‘U ranza ku maha lezo’

1. Xini xi nga khumba Jesu laha ka kuza a “tsaka hi moya wa ku basa”? (Wona mufota laha hehla.)

HI NGA alakanyela lezi u nga tava u ti zwisile zona loku u wa no wona Jesu na a “tsaka hi moya wa ku basa”! Kuzilava u nga ha mu alakanyela na a nwayitela a tlhela aku ngeru-ngeru matihlo hi kutsaka. Xini xi nga mu nyikile litsako lontlhe lelo? I wa rumele 70 wa vapizani vakwe lezaku va ya xumayela a mahungu yo saseka ya Mufumo wa Nungungulu. I wa khatala nguvu hi lezi va nga wa ta mahisa zona ntiro lowo. Ku wa hi ni valala vo tala va hombe va mahungu yo saseka, vo kota a vatsali ni vaFarisi va gonzileko lava va nga hi ni mano yo tala. Va wa kucetela votala lezaku va wona Jesu kota muvatli ntsena; a vapizani vakwe va va wona kota ‘vanhu va nga gonzangiko, va nga vanhu ntsena.’ (Miti. 4:13; Mar. 6:3) Hambulezo, a vapizani va lo wuya na va xalele nguvu. Va wa xumayele khwatsi; hambu ni madimoni ma wa nga zi kotangi ku va valela! Xini xi nga va nyika litsako ni kutiya-hlana? — Gonza Luka 10:1, 17-21.

2. a) A vapizani va Jesu va wa fana ni vanana hi ndlela muni? b) Xini xi vunileko a valanzeli va Kristu lezaku va zwisisa lisine la moya?

² Wona lezaku Jesu i byelile Jehova aku: “Nza ku khesa Dada, Hosi ya tilo ni misava, hi lezi u nga fihlela a titlhari ni vapimako a timhaka leti, kanilezi u zi wonekelisa ka lava va tsongwani. Ina, Dada, hakuva lezo zi wa sasekile mahlweni ka wena.” (Mat. 11:25, 26) Kunene, Jesu i wa nga wuli lezaku a vapizani vakwe va wa hi vanana hi tanga. Kanilezi, i wa zi tiva lezaku va wa wonekisa ku khwatsi i vanana loku va ecanyiswa ni vanhu va pimako ni va gonzileko, lava va nga ti wona va hi vanhu vo tlhariha. A ku tsika zontlhe lezo, Jesu i wa gonzisa valanzeli vakwe lezaku va fana ni vanana, va simama ku ti koramisa ni ku vumela ku gonziswa. (Mat. 18:1-4) Va vunekisile kuyini hi ku ti koramisa? Jehova i lo va vuna hi ku tirisa moya wa ku basa lezaku va zwisisa lisine la moya kuveni a vatlharihileko ni vapimako, lava va nga va chepeta, va lo simama va pfhupeliswa hi Satani ni matshanza ya vona wutsumbu.

3. Zini hi to wulawula hi zona ka nzima leyi?

³ Handle ko kanakana Jesu i wa xalele! A ku wona ndlela leyi Jehova a tlhamuseleko ha yona a lisine la moya ka vanhu va tixaka tontlhe ni vo ti koramisa, na ku nga khataliseki a gonziselelo yabye kutani wutivi ga mabeleko zi mu mahile a tsaka. I wa tsaka hi lezi a Dadani wakwe a nga ranza ndlela leyi ya kugonzisa. Xana Jehova i cicile? Ne ni kutsongwani! I zi kombisisa kuyini lezaku wa simama ku ranza a magonzisela lawa ke? A ku kambisisa a hlamulo wa xiwutiso lexi zi nga hi nehela litsako la hombe a ku fana na Jesu.

A VANHU VONTLHE VA TLHAMUSELWA A LISINE

4. A Murinzeli wo hehuka i kombisile kuyini lezaku xinyikiwo xa liranzo?

⁴ Ka malembana lawa, a gonziselelo ya hlengeletano ya Jehova yi kombisa kukhatala ka hombe hi kuolova ni kudlunyateka. Wona zikombiso zinharu. Xo sangula, ku na ni Murinzeli wo hehuka.a A wugandli legi ga Murinzeli gi woneka na gi hi xinyikiwo xa liranzo ka lava va gonzako lirimi kutani zi va karatelako ku lera. A tihloko ta mingango ta zi wona lezaku a vana va tona va patseka nguvu makunu xigonzweni xa revista legi, gi nga gona mbita-tshinya ya longoloko wa hina wa zakuga za moya. A votala va tsala mapapilo ya kubonga ku humako mbilwini. A makabye wo kari wa xisati i tsalile lezaku i wa chava ku nyika mihlamulo Xigonzweni xa Murinzeli. I ngalo: “Nzi wa nga vululi nomu.” Hambulezo, a nga ha mahi! Anzhako ka ku tirisa a Murinzeli wo hehuka, i lo tsala lezi: “Zalezi nzi hlamula kumbiri-kunharu kutani ku hunza, niku a nza ha chavi! Nzi bonga Jehova na nwina.”

5. Hi wahi mabhinzu yo kari ya wugandli gi chukwatisilweko ga Tradução do Novo Mundo das Escrituras Sagradas hi xiNgiza?

⁵ Xa wumbiri, ku na ni wugandli gi chukwatisilweko ga Tradução do Novo Mundo das Escrituras Sagradas gi humesilweko hi xiNgiza ka mutlhangano wa lembe hi 5 ka Outubro wa 2013.b Zalezi a Mitsalo yo tala yi na ni magezu matsongwani, kanilezi a mongo wa kona a wu cicangi niku wu engetele ku dlunyateka. Hi xikombiso Joba 10:1 i wa hi ni 27 wa magezu, zalezi i na ni 19; Mavingu 8:6 i wa hi ni 20, zalezi i na ni 13. A mavesi lawa hi wumbiri ga wona ma dlunyateka ka wugandli legi ga giswa. A makabye wo kari a totilweko loyi a tireleko Jehova hi kutsumbeka hi makume ya malembe i te ngalo: “Nza ha hi ku lera a bhuku ga Joba ka wugandli legi ga giswa, niku zo khwatsi i khati go sangula nzi gi zwisisako!” A votala va wula zezo.

6. U ti zwisa kuyini hi kuzwisisa ku chukwatisilweko ka bhuku ga Mateu 24:45-47?

⁶ Xa wunharu, ehleketa hi zilo zo kari zi chukwatisilweko ka malembana lawa. Hi xikombiso, a kuzwisisa ka hina ku chukwatisilweko xungetano hi “nanza gi tsumbekileko ni go tlhariha,” loku ku humesilweko ka Murinzeli wa 15 ka Julho wa 2013 ku hi tsakisile nguvu. (Mat. 24:45-47) Ku tlhamuselwe lezaku a nanza gi tsumbekileko i Hubye yi Fumako, kasi a “malanza” hi vontlhe lava va gisiwako hi tlhelo ga moya, kani hi vatotilweko kani va “tiyivu tinwani.” (Joh. 10:16) A zo ku tsakisa ku gonza a lisine lelo ni ku li gonzisa vanwani! Hi tihi tindlela tinwani leti Jehova a kombako hi tona lezaku wa xalala hi gonziselelo yo olova ni yo dlunyateka?

TLHAMUSELO WO OLOVA NI WO DLUNYATEKA WA MATIMU YA BIBLIA

7, 8. Hi zihi zikombiso zo kari za matimu ya Biblia ma nga yimela zilo za hombe za xikhati xi nga hata ke?

⁷ Loku ku hi lezaku u na ni makume ya malembe na u tirela Jehova, kuzilava u zi wonile lezaku a mabhuku ya hina ma cicile hi kutsongwani-kutsongwani ka lezi ma tlhamuselisako zona a matimu yo tala ya Biblia. Hi ndlela muni? A kale, a mabhuku ya hina ma wa tolovela nguvu ku wula lezaku a matimu yo kari ya Biblia ma wa yimela zilo za hombe za xikhati xi nga ha tako. Xana ku na ni xiseketelo xa Mitsalo xa ku maha lezo? Ina. Hi xikombiso, Jesu i wulawulile hi “xiwoniso xa muprofeti Jona.” (Gonza Mateu 12:39, 40.) Jesu i lo tlhamusela lezaku a xikhati lexi Jona a nga xi mbheta lomu nzeni ka hlavi — leyi yi nga wa tava xilahla xa Jona loku Jehova i wa nga mu ponisangi — xi wa hi xiprofeto xa xikhati lexi Jesu wutsumbu a nga wa ta xi mbheta xilahleni.

⁸ A Biblia gi na ni matimu manwani ya ziprofeto. Mupostoli Paule i wulawulile hi yokari ya wona. Hi xikombiso, a wuxaka ga Abrahama na Hagari zinwe na Sara gi wa yimela wuxaka ga Jehova ni tiko ga Israeli zinwe ni xipanze xa le tilweni xa hlengeletano ya Nungungulu. (Gal. 4:22-26) A tabernakeli ni tempeli, a Siku ga Nzhiho, mupristi wa hombe ni zilo zinwani nayweni wa Mosi zonawu zi wa hi ni “xiruti . . . xa zilo zo saseka” lezi zi nga hata. (Maheb. 9:23-25, 10:1) Za tsakisa zi tlhela zi tiyisa hlana a ku gonza matimu lawo ya ziprofeto. Kanilezi xana lezo zi wula ku ni wihi munhu, ximaho, kutani nchumu wu kumbukiwako lomu ka Biblia wu wa yimela munhu kutani nchumu wunwani wa xikhati xi nga hata ke?

9. A matimu ya Nabote lomu ka Biblia ma wa tlhamuseliswa kuyini kale?

⁹ A kale, hi wa tolovela ku wula lezo. Hi xikombiso, ehleketa hi matimu ya Nabote, loyi a nga lamulwa a tlhela a dawa na a nga hi na nanzu hi kulaya ka Muzinza Jezebeli kasi a nuna wakwe Ahabi a sala ni xivina xa Nabote. (1 Tih. 21:1-16) Hi 1932, a matimu lawo ma lo tlhamuselwa kota ximaho xa wuprofeti. Ahabi na Jezebeli va wa wuliwa lezaku va yimela Satani ni hlengeletano yakwe; Nabote i wa yimela Jesu; a kufa ka Nabote ku wa yimela a kudawa ka Jesu. Kanilezi, anzhako ka makume ya malembe, a bhuku “Santificado Seja o Teu Nome,” gi humesilweko hi 1961, gi lo wula lezaku Nabote i yimela vatotilweko, kasi Jezebeli i wa yimela a wuKristu ga mawunwa. Hi ndlela leyo, a kuxaniswa ka Nabote mandleni ya Jezebeli ku wa yimela a kuxaniswa ka vatotilweko masikwini yo gumesa. Hi malembe, a vanhu va Jehova va wa tiyiswa hlana hi tlhamuselo wa tshamela legi wa matimu ya Biblia. Makunu hikuyini a zilo zi cicileko?

10. a) A wutlhari gi maha lezaku a nanza gi ti wonela nguvu loku gi tlhamusela a matimu ya Biblia hi ndlela muni? b) A mabhuku ya hina ma rangisa yini nyamutlha?

¹⁰ Kota lezi hi zi wonako, hi kufamba ka malembe Jehova i vuna a “nanza gi tsumbekileko ni go tlhariha” lezaku gi engetela ku tlhariha. A wutlhari lego gi maha lezaku a nanza gi ti wonela nguvu mhakeni ya ku wula lezaku a matimu yo kari ya Biblia xiprofeto xa zilo zinwani ahandle ka loku ku hi ni xigelo xo dlunyateka xa Mitsalo xa ku maha lezo. Tlhatakumbiri, ku polilwe lezaku a mitlhamuselo yo kari ya kale xungetano hi kuva a matimu ya Biblia ma yimela zilo zinwani za hombe ya karata nguvu ku yi zwisisa. A zipanza-panzana za tigonzo leto — zo kota ku himani a yimelako mani niku hikuyini — zi nga ha karata ku zi zwisisa, ku zi alakanya, ni ku zi tirisa. Hambulezo, a xa hombe hi lezaku a zigonzo zo kongoma ni za mahanyela za matimu ya Biblia ka mitlhamuselo leyo za tshuka zi fihlala kutani ku lahleka hi ku zama ku lava a kutatiseka ka wona masikwini ya hina. Hikwalaho, a mabhuku ya hina nyamutlha ma rangisa nguvu a zigonzo zo kongoma ni zo olova xungetano hi kukholwa, kutimisela, kuhiseka, ni matshamela manwani hi ma gonzako ka matimu ya Biblia.c

11. a) Hi ma zwisisisa kuyini a matimu ya Nabote zalezi, niku hikuyini a xikombiso xakwe xi hi khumbako hontlheni? b) Hikuyini a mabhuku ya hina ma kalako ma nga ha toloveli ku tlhamusela matimu ya Biblia kota ziprofeto za xikhati xi nga hata ke? (Wona “Ziwutiso za vagonzi” ka revista galegi.)

¹¹ Makunu, a matimu ya Nabote hi ma zwisisisa kuyini zalezi? Hi ma zwisisa hi magezu matsongwani ni yo dlunyateka. A wanuna loyi wo lulama a nga fangi hi kota ya kuva a yimela Jesu kutani vatotilweko, kanilezi i file hi kuva munhu wo tsumbeka. I lo khomelela ka Nayo wa Jehova hambu ka xiyimo xo nonoha, laha a tihosi ti nga tirisa ntamu wa tona hi ndlela ya hava. (Mitse. 36:7; 1 Tih. 21:3) Hi ndlela leyo, a xikombiso xakwe xa hi khumba hakuva ni wihi ka hina a nga ha xaniswa hi zigelo zo fana ni zalezo. (Gonza 2 Timote 3:12.) A vanhu va midawuko yontlhe va tekela ku zwisisa, va alakanya, va tlhela va tirisa a xigonzo lexo xi tiyisako kukholwa.

12. a) Magumo muni hi nga faneliko ku ma chikelela xungetano hi matimu ya Biblia? b) Hikuyini hi zi kotako kuva ni mitlhamuselo yo dlunyateka hambu ka zilo zo eta? (Wona a tlhamuselo wa lahasi.)

¹² Zi wula lezaku a matimu ya Biblia mo nyika zigonzo ntsena, a ma na tlhamuselo wunwani ke? Ahihi. Nyamutlha a mabhuku ya hina ma tolovela ku gonzisa lezaku a nchumu wo kari wa hi alakanyisa kutani ku tira kota mufananiso wa nchumu wunwani. A ma tali ku tirisa matimu yo hambanahambana ya Biblia kasi ku nyika mitlhamuselo yo karata ya zilo ma yimelako zona. Hi xikombiso, hi nga wula hi kufaneleko lezaku a kutsumbeka ka Nabote laha a nga xaniswa ni ku dawa ku hi alakanyisa a kutsumbeka ka Kristu ni ka vatotilweko. Kanilezi, a matimu lawo ma tlhela ma hi alakanyisa a kutsumbeka ka votala ntlaweni wa “tiyivu tinwani” ta Hosi. A kufananisa loko ko olova ni ko dlunyateka ku komba khwatsi a magonzisela yo olova ya Nungungulu.d

TLHAMUSELO WO OLOVA WA MIFANANISO YA JESU

13. Zikombiso muni zi kombako lezaku zalezi hi tlhamusela mifananiso ya Jesu hi ndlela yo olova ni yo dlunyateka?

¹³ Jesu Kristu ive mugonzisi wa hombe ka vontlhe misaveni. A yinwe ya tindlela leti a nga gonzisa hi tona ku wa hi ku tirisa mifananiso. (Mat. 13:34) A mifananiso yi khoma zi tiya lomu hlokweni yi tlhela yi khumba mbilu. Xana a mabhuku ya hina wonawo ma tlhamusela a mifananiso ya Jesu hi ndlela yo olova ni yo dlunyateka? Ina! Xana a hi tsakangi hi ku kuma kuzwisisa ko dlunyateka ka mifananiso ya Jesu xungetano hi comelo, mbewu ya xinapi ni likoka ka Murinzeli wa 15 ka Dezembro wa 2014 ke? Zalezi ha zi zwisisa khwatsi lezaku a mifananiso leyi yi wulawula hi Mufumo wa Nungungulu ni kuhumelela ka wona kuhlengeleteni ka valanzeli va Kristu tikweni legi go biha.

14. a) Hi wu tlhamuselisa kuyini a mufananiso wa muSamaria wa mu nene? b) Hi zwisisa yini ka mufananiso wa Jesu nyamutlha?

¹⁴ Ahati a matimu kutani mifananiso yi nga ni mahungu yo tala leyi Jesu a yi hlawuteleko ke? Kunene a yokari zikombiso ni ziprofeto; a yinwani yi nyika zigonzo zi vunako. Kanilezi hi nga zi tivisa kuyini lezaku lowu xiprofeto, lowu a hi xona ke? A hlamulo wu wonekile hi kutsongwani-kutsongwani kufambeni ka malembe. Hi xikombiso, ehleketa hi lezi hi tlhamuselisako zona a mufananiso wa Jesu wa muSamaria wa mu nene. (Luka 10:30-37) Hi 1924, A Murinzeli (The Watch Tower) i wulile lezaku a muSamaria i wa yimela Jesu; a ndlela yo suka hi Jerusalema yiya Jeriko, leyi yi nga hi nzhelelo, yi wa yimela a kurelela ka mahanyela ya vanhu kubiheni kusukela wuhluwukeni ga le Edeni; a zigevenga zi wa yimela tikoponi ta hombe ni vamahi va mabhinzu va vaxololi; a mupristi ni muLevi va wa yimela tihlengeletano ta wukhongeli. Nyamutlha, a mabhuku ya hina ma tirisa mufananiso lowu kasi ku alakanyisa maKristu wontlhe lezaku a ma faneli kuva ni xihlawulela loku ma nyika xivuno lava va nga ni xilaveko, nguvunguvu hi tlhelo ga moya. Xana a zi hi tsakisi a ku wona lezaku Jehova i maha gonziselelo yakwe yi dlunyateka ka hina ke?

15. Zini hi to wulawula hi zona ka nzima yi lanzelako?

¹⁵ Ka nzima yi lanzelako, hi ta wulawula hi mufananiso wunwani wa Jesu — wu nga lowu wa khume ga vanhwana. (Mat. 25:1-13) Jesu i wa lava lezaku a valanzeli vakwe masikwini yo gumesa va zwisisa yini ka mufananiso lowu? I wa lava lezaku va wu wona kota xiprofeto, na wu hi ni tlhamuselo wo fananisa wu yimelako munhu, nchumu, kutani ximaho xo kari ke? Kutani i wa lava lezaku a valanzeli vakwe va wu tirisa kota xigonzo xi nene kasi ku va rangela masikwini yo gumesa? A hi zi woneni.