U nga zi kota ku wona Nungungulu a nga woniwiko?

“Nungungulu i Moya,” a vanhu a va zi koti ku mu wona. (Johani 4:24) Hambulezo, a Biblia gi bika lezaku a vanhu vo kari, hi ndlela yo kari, va mu wonile Nungungulu. (Maheberu 11:27) Zi kotekisa kuyini? U nga zi kota ku wona “Nungungulu loyi a nga woniwiko” hakunene? — Va Le Kolosi 1:15.

Ecanyisa a xiyimo xa hina ni xa munhu a pswalilweko na a hi xikhumu. Xana a wukhumu gakwe ga mu valela hi kumbhelela a kuzwisisa lezi zi mahekako lomu a hanyako kona? Ahihi. A gi mu valeli hi kumbhelela. A munhu a nga xikhumu i kuma mahungu hi tindlela to hambanahambana le’ti mu vunako ku tiva vanhu, zilo, ni lezi zi mahiwako lomu matlhelweni yakwe. A wanuna wo kari a nga xikhumu i ngalo: “A kuwona a ku lomu ka matihlo. Ku lomu maalakanyweni.”

Hi ndlela yo fana, hambu lezi u nga zi kotiko ku wona Nungungulu hi mahlo ya nyama, u nga mu wona hi ‘mahlo ya mbilu ya wena.’ (Va Le Efesusi 1:18) Wona tindlela tinharu ta ku maha lezo.

“MA WONEKILE MAKU DLUNYA KUSUKELA KUVANGIWENI KA MISAVA”

A kutala ka zikhati, a munhu a nga xikhumu a tindleve takwe ti ingisa nguvu niku loku a henya zilo i hatlisa ku zi tiva. Lezo zi mu vuna ku tiva zilo a nga zi woniko. Hi kufanana, u nga tirisa a matihlo ya wena kasi ku hlola zilo zi nga laha misaveni zonake u wona Nungungulu a nga woniwiko loyi a zi mahileko. “A matshamela yakwe ma nga wonekiko, . . . ma wonekile maku dlunya kusukela kuvangiweni ka misava, hakuva ma tibyiwa hi mitiro yakwe.” — Va Le Roma 1:20.

Hi xikombiso, ehleketa hi misava. A misava yi mahelwe hina na ku nga hi ntsena lezaku hi kota ku hanya, kanilezi ni ku ti buza hi wutomi. Loku hizwa zimoyana zo nanziha, hi wora masani, higa hanzu wo nanziha, kutani hizwa kuyimbelela ko rula ka zinyanyani, ha xalala. Xana a zinyikiwo lezi a zi kombi kukhatala, wunene, ni wuhana ga Muvangi wa hina?

U nga gonza yini hi Nungungulu ka lezi u zi wonako ka ntumbuluko? Xinwe xa zona, a matilo ma kombisa ntamu wa Nungungulu. Lezi a siensia yi zi kumileko zezanyana a zi kombi ntsena lezaku a wuako giya mahlweni hi ku kula, kanilezi gi kula hi kuhatlisa nguvu ku hunza kale! A xikhati lexi u cuwukako tilweni ni wusiku, ehleketa lezi: ‘Wuta hi kwihi a ntamu lowu wu rangelako kuanza ni kuhatlisa ka wuako?’ A Biblia gi hi byela lezaku a Muvangi i ni ‘ntamu wa hombe.’ (Isaya 40:26) A zivangwa za Nungungulu zi hi komba lezaku hi yena “Nyamintamu” — Loyi a nga “ni ntamu wa hombe.” — Joba 37:23.

“HI YENA A HI TIVISILEKO LEZI NUNGUNGULU A NGA ZONA”

A mamani wa vafana vambiri va nga zikhumu i ngalo: “A kuwulawula yinwe ya tindlela ta lisima nguvu ta kugonza kabye. Va byele zontlhe u zi wonako ni lezi u zi zwako, [u tlhela u] tshama na u longile ku wula xokari ni ka xihi u xi wonako lahandle ka muti. Wena u mahlo yabye.” Hi ndlela yo fana, hambu lezi ku nga ku “Nungungulu cima a nga woniwangi hi munhu,” a N’wana wa Nungungulu, Jesu, “loyi a nga xifuveni xa Dadani, hi yena a hi tivisileko lezi Nungungulu a nga zona.” (Johani 1:18) Kota xivangwa xo sangula xa Nungungulu, ni N’wana a belekilweko yece, Jesu i lo maha “mahlo” ya hina hi ku hi hlomelisa le tilweni. Hi yena xibuka xa chukwana xa mahungu ya Nungungulu a nga woniwiko.

Wona zilo zitsongwani lezi Jesu, loyi a mbhetileko malembe ya tsanza-vahlayi ni Dadani wakwe, a zi tlhamuseleko hi Nungungulu:

• Nungungulu i tira a nga karali. “Dadani wa ha tira ni lezi.” — Johani 5:17.

• Nungungulu wa tiva zilaveko za hina. “A Raru wa nwina wa zi tiva lezi mu zi vumalako, na mu nga se ku mu kombela.” — Mateu 6:8.

• Nungungulu i hi khatalela hi matsenya. A “Raru wa nwina loyi a nga le tilweni; . . . wa tsuwukisa gambo gakwe hehla ka vobiha ni ka vosaseka, a nisa vula hehla ka valulamileko ni ka va nga lulamangiko.” — Mateu 5:45.

• Nungungulu wa hi nyika lisima hi munwe munwe. “A vamanjingiri vambiri a va xaviswi hi capawu ke? Kasi lezo a nga kona ni munwe wa vona a wako hasi loku a nga zi ranzi a Dadani wa nwina. Kanilezi nwina, hambu ni misisi ya tihloko ta nwina yi hlayilwe. Hikwalaho mu nga chavi, ma va hunza nguvu a vamanjingiri vanyingi.” — Mateu 10:29-31.

MUNHU LOYI A KOMBISILEKO A NUNGUNGULU A NGA WONIWIKO

A vanhu la’va nga zikhumu a zikhati zo tala va tiva zilo hi tindlela to hambana ni ta vanhu va wonako. A munhu loyi a nga xikhumu a ngazwi nzhuti kota wutshamu ga munyama gi nga hiko na kuwoninga ka gambo, kanilezi kota wutshamu ga ku titimela ga kuvikela kuhisa ka gambo. Khwatsi hi lezi a munhu loyi a nga xikhumu a nga zi kotiko a ku wona nzhuti ge hambu kuwonekela, a hi nge zi koti a ku tiva Jehova ha hoce. Hikwalaho, Jehova i lo rumela munhu loyi a kombisileko matshamela yakwe ni wumunhu gakwe hi kumbhelela.

A munhu loye hi Jesu. (Va Le Filipi 2:7) Jesu a nga wulawulangi hi Dadani wakwe ntsena kanilezi i hi kombile kambe lezi Nungungulu a nga tshamisa zona. Filipi a mupizani wa Jesu i lo wutisa aku: “Hosi, hi wonise Dadani.” Jesu i lo mu hlamula aku: “Loyi a wonileko mina, i wonile ni Dadani.” (Johani 14:8, 9) Zini u nga zi “wonako” xungetano hi Dadani hi mitiro ya Jesu?

Jesu i wa hi munhu wa liranzo, wa kutikoramisa, ni wo tshineleleka. (Mateu 11:28-30) A wumunhu gakwe go tsakisa gi tshinetile vanhu ka yena. Jesu i wazwa kubayisa ka vanwani, niku i wa tsaka zinwe navo. (Luka 10:17, 21; Johani 11:32-35) A xikhati lexi u lerako kutani kuzwa matimu ya Jesu ya lomu ka Biblia, ma alakanyele ku khwatsi u ma wona hi mahlo. Loku u ehleketa hi lezi Jesu a nga tirisanisa zona ni vanhu, u ta gi wona khwatsi a wumunhu go saseka ga Nungungulu u tlhela u tshinela Kakwe.

PATSA ZIPANZE ZONTLHE

Xungetano hi ndlela leyi a munhu wa xikhumu a tivako zilo za tiko ha yona, a mutsali wo kari i ngalo: “A munhu a nga xikhumu i kuma mahungu hi zipanza-panzana ka zibuka zo tala (ku khumba, masema, kuzwa, ni zinwani), niku hi ndlela yo kari i patsa mahungu lawo ka wutshamu ginwe.” Hi kufanana, laha u wonako a mitiro ya kuvanga ka Nungungulu, ni laha u gonzako lezi Jesu a nga zi wula hi Dadani wakwe, ni ku kambisisa lezi Jesu a nga kombisisa zona a matshamela ya Nungungulu, u ta ma wona khwatsi a matshamela yo saseka ya Jehova. I tava wa lisine nguvu ka wena.

Joba, a hanyileko zikhatini za kale, i zi wonile khwatsi lezo. Kusanguleni i lo wulawula hi zilo a “nga zi pimiko.” (Joba 42:3) Kanilezi anzhako ko alakanyisisa khwatsi hi zilo zo hlamalisa zi vangilweko hi Nungungulu, Joba i khumbekile laha ka kuza a wula lezi: “A tindleve ta mina ti wa zwile ha wena, kanilezi makunu a mahlo ya mina ma ku wonile.” — Joba 42:5.

Zi ngava tano ka wenawu. “Loku wena u mu hlota [Jehova], u ta mu kuma.” (1 Kronekele 28:9) A Timboni ta Jehova ti ta tsakela ku ku vuna lezaku u hlota ni ku kuma Nungungulu a nga woniwiko.