MIHLAMULO YA BIBLIA

Xini xi mahako a vanhu vo tala va kholwa lezaku a zilo zi vangilwe hi Wokari?

Kwalomo ka 3.000 wa malembe ma hunzileko, a mutsali wo kari wa magezu yo sasekiselwa i tsalile lezi: ‘Nzi wumbilwe hi ndlela yo hlamalisa.’ (Tisimu 139:14) Loku u ehleketa hi lezi a miri wa nwanana wu kulisako zona, kusukela ka selula ya yitsongwani, xana a zi ku hlamalisi? A vanhu vo tala va kholwa lezaku a zilo zontlhe zi hanyako zi na ni Muvangi. — Gonza Tisimu 139:13-17; Maheberu 3:4.

Loyi a nga longisela misava lezaku zi koteka ku hanya ka yona, hi yena a nga tlhela a tumbuluxa wutomi kambe. (Tisimu 36:9) I wulawulile ni vanhu a tlhela a hi byela zokari xungetano hi yena. — Gonza Isaya 45:18.

Xana hina vanhu hi tumbulukele ka zihari?

Hi tindlela to tala, a miri wa hina wa fana ni wa zihari. Zi tano hakuva a Muvangi wa zona i mahile a vanhu ni zihari kasi zi hanya laha misaveni. I vangile vanhu hi ntshuri wa misava, na ku nga hi hi zihari. — Gonza Genesisi 1:24; 2:7.

A vanhu va hambene ni zihari hi zilo zimbiri za lisima nguvu. Xo sangula, a vanhu va zi kota ku kombisa xichawo, ku ranza, ni ku tiva a Muvangi wabye. Xa wumbiri, a zihari a zi mahelwangi ku hanya kala kupinzuka, sine vanhu. Kanilezi ka xikhati lexi, a vanhu va thapelwe hi kufa hakuva a vanhu vo sangula va tsikile ku lanzela a zileletelo za Muvangi wa hina. — Gonza Genesisi 1:27; 2:15-17.