MIHLAMULO YA BIBLIA
Xana hi ta tshuka hiva ni mufumo wunwe lowu wu to fumela a misava yontlhe?
A mufumo wa misava yontlhe wu nga zi kotisa kuyini ku tlhanganyisa vanhu va matiko wontlhe ke? Isaya 32:1, 17; 54:13
Hi nga alakanyela lezi a mufumo wa misava yontlhe wu nga wa ta va vunisa zona vanhu! Inyamutlha, a vanhu vo tala va xaniseka hi kota ya lezi va nga zisiwana nguvu, kasi lezo a vanwani va ganyile nguvu. Kanilezi, a mufumo wa misava yontlhe wa ku zwela wusiwana wu wa ta maha lezaku vontlhe va kuma lezi zi lavekako kabye. Xana u alakanya lezaku a vanhu va ta tshuka va yimisa a mufumo lowo? — Gonza Jeremia 10:23.
A matimu ma komba lezaku a mifumo yi tsanzekile ku khatalela a vafumelwi va yona hi tindlela to hambanahambana, nguvunguvu a zisiwana. A mifumo yo kari yi na ni tihanyi. (Mutshawuteli 4:1; 8:9) Kanilezi, Nungungulu wa Ntamu-wontlhe i tsumbisile ku valeta mifumo yontlhe leyi yinwani. A Hosi ya wona yi ta va khatalela khwatsi a vanhu. — Gonza Isaya 11:4; Danieli 2:44.
Zini lezi a Mufumo wa Nungungulu wu to zi maha?
Jehova Nungungulu i hlawulile a Hosi yi ringanelwako ya misava yontlhe — ku nga N’wana wakwe, Jesu. (Luka 1:31-33) Kota munhu laha misaveni, Jesu i wa zi tsakela ku vuna vanhu. Kota Hosi, i ta tlhanganyisa vanhu va matiko wontlhe a tlhela a va tlhatlhisa kuxanisekeni kontlhe. — Gonza Tisimu 72:8, 12-14.
Xana vontlhe va ta vumela Jesu kota Hosi? Ahihi. Kanilezi, Jehova i na ni lihlaza-mbilu. (2 Pedro 3:9) I nyika vanhu a lungelo ga ku vumela Jesu kota Hosi. Lokuloku, Jesu i ta tlhatlhisa a misava ka vanhu vo biha, niku i ta yimisa a kurula ni kuhlayiseka misaveni yontlhe. — Gonza Mika 4:3, 4.