A Hi Chaveleleni Lava Va Rilako
1. Hikuyini lava va rilako va fanele ku chavelelwa?
1 Za bayisa nguvu a ku felwa hi munhu u mu ranzako, nguvunguvu ka lava va nga hiko na kutsumba ka Mufumo. (1 Tes. 4:13) Zikhati zinyingi a vanhu vo tala va ti wutisa: ‘Hikuyini a vanhu va fako? Zini zi va humelelako loku vafa? Xana nzi ta tshuka nzi mu wona kambe a ranzekako wa mina loyi a fileko?’ Laha hasi ku na ni mawonela yo kari lawa hi nga ma tirisako lezaku hi chavelela lava hi va kumako lomu ntirweni wa simu na va rila a kufa ka xaka kutani munghana wabye. — Isa. 61:2.
2. Loku a nwinyi wa muti a hi byela lezaku wa ha hi ku felwa, xana za fanela a ku ringeta ku teka xikhati xo leha na hi mu xumayela?
2 Hi Muti Ni Muti: Za koteka ku a nwinyi wa muti a hi byela lezaku ka ha hi kufa wo kari laha ngangweni wakwe. Xana i woneka na a karatekile nguvu? Xana a muti wa kona wu tele hi maxaka ma rilako? Ka ziyimo zo fana ni lezo, zi ngava chukwana a ku nga teki xikhati xo leha na hi mu xumayela. (Mutsh. 3:1, 7) Kuzilava hi nga ha mu zwela, hi mu nyika a xitlukana, revista, kutani broxura, hi gumesa hi mu salisa hi ndlela ya xichawo. Zonake hi nga ha wuya hi xikhati xi faneleko lezaku hi mu chavelela kambe hi ku tirisa a Biblia.
3. Loku a ziyimo zi vumelela, hi yihi a mitsalo leyi hi nga kombako a nwinyi wa muti loyi a ha hi ku felwako?
3 Ka ziyimo zinwani, hi nga ha zi wona na zi fanele a ku wula magezu yo hlaya ka lienzo lo sangula. Hambu lezi lexo xi nga hiko xikhati xa ku kaneta a mawonela yo biha, hi nga ha gonza navo a xitsumbiso xa lomu ka Biblia xungetano hi kuvuka ka vafileko. (Joh. 5:28, 29) Kuzilava hi nga ha va komba lezi a Biblia gi wulako xungetano hi xiyimo xa vafileko. (Mutsh. 9:5, 10) A tlhatlhambutelo wa lomu ka Biblia xungetano hi kuvuxiwa ka vafileko wu nga ha va chavelela. (Joh. 11:39-44) A wonela ginwani ku nga hava ku kambisisa a magezu ya kutsumba Jehova lawa ma wulilweko hi Joba, a munhu wo tsumbeka. (Joba 14:14, 15, Tradução do Novo Mundo) Na hi nga se suka, hi nga ha nyikela a mabroxura, Que Acontece Conosco Quando Morremos?, Loku U Felwa Hi A Ranzekako Wa Wena, hambu broxura kutani xitlukana xinwani xi fanelako. Kutani hi nga ha siya a bhuku A Biblia Gi Gonzisako, hi yisa kupima ka mahungu ma kumekako ka xipimo 6, hi tlhela hi maha malulamiselo ya ku wuya kambe hi ta kambisisa naye a mhaka leyo.
4. Hi zihi ziyimo zinwani lezi hi nga nazo za ku chavelela vanhu?
4 Ka Ziyimo Zinwani: Loku a kanelo wa kulahla mufi wu mahelwa lomu Salawini ya Mufumo, xana ku tava ni vanhu va nga hiko Timboni ta Jehova? A vanhu lavo va nga ha nyikiwa a mabhuku ma chavelelako. A tihlengeletano to kari ta ku lahla vafileko ti bongile nguvu loku ti nyikilwe a mabhuku ma fanelako a mingango leyi yi felweko. Ka zikhati zo kari, a zitiviso za makhombo lezi zi humelelako lomu ka maphepha-hungu zi vulula ndlela ya lezaku loyi a zi lavako a tsala papilo go koma, go chavelela ziro za ngango lowu wu felweko. Ka xikhati xo kari, anzhako ka ku amukela papilo gi nga hi ni zitlukana zo kari, a wanuna loyi a nga felwe hi sati a sala ni n’wana wa nhanyana i yile kaya ka muhuweleli a ya mu wutisa, a ku: “Hi wena u nzi rumeleleko a papilo legi? Kunene, nzi lava ku tiva zinwani xungetano hi Biblia!” A wanuna loye ni n’wana wakwe wa nhanyana va vumelile a xigonzo xa Biblia va tlhela va sangula kuva kona mitlhanganwini ya bandla.
5. Hikuyini hi fanele ku tlharihela ku tiva a zikhati zi faneleko za ku chavelela lava va rilako?
5 A bhuku ga Mutshawuteli 7:2 gi ngalo: “I chukwana kuya ndlwini ya xirilo ku hunza a kuya ndlwini ya mubuzo.” A munhu a felweko hi tolovelo i le ka xiyimo xo maheka lezaku a ingisela a mhaka ya Nungungulu a ku hunza loyi a nga kutibuzeni. Hontlheni hi fanele ku tlharihela ku tiva a zikhati zi faneleko za ku chavelela lava va rilako a kufelwa hi a ranzekako wabye.