MIHLAMULO YA BIBLIA

Ku tava ni wutomi ginwani ahandle ka legi?

Wa tshuka u ti wutisa lezaku xana ku na ni xinwani hi nga xi mahako kuhanyeni ahandle ka ku hlakana, ku chada, ku hlayisa ngango, ni ku khosahala? (Joba 14:1, 2) A Biblia gi komba lezaku hambu a vanhu vo tala vo tlhariha nguvu va ti wutisa xungetano hi lezo. — Gonza Mutshawuteli 2:11.

Xana xi kona hi xi hanyelako? Xo sangula, hi fanele ku ti wutisa lezi: Kasi a wutomi gi sangulisile kuyini? Anzhako ka ku kambisisa lezi a wongo ga hina ni ziro lezi zinwani za miri wa hina zi nga mahiswa zona, a vanhu vo tala va chikelela magumo ya lezaku a Muvangi wa wutlhari hi yena a nga hi maha. (Gonza Tisimu 139:14.) Loku zi hi tano, i hi mahile hi xigelo xo kari! A ku tiva xigelo lexo zi nga hi vuna ku zwisisa lexi hi hanyelako xona.

Hikuyini a vanhu va vangilweko?

Nungungulu i lo katekisa a patswa wa vanhu vo sangula a tlhela a va nyika ntiro wo tsakisa nguvu. A kungo gakwe ku wa hi ku va tata misaveni va yi maha paradise, va tlhela va hanya kala kupinzuka. — Gonza Genesisi 1:28, 31.

A xikhati lexi a vanhu va nga hluwukela a mafumela ya Nungungulu, a kungo gakwe gi lo thindiwa. Kanilezi, Nungungulu a nga hi tsukulangi — niku a nga cicangi kungo gakwe hi hina ni misava. A Biblia gi hi tiyisekisa lezaku Nungungulu i kari a maha xo kari kasi ku ponisa vanhu vo tsumbeka ni lezaku a kungo gakwe xungetano hi misava gi ta tatiseka! Hikwalaho, Nungungulu i lava lezaku u ti buza hi wutomi legi a nga gi lava le kusanguleni! (Gonza Tisimu 37:29.) Gonza lomu ka Biblia, u tiva lezi wena wutsumbu u nga vunekisako zona hi kungo ga Nungungulu.