Ndlela Yo Longisela A Mutlhangano Wa Ntiro
1. Hi gihi a kungo ga Mutlhangano wa Ntiro, niku hi nga vunekisa kuyini hi wona hi laha zi kotekako ha kona?
1 A Mutlhangano wa Ntiro wu mahelwe a ku hi hlomisa lezaku hi bhinzula wutirelini. A mhaka-tshinya ku xumayela a mahungu yo saseka ya Mufumo, ku maha vapizani, ni ku huwelela a kulamula ka Nungungulu loku ku tshinelako. (Mat. 28:20; Mar. 13:10; 2 Ped. 3:7) Ha vuneka nguvu hi mutlhangano lowu wa lisima loku hi wu longisele khwatsi na hi longile a ku hlamula.
2. Hi nga ti longiselisa kuyini lezaku hi ya ingisela a kanelo?
2 Kanelo: A kutala ka zikhati, lomu a timhaka ta kanelo ti susiwako kona ku kombiwa ka zileletelo zi yako ka mukaneli. U nga ha vuxeta a timhaka ta kanelo, a ku patsa ni mitsalo yi kumbukilweko, u tlhela u alakanyela lezi u nga ti tirisisako zona wutirelini ga wena.
3. Zini hi nga ha zi mahako kasi ku longisela a kanelo wa kubhulisana ka ziwutiso ni mihlamulo?
3 Kubhulisana Ka Ziwutiso Ni Mihlamulo: A xipanze lexi xi ta vekiwa a ku fana ni Xigonzo xa A Sentinela, na xi hi ni magezu matsongwani ya xingheniso ni ya kuvala. Funga a timhaka-tshinya ka nzimana yinwe ni yinwani, u tlhela u longa a ku nyika mihlamulo yo koma, yo nyawula.
4. Xana hi nga ti longiselisa kuyini lezaku hi hlengela ka kubhulisana ni vaingiseli?
4 Kubhulisana Ni Vaingiseli: A xipanze lexi xi ta vekiwa kota kanelo, kanilezi a mukaneli i ta kombela vaingiseli lezaku va nyika mihlamulo yo kari. Loku u funga a timhaka-tshinya ni ku gonza a mitsalo yi kumbukilweko, u nga zi kota ku hlamula a xikhati lexi ku mahiwako a ziwutiso. A makabye loyi a vekako a xipanze lexi i ta maha zontlhe a zi kotako lezaku a kuca vaingiseli a kuva va hlamula a timhaka-tshinya.
5. Zini zi ta nga hi vuna a ku vuneka nguvu hi mikombiso?
5 Mikombiso: A zipanze zo kari zi ta patsa a mikombiso ya zilo za lisine kasi ku komba lezi a mahungu lawa ma kambisiswako ma nga tirisiswako zona lomu xipanzeni xa nwina. A madota kutani vahuweleli va buvileko kutani maphayona va ta kombelwa lezaku va maha mikombiso leyo. Laha u longiselako a xipanze lexi, u nga ha alakanyela lezi a mukombiso wu to mahiswa zona. A xikhati lexi ku mahiwako a mukombiso, alakanyela lezi u nga wu tirisisako zona ni ku wu zwananisa ni venyi va miti vo hambanahambana. U nga rivali a mabhuku kutani marevista lawa ma to tiriswa ka mikombiso. Wukhozelini ga nwina ga Ngango ga ni gambo, mu nga ha zi wona na zi vuna a ku vuxeta a mikombiso yo kari ya xikombiso.
6. Hi zihi a zigelo zo kari za kuva hi longisela a Mutlhangano wa Ntiro?
6 A Mutlhangano wa Ntiro wu tsakisa nguvu loku hi wu longisela hi tlhela hi alakanyela a gonziselelo yi nene leyi yi to kanelwa. A ku maha lezo zi ta hi nyika a lungelo ga ku tiyisana nguvu. (Rom. 1:11, 12) Loku hi ti nyika xikhati xa ku longisela a Mutlhangano wa Ntiro, hi ta hlomiswa khwatsi lezaku hi tatisa a ntiro wa hina. — 2 Tim. 3:17.