Gonzisa Lava Va Nga Zi Kotiko A Ku Lera Khwatsi
1. Xikarato muni hi nga ha yimisanako naxo wutirelini?
1 Ka zikhati zo kari loku hi hi wutirelini, hi yimisana ni xikarato xa ku gonzisa zinene a vanhu va nga zi kotiko ku lera khwatsi. Zini hi nga zi mahako?
2. Hikuyini hi kombisako xichawo lava va nga zi kotiko a ku lera, niku hi nga zi mahisa kuyini?
2 Va Kombise Xichawo: Lezi Jehova a zi nyikako lisima matshamela ya mbilu ya munhu, na ku nga hi zigonzo zakwe. (1 Sam. 16:7; Mav. 21:2) Hikwalaho, a hi kanyisi lava va nga zi kotiko ku lera khwatsi. A vanhu lavo va ta byekelela ku vumela a ku vuniwa hi hina loku hi va kombisa xichawo ni lihlaza-mbilu. (1 Ped. 3:15) Lezo zi nga ha patsa a ku nga kurumeti lezaku a munhu loye ngha a lera a vesi kutani nzimana yo kari. A xikhati lexi a yako mahlweni hi ku tiva a zinene zo saseka za Biblia, za koteka lezaku a navela nguvu a ku chukwatisa a malerela yakwe kasi a ti buza hi ku gonza a Mhaka ya Nungungulu ‘a yi ehleketa mumu ni wusiku.’ — Tis. 1:2, 3.
3. Hi tihi a tindlela to gonzisa leti ti nga ha tirisiwako kasi ku gonzisa lava va nga zi kotiko ku lera khwatsi?
3 Tindlela To Gonzisa Zigonzweni Za Biblia: A mifananiso zivuno zi nene za ku gonzisa vanhu ni ku va vuna a ku alakanya lezi va gonzako. U nga ha wutisa a xigonzani xungetano hi lezi xi zi wonako ka mufananiso wu nga ka bhuku legi mu gi tirisako. Hi kulanzela, tirisa a ziwutiso zo kongoma kasi u xi vuna a ku zwisisa lezi a mufananiso wu zi gonzisako. Tirisa a mitsalo leyi yi gonzisako a timhaka to kari ta mufananiso lowo. A mifananiso yi nga ha tiriswa kambe kasi ku vuxeta a xigonzo. U nga gonzisi timhaka to tala nguvu hi khati ginwe. Khanyisa a hloko ya mhaka ni timhaka-tshinya ta nzima, u potsa a ku wulawula hi timhaka ti nga handle ka nzima leyo. Lera a mitsalo lomu ka Biblia hi kukongoma, u tlhela u tirisa a ziwutiso kasi a xigonzani xi zwisisa lezi zi lerilweko. Lezo zi nga engetela a kunavela kakwe a ku chukwatisa a wuzikoti ga ku lera kasi a kambisisa ha yece a zinene zinwani za Biblia.
4. Hi nga xi vunisa kuyini a xigonzani xa hina a ku chukwatisa a wuzikoti ga xona ga ku lera?
4 Zivuno Za Ku Chukwatisa A Ku Lera: A vanhu va nga zi kotiko a ku lera khwatsi kutani lava va vumalileko a lungelo ga ku gonza a ku lera khwatsi va nga ha zi kota ku zwisisa ni ku alakanya khwatsi a mahungu. U nga ha kuca a vanhu lavo a ku tirisa a mabhuku ya hina lawa ma gravarilweko. A ku ingisela khwatsi a magezu ma gravarilweko na a lanzelela lomu ka bhuku, hambu ku phinda a magezu hi gezu ga lahasi, zi ta vuna a munhu loye a ku chukwatisa a wuzikoti gakwe ga ku lera. A nga ha vuneka kambe hi ku tirisa a broxura Ti Tolovete Ku Gonza Ni Ku Tsala. Ka zipanze zo kari, a madota ma nga ha maha malulamiselo ya lezaku laha bandleni kuva ni mitlawa ya ku gonza a ku lera. A mawonela lawa ma nga ha hi vuna a ku vunetela lava va nga zi kotiko a ku lera khwatsi lezaku va zwisisa “a mitsalo yo basa,” leyi yi zi kotako a ku va tlharihisa kasi va hanyiswa. — 2 Tim. 3:15.