MIHLAMULO YA BIBLIA
Zini u faneleko ku maha kasi uva mupswali wa mu nene?
Wa gonzisa n’wana wa wena lezaku a ranza Nungungulu?
A muti lowu a vapswali va kona va ranzanako ni ku kombisana xichawo, wutshamu ga gi nene nguvu ga ku wundla vana. (Va Le Kolosi 3:14, 19) A vapswali va va nene va ranza vana vabye va tlhela va va dzunza, a ku fana ni lezi Jehova Nungungulu a nga dzunza N’wana wakwe. — Gonza Mateu 3:17.
A Dadani wa hina wa le tilweni wa ingisela a malanza yakwe, a tlhela a chela kota hi lezi ma ti zwisako zona. A vapswali va maha khwatsi hi ku mu pimanyisa hi kuva va ingisela lezi a vana vabye va nga nazo. (Jakobe 1:19) Va fanele ku zwisisa a kutizwa ka vana vabye, a ku patsa ni magezu yabye yo khwatsi ku byabyatsa. — Gonza Mitsengo 11:11, 15.
U nga maha yini kasi a vana va wena va kula na va tiva?
Kota mupswali, hi wena u nga ni fanelo ya ku yimisa milayo kutani zileletelo laha kaya. (Va Le Efesusi 6:1) Gonza hi xikombiso xa Nungungulu. I kombisa liranzo ka vana vakwe hi ku yimisa milayo yo kongoma ni ku komba wuyelo ga ku nga yi ingisi. (Genesisi 3:3) Kanilezi, wutshanwini ga ku kurumeta vanhu lezaku va mu ingisa, i va gonzisa lezi va nga vunekisako zona hi ku maha za zi nene. — Gonza Isaya 48:18, 19.
A kungo ga wena, gi fanele kuva ga ku vuna vana va wena lezaku va ranza Nungungulu. Va ta tiva ku maha zilo za zi nene hambu loku va hi voce. Khwatsi hi lezi Nungungulu a gonzisako hi xikombiso xakwe, gonzisa vana va wena lezaku va ranza Nungungulu hi xikombiso xa wena. — Gonza Deuteronome 6:5-7; Va Le Efesusi 4:32; 5:1.