Zileletelo Ka Lava Va Mahako Zipanze Za Mutlhangano Wa Ntiro
Kusukela ka Wutireli legi Ga Hina Ga Mufumo, a magezu ya longoloko wa Mutlhangano wa Ntiro ma hungulwa. A zileletelo ni zikhumbuxeto lezi zi lanzelako zi ta komba lezi zi faneleko ku mahiwa ka xikhati lexi, zinwe ni ku dlunyatisa lezi zi wulilweko ka nzima “Ndlela Yo Longisela A Mutlhangano Wa Ntiro,” yi humesilweko ka Wutireli Ga Hina Ga Mufumo ga Maio wa 2009.
◼ Kanelo: Lowu i kanelo wu seketelwako ka mahungu ma kombilweko laha ma nga kona, na vaingiseli va nga wuli nchumu. A mukaneli i fanele ku yisa kupima ka lezi zi to vuna nguvu a bandla.
◼ Ziwutiso Ni Mihlamulo: A xipanze lexi xa fana nguvu ni Xigonzo xa A Sentinela. Xi na ni xingheniso xo koma ni magezu matsongwani yo dayelela, niku ka tinzimana tontlhe ku mahiwa ziwutiso. A mufambisi i fanele ku ti wonela lezaku a nga nyiki mitlhamuselo yo tala ku hunza mpimo. A mitsalo-tshinya yi nga ha gonziwa loku a xikhati xi vumelela. A tinzimana ti nga ta gonziwa, ahandle ka loku ku hi ni xileletelo xi wulako ku gonza.
◼ Kubhulisana Ni Vaingiseli: A kanelo lowu wu patsa kubhulisana ko kari ni vaingiseli. A wu vekiswi ku khwatsi i kanelo ntsena, ge a hi ziwutiso ni mihlamulo kala wu mbhela.
◼ Mikombiso Ni Kubhulisana: A xileletelo xaku kombisa xi wula ku ngalo a makabye loyi a avelweko a xipanze lexi i na ni wutihlamuleli ga ku patsa a mukombiso ka kanelo wakwe. A ku na xilaveko xa lezaku kuva yena wutsumbu a mahako a mukombiso lowo. Lava a va hlawulako lezaku va mu vuna va fanele ku ngha va ringanelwa khwatsi ni kuva xikombiso xi nene, niku i fanele ku maha malulamiselo navo na ka ha hi mahlweni nguvu loku zi koteka. I chukwana a ku nga tirisi a vahuweleli va vaswa ni va nga hiko na wuzikoti ga ku kombisa lezi a ntiro lowu wu faneleko ku mahiswa zona hi ku fela ntsena ku va nyika lungelo ga ku yima laha xiluvelweni, hambu lezi a vokari va nga ha tiriswako kota venyi va miti. A vahuweleli lava va mahako a mukombiso ngha va nga fulareli vaingiseli. Lava va tiriswako ka kubhulisana va fanele ku nyika mitlhamuselo yabye na va hi laha xiluvelweni na ku nga hi lomu matshanwini yabye. A mikombiso ni kubhulisana zi fanele ku vuxetwa. Loku a mutlhangano wu mbhelelwa hi xikhati na makabye a kurumeteka ku komisa a xipanze xakwe, a nga tshuki a tsika tlhelweni a mikombiso ni kubhulisana. A malanza ya wutireli ma fanele ku wutisa a mutlhanganyisi wa hubye ya madota kutani dota ginwani na ma nga se hlawula lava ma to va tirisa.
Loku a xipanze xo kari xi hi ni zileletelo zo hlawuleka, zi fanele ku lanzelwa khwatsi. Loku a zipanze za Mutlhangano wa Ntiro zi mahiwa kota lezi zi tlhamuselweko laha hehla, a vamakabye va ta maha lezaku a Mitlhangano ya Ntiro yi “mahiwa hi fanelo ni nayo.” — 1 Kor. 14:40.