Cihlamaliso le Bimbini go Pswhuka

Zvalezvi Faro a ngazwa lezvaku a vaIzrayeli va humile lomu Gibhite, a nga tsakangi hi lezvi a nga va tsika va famba. I no laya masochwa yakwe, aku: ‘Longiselani tikareta ta mina tontlhe hi va landza! Na hi nga va tsikangi va famba’. Faro ni vanhu vakwe va no sangula ku landza vaIzrayeli.

Jehovha i wa rangela vanhu vakwe; ni mumu i wa tirisa refu, ni wusiku i wa tirisa ndzilo. I no va kongomisa Bimbini go Pswhuka, a va byela lezvaku va humula kwalaho.

A vaIzrayeli va no wona Faro ni masochwa yakwe na va va landza. Va wa hi laha cikari. Se phambeni ku wa hi ni bimbi, lendzhako ku wa hi ni masochwa ya vaGibhite. Va no rilela Mosi, vaku: ‘Hi file mayo! Hikuyini u nga hi humesa le Gibhite’? Kanilezvi Mosi i te: ‘Mu nga chavi. N’wina nyimani muku tsem, mu wona lezvi Jehovha a to hi ponisisa zvona’. Lezvo zvi komba ku Mosi i wa tsumba Jehovha hi mbilu yontlhe, a hi zvona?

Jehovha i no byela vaIzrayeli lezvaku va ti longisela kasi va suka. Ni wusiku, Jehovha i no jikisa refu giya laha cikari ka vaGibhite ni vaIzrayeli. Seno ka vaGibhite, ku wa hi munyama. Kanilezvi, seno ka vaIzrayeli ku wa wonekela.

Jehovha i no byela Mosi lezvaku a nawuluta canja gakwe hehla ka bimbi. Jehovha i no gumesa a maha lezvaku kuba moya wa hombe wusiku gontlhe. A mati ya bimbi ma no avanyeka, ku sala ndlela laha cikari. A vaIzrayeli lavo vo tala nguvhu va no tsemakanya ka misava yo woma, a mati ma wa ku khwatsi mimuru lomu matlhelweni.

A masochwa ya Faro ma no landza hi lendzhako, wonawu ma famba hi lomu ko woma. Jehovha i no guma a vanga vhilinganya ndzeni ka masochwa. A marodha ya tikareta tabye ma no sangula ku suketela, a masochwa ma banguleka, maku: ‘A hi humeni! Jehovha wa va lwela’.

Jehovha i no byela Mosi, aku: ‘Nawuluta canja ga wena hehla ka bimbi’. I no nawuluta, a mati wontlhe ma nga hi lomu matlhelweni ma tekela ku wuya hehla ka masochwa ya vaGibhite. Faro ni vanhu vakwe vontlhe va nofa. A ku ponangi ne mun’we.

Ka tlhelo le gin’wani ga bimbi, a vanhu vo tala nguvhu va no sangula ku dhumisa Nungungulu hi ku yimbelela lisimu, vaku: “[A hi yimbeleleni] ka Jehovha, hakuva i tlakusilwe nguvhu. I hoxele haxi ni mukhileli wa gona lomu bimbini”. A cikhati leci va nga kari va yimbelela, a vavasati va wo kina ni kuba mitandanda. Vontlhe va wa tsakile nguvhu hi lezvi va nga tlhatlhisilwe.