani lezaku a kutsutsuma ka nwina ku nga maheki hi xikhati xa xirami.” (Mateu 24:20,  NM) U alakanya lezaku i wa lava ku wula yini hi magezu lawa? —

Ka matshamu yo kari za karata ku enza hi xikhati xa xirami. Makunu, loku a wokari i wo lava ku tsutsuma khombo ga ntumbuluko hi xikhati xa xirami, zini zi nga wa ta humelela? — Kuzilava i wa ta zi kota ku tsutsuma, kanilezi zi wa ta mu karatela nguvu. Handle ko kanakana, zi wa tava zi bihile a ku a wokari a dawa hi xingulo hi ku kala a nga hatlisangi a tsutsuma hi ku vumala xikhati hi kota ya ku maha zilo zinwani, a hi zona? —

Wa zi pola lezi Jesu a nga kari a wula xungetano hi ku nga rinzeli a xikhati xa xirami kasi ku tsutsuma? — I wa wula lezaku lezi hi zi tivako ku a Har–Magedoni yi laha kusuhani ni ku chikela, a hi faneli ku hlwela ku kombisa lezaku hakunene ha mu ranza Nungungulu hi kuva hi mu tirela. Loku hi hlwela, hi nga tshuka hi celwa. Hi nga fana ni vanhu lavayani va xikhatini xa Noa lava va ngazwa lezaku a Ndambi yata, kanilezi va nga ngheni lomu tarwini.

Ka xipimo xi lanzelako, hi ta wona lezi a zilo zi to tshamisa zona anzhako ka yimpi ya hombe ya Har–Magedoni. Hi ta wona lezi Nungungulu a lavako ku mahela hontlheni, hina lava hi mu ranzako ni ku mu ingisa.