ZIWUTISO ZA VAGONZI

Zini zi nga mahiwako kasi ku vuna vamakabye va vangelwako zikarato hi masema?

Ni wihi loyi a masema ma mu vangelako zikarato i lwisana ni xikarato xo nonoha. Kuzilava zitsongwani zaku a nga maha kasi ku potsa masema kutirisaneni kakwe ka siku ni siku ni vanhu a nga va tiviko. Hambulezo, a vokari va tshuka va wutisa lezaku zi nga koteka ku kombela vamakabye lezaku va nga tirisi tiperfume mitlhanganweni ya bandla, ya xipanze ni migotsovanyanweni ke.

Kunene, a ku na muKristu a nga ta lava ku karatisela munwani kuta mitlhanganweni ya wuKristu ha womu. Hontlheni ha zi lava ku tiyisiwa hi mitlhangano ya hina. (Maheb. 10:24, 25) Hikwalaho, ni wihi loyi a xaniswako nguvu hi masema laha ka kuza zi mu tsanzekisa kuta mitlhanganweni, a nga ha tsakela ku bhula hi zona ni madota. Zi wa nga ta zwanana ni Mitsalo hambu kuva zi nene ku yimisa milayo xungetano hi kutiriswa ka tiperfume hi lava va tako mitlhanganweni, hambulezo a madota ma nga ha nyika mitlhamuselo yi to vuna a ziro za bandla lezaku zi zwisisa a xikarato lexi a vanwani va kumanako naxo. Hi kuya hi xiyimo xa kona, a madota ma nga ha boha ku wulawula hi mahungu ma sinako ma humesilwe mabhukwini ya hina ka xipanze xa zilaveko za bandla Mutlhanganweni wa Ntiro, kutani va nga ha hlawula ku maha xitiviso xa wutlhari hi mhaka leyo.a Hambulezo, a ma faneli ku tshama hi ku maha zitiviso za tshamela lego. Xontlhe xikhati ku tava ni vanhu vaswa ni vapfhumba mitlhanganweni ya hina lava va kalako va nga xi tivi xikarato lexo, niku a hi lavi ku va maha va tizwa nanzu. A hi lavi ku maha munhu a tizwa nanzu hi kuva a tirisile perfume hi ndlela yo ringanisela.

Loku va hi kona va nga ni xikarato lexo ni loku a wutshamu gi hi kona, a hubye ya madota yi nga ha va lavela wutshanwana ga vona voce kwalomu Salawini ya Mufumo. Hi xikombiso, kuzilava ku na ni sala yinwani yi nga ni pfumawulo leyi va nga tshamako ka yona va vunekawu hi mitlhangano. Loku zi karata ku tlhatlha xikarato lexi hi ndlela leyo ni loku a vokari va simama ku xaniseka nguvu, a bandla gi nga ha va thepela a mitlhangano kutani ku maha malulamiselo ya ku va ingiselisa mitlhangano hi ku tirisa telefone na va hi kaya, a ku fana ni lezi zi mahelwako vanwani va nga zi kotiko ku suka laha mutini.

Hi fanele ku chela nguvu kota kambe hi mhaka leyi a xikhati hi yako ka migotsovanyano ya muganga. Kota lezi a migotsovanyano yo tala yi mahiwako ka matshamu yo valeka ma nga ni michini ya ku buvetela moya, ni lezi a kutala ka zikhati zi kalako zi nga koteki ku siya matshamu yo kala masema ka mitlhangano leyo, hi nga kombisa liranzo hi ku nga tirisi tiperfume ta masema yo tlhava nguvu. Kanilezi, lowu a hi nayo wa ku beletela ku tirisa tiperfume mitlhanganweni ya bandla niku a zi faneli ku woniswa lezo.

Na ha ha hanya tikweni legi, hontlheni ha xaniseka hi kota ya kungambheleli loku hi thapelisilweko. A ho ku bonga a kutikarata loku a vanwani va ku mahako kasi ku hi tlhatlhisa ka kuxaniseka ka hina! A vokari zi nga ha va karatela nguvu ku nga tirisi perfume kasi ku maha lezaku a makabye munwani zi mu olovela kuta mitlhanganweni ya wuKristu. Hambulezo, a liranzo li nga ha hi kuca ku maha lezo.

Xana a matimu ya tiko ma seketela a kuvakona ka Pontiu Pilatu?

Pontiu Pilatu wa tiviwa hi vagonzi va Biblia hi kota ya xipanze xakwe kulamulweni ni kudaweni ka Jesu. (Mat. 27:1, 2, 24-26) Hambulezo, a vito gakwe ga kumeka makhati yo tala kambe ka matimu manwani ya xikhatini xalexo. Hi kuya hi The Anchor Bible Dictionary, a matimu ya tiko ma wulawulako hi yena ma “tele nguvu ma tlhela ma hi ni mitlhamuselo yo tala ku hunza ya ni yihi hosi yinwani ya Judia ya muRoma.”

A vito ga Pilatu gi kumeka nguvu ka mabhuku ya mutsali wa matimu wa muJuda Josephus, loyi a xaxametileko zimaho zinharu zi yelanako hi zikarato lezi Pilatu a kumeneko nazo na a fumela Judia. A ximaho xa wumune xi engetelwe hi Philo, a mutsali munwani wa matimu wa muJuda. A mutsali wa muRoma Tacitus, loyi a nga tsala a matimu ya tihosi ta Roma, i lo tiyisa lezaku Pontiu Pilatu i layile lezaku Jesu a dawa xikhatini xa kufuma ka Tiberiusi.

Hi 1961, a vavevuleli va zilo za kale va nga tira laha ku nga hi wutshamu ga mihlakano ya Roma le Kesaria, Israeli, va lo kuma ribye gi nga tsalilwe giku dlunya a vito ga Pilatu hi xiLatini. Ku no kumiwa xipalavati ntsena xa mutsalo lowo (wu kombisiwako laha) kanilezi ku alakanyelwa lezaku na wa ha enela wu waku: “Tiberieu Pontiu Pilatu (loyi), Mwamangulu wa Judia, i wa yi hendleletile ka vanungungulu vo chaveka.” A yindlu leyi yi nga wuliwa kuzilava yi wa hi tempeli yi nga dzunza Tiberiusi, a Mufumeli wa Roma.

Xana a muhuweleli wa xisati wa Mufumo i fanele ku fenengeta hloko loku a fambisa xigonzo xa Biblia na ku hi ni muhuweleli wa xinuna ke?

Ka nzima yo kari ya “Ziwutiso za vagonzi” yi humesilweko ka Murinzeli wa 15 ka Julho wa 2002 (hi xiPutukezi), ku wa wulilwe lezaku a makabye wa xisati i fanele ku fenengeta hloko yakwe loku a fambisa a xigonzo xa Biblia na ku hi ni muhuweleli wa xinuna a bapatizilweko kutani a nga bapatizwangiko. Anzhako ka ku ehleketisisa hi mhaka leyi ku wonekile lezaku za ringana ku xi cicanyana xileletelo lexi.

Loku a muhuweleli wa xinuna loyi a nga zinwe ni makabye loye wa xisati a xikhati a fambisako xigonzo xa Biblia a bapatizilwe, a makabye wa xisati i fanele ku fenengeta hloko hakunene. Hi ndlela leyo, i kombisa xichawo hi lulamiselo ga Jehova ga wuhloko lomu bandleni ga wuKristu hakuva i maha ntiro lowu hi nayo wu nga wa makabye wa xinuna. (1 Kor. 11:5, 6, 10) Loku lezo zi nga koteki, a nga ha kombela makabye loye wa xinuna lezaku a fambisa xigonzo lexo loku a ringanelwa ni loku a zi kota ku maha lezo.

Kanilezi, loku a makabye wa xisati a hi zinwe ni muhuweleli wa xinuna a nga bapatizwangiko loyi a nga hiko nuna wakwe, hi kuya hi Mitsalo a nga kurumetwi ku fenengeta hloko. Hambulezo, a tivalo ta vamakabye vo kari va xisati ti nga ha va kuca ku fenengeta hloko hambu ka ziyimo lezo.