Ndlela yo vuna lava va nga zi kotiko ku lera khwatsi
1. Xana a ku gonzisa a Biblia lava va nga zi kotiko ku lera khwatsi zi na ni xikarato muni?
1 A venyi va miti la’va nga zi kotiko ku lera khwatsi va nga ha tsakela zilo za moya, kanilezi a Biblia ni mabhuku manwani zi nga ha va chavisa. A ku nyika vanhu lavo a bhuku A Biblia Gi Gonzisako ka khati go sangula, zi nga vuna kutsongwani. Makunu-ke, hi nga va vunisa kuyini hi tlhelo ga moya? Hi lo wutisa lezi a vahuweleli vo buva va matiko yo hunza 20 va mahako. Wona mawonela yabye ma lanzelako.
2. Zitiro muni zi bhinzulako kuvuneni ka vanhu va nga zi kotiko ku lera khwatsi?
2 Loku a xigonzani xi nga zi koti khwatsi ku lera kutani ku ne ni kutsongwani, u nga ha sangula hi broxura Ingisa Nungungulu kutani Ingisa Nungungulu Kasi U Hanya Kala Kupinzuka. A phayona go kari ga le Estados Unidos gi komba munhu loye a mabroxura lawo zonake gi mu langisa legi gi nga gi nene nguvu kakwe. A hofisa ya ravi ya le Quênia yi bika lezaku a zitiro lezo za bhinzula nguvu hakuva a vanhu va Afrika hi tolovelo va gonzisiwa hi ku hlawutelwa matimu wutshanwini ga kubhulisana ka ziwutiso ni mihlamulo. Hambu lezi a munhu a gonzileko a nga ha olovelwako hi kugonza ka ziwutiso ni mihlamulo, ka munhu a nga gonza kutsongwani, a mahela lego gi nga mu karatela. Loku a xigonzani xi hi ni wuzikoti go kari ga ku lera, a vahuweleli vo tala va ranza ku sangula hi mabroxura Mahungu Yo Saseka Ya Nungungulu! kutani Wa Zi Kota Kuva Munghana Wa Nungungulu! hambu a Bhuku Ga Mina Ga Mahungu Ya Biblia.
3. Hi fanele ku maha yini kasi hi bhinzula a xikhati lexi hi gonzisako la’va nga zi kotiko ku lera?
3 Dzunza: Lava va nga gonzangiko ku lera va nga hawa tingana, niku a kutala ka vona va ti wona na va nga hi va nchumu. A ku va vuna lezaku va nga ti zwisi lezo a kutala ka zikhati lezo i zambo go sangula ga ku va gonzisa lisine. A kutala ka vanhu va nga zi kotiko ku lera va tlharihile niku va zi kota ku gonza. Va kombe xichawo xi faneleko, u tlhela u va khoma hi ndlela yo dzunzeka. (1 Ped. 3:15) Va ta kuceka a ku simama va gonza loku va wona lezaku a kutikarata kabye ka dzunziwa ni ku ngha va kula hi tlhelo ga moya. Hikwalaho va dzunze.
4. Hi nga va kucisa kuyini lava va nga zi kotiko khwatsi ku lera lezaku va longisela a xigonzo?
4 Hambu loku a xigonzani xi nga zi koti khwatsi ku lera, xi kuce a ku longisela a xigonzo. A vahuweleli vo kari le Afrika Dzonga va kuca zigonzani zabye lezaku zi kombela a munhu wa laha ngangweni kutani munghana loyi a lerako khwatsi lezaku a zi vuna. A muhuweleli wo kari le Grã-Bretanya i kuca a zigonzani zakwe hi kuva a zi lomba a bhuku gakwe gi fungilweko lezaku zi gi tirisa ka tinzimana titsongwani nzeni ka xigonzo lezaku zi wona lezi zi olovisako zona a ku kuma mihlamulo loku yi fungilwe. A makabye wo kari le Índia i kuca zigonzani zakwe ku cuwuka khwatsi mifota ya xigonzo xa viki gi to lanzela ni ku ehleketa hi yona na ka ha hi mahlweni.
5. Hi nga kombisisa kuyini a lihlaza-mbilu a xikhati lexi hi fambisako xigonzo?
5 Vana ni lihlaza-mbilu: Ni ka gihi bhuku u gi tirisako, yisa kupima ka timhaka-tshinya u tlhela u vuna xigonzani xa wena lezaku xi ti zwisisa khwatsi. Kusanguleni, zi nga hava zi nene a kubhulisana hi 10-15 wa timeneti. U nga lweli a ku eneta timhaka to tala nguvu, kuzilava ntsena tinzimana titsongwani ka zipanze xinwe ni xinwani. Vana ni lihlaza-mbilu loku a xigonzani xi nonoka ku lera. Kuzilava i ta kuciwa a ku chukwatisa a kulera kakwe laha a yako a mu nyika nguvu lisima Jehova. Kasi ku vuna xigonzani xa wena lezaku xi maha lezo, neti mu sangulako ku gonza zi nene a ku xi ramba lezaku xiva kona mitlhanganweni ya bandla.
6. Hi nga va vunisa kuyini vanhu lezaku va gonza ku lera?
6 Loku a zigonzani zi gonza ku lera, zi ta kula hi xihatla hi tlhelo ga moya. (Tis. 1:1-3) A votala va vuna zigonzani zabye hi ku tirisa a broxura Ti Tolovete Ku Gonza Ni Ku Tsala ka timeneti titsongwani nzhako ka xigonzo xinwe ni xinwani. Loku a xigonzani xi tshuka xi tsemeka hlana, kuzilava u nga xi tiyisa hi kuva u xi komba lezi xi nga mahisako zona a zilo zo kari zi nga ntanwini wa xona. Xi tiyise lezaku Jehova i ta katekisa a kutikarata ka xona, u tlhela u xi kuca a ku kombela ku vuniwa hi Jehova. (Mav. 16:3; 1 Joh. 5:14, 15) A vahuweleli vo kari le Grã-Bretanya va kuca a zigonzani zabye lezaku zi ti vekela mixuvo yi kotekako ya ku kula — kuzilava a yo sangula ku gonza mabhesedi, zi gonza a ku lava a mitsalo yi tshahilweko ni ku yi lera, zonake zi gonza a ku lera a mabhuku yo hehuka ma seketelweko ka Biblia. A ku vuna vanhu lezaku va gonza ku lera a kutala ka zikhati zi patsa a ku va kuca a kuva va zi lava a ku maha lezo, na ku nga hi ntsena a ku va gonzisa ku lera.
7. Hikuyini hi nga faneliko ku va tsona lisine lava va nga zi kotiko ku lera khwatsi?
7 Jehova a nga va woneli hasi lava va nga gonza kutsongwani xikola. (Joba 34:19) Lexi Jehova a xi hlolako i mbilu ya munhu. (1 Kro. 28:9) Hikwalaho u nga va tsoni lisine lava va nga zi kotiko ku lera khwatsi. U na ni zitiro zo tala za zi nene nguvu lezi u nga sangulako hi zona. Hi kugumesa, u nga ha cica u tirisa a bhuku A Biblia Gi Gonzisako hi ndlela leyo u mu maha ava ni kuzwisisa ko eta ka Mitsalo.
[Magezu yo koka kupima ka phajina 4]
Lava va nga gonzangiko ku lera va nga hawa tingana, niku a kutala ka vona va ti wona na va nga hi va nchumu. A ku va vuna lezaku va nga ti zwisi lezo a kutala ka zikhati lezo i zambo go sangula ga ku va gonzisa lisine
[Kwadru ka phajina 4]
Loku a nwinyi wa muti a nga zi koti ku lera, ringisa lezi:
• Kusanguleni tirisa a broxura Ingisa Nungungulu, Ingisa Nungungulu Kasi U Hanya Kala Kupinzuka, kutani bhuku ginwani gi ringanako.
• Mu nyike lisima, u tlhela u mu dzunza.
• Komisa mabhulo, u tlhela u nga lweli ku eneta timhaka to tala nguvu.
• Mu vune a ku chukwatisa a wuzikoti gakwe ga kulera.
Laha a kombisako a kutsakela lisine ni manyawunyawu ya ku lava ku gonza, u nga ha cica u simama xigonzo hi ku tirisa a bhuku A Biblia Gi Gonzisako.