MIHLAMULO YA BIBLIA
Hikuyini hi faneleko ku alakanya a kufa ka Jesu?
Zini zi to koteka xikhatini xi tako hi kota ya kufa ka Jesu? — Isaya 25:8; 33:24
A kufa ka Jesu kuve ximaho xa lisima nguvu matinwini — i file kasi a vanhu va kuma wutomi legi va nga fanele kuva nago. A vanhu va wa nga mahelwangi a ku va byekelela ku maha zilo zo biha, ku babya, kutani kufa. (Genesisi 1:31) Kanilezi, a xionho xi nghenile misaveni hi munhu wo sangula, Adamu. Jesu i nyikele wutomi gakwe kasi ku hi tlhatlhisa ka xionho ni kufa. — Gonza Mateu 20:28; Va Le Roma 6:23.
Nungungulu i kombisile liranzo lakwe la hombe hi ku rumela N’wana wakwe laha misaveni kasi a ta hi fela. (1 Johani 4:9, 10) Jesu i lo byela a valanzeli vakwe lezaku va alakanya a kufa kakwe hi ku maha zilo za zitsongwani ni zo olova, zi patsako xibaba ni vinya. A ku maha lezo lembe ni lembe zi komba lezaku ha bonga a liranzo leli hi kombisilweko hi Nungungulu na Jesu. — Gonza Luka 22:19, 20.
Hi vamani va faneleko kuga xibaba ni kunwa vinya?
A xikhati lexi Jesu a nga byela a vapizani vakwe hi khati go sangula lezaku va alakanya kufa kakwe, i wulawulile hi xivumelwano, kutani zwanano wo kari. (Mateu 26:26-28) Lezo zi lo vulula ndlela ya lezaku vona ni ntsengo wutsongwani wa vanhu va rinzela kuva tihosi ni vapristi zinwe na Jesu le tilweni. Hambu lezi a vanhu va timiliyoni va alakanyako a kufa ka Jesu, ntsena lava va nga ka xivumelwano lexo hi vona va gako xibaba ni kunwa a vinya. — Gonza Kuvululelwa 5:10.
Hi xipimo xa 2.000 wa malembe, Jehova i kari a hlawula a vanhu lavo va tova tihosi. (Luka 12:32) A ntsengo wabye wu tsongwani nguvu loku wu ringaniswa ni lava va to hanya kala kupinzuka laha misaveni. — Gonza Kuvululelwa 7:4, 9, 17.