U Ta Hlamulisa Kuyini?

1. Hikuyini hi faneleko ku pimanyisa a xikombiso xa Jesu a xikhati lexi hi mahiwako ziwutiso?

¹ Kala nyamutlha, a vanhu va ha hlamala a ndlela ya yi nene leyi Jesu a nga kari a hlamula hi yona a ziwutiso. A xikhati lexi hi mahiwako ziwutiso za tixakaxaka wutirelini ga hina, hi maha khwatsi hi ku pimanyisa a mahlamulela ya Jesu. — 1 Ped. 2:21.

2. Xini xi nga ha hi vunako a ku nyika hlamulo wa chukwana wa xiwutiso xo kari?

² Ranga Hi Ku Ingisela: Jesu i wa alakanyela a xigelo xa kuva munhu a maha xiwutiso. Ka zikhati zo kari, lezo zi lava lezaku hi maha ziwutiso kasi hi tiva lezi hakunene a munhu a zi pimisako. A munhu loyi a wutisako ku ngalo, “Xana wa kholwa ka Jesu?” a nga ha lava ku tiva lezaku hikuyini u nga giko a Khisimuso. Loku u pola a xigelo xa lisine xa xiwutiso lexo, wa zi kota ku mu hlamula hi ndlela ya chukwana. — Luka 10:25-37.

3. Zini hi nga nazo kasi ku hi vuna a ku kuma mihlamulo yi kholwisako ya lomu Mitsalweni?

³ Hlamula Hi Mhaka Ya Nungungulu: Hi tolovelo i chukwana a ku tirisa a Biblia ga wena kasi ku hlamula a xiwutiso. (2 Tim. 3:16, 17; Maheb. 4:12) A bhuku Raciocínios ni “Tópicos Bíblicos Para Palestrar” lomu ka Tradução do Novo Mundo das Escrituras Sagradas za vuna nguvu a ku nyika a hlamulo wu faneleko. Hambu loku loyi a mahako xiwutiso a nga kholwi ka Biblia, u nga ha mu komba hi xichawo lezi a Mitsalo yi gonzisako. Kuca a munhu loye a ku alakanyela khwatsi a wutlhari gi tsumbekako hi kumbhelela legi gi kumekako lomu ka Biblia. Hi ku pimanyisa Jesu, a mihlamulo ya wena yi ta fana ni “malalanja ya nzalama xibyeni xa siliva” — yi tava yo dzunzeka, yo saseka, ni ya lisima. — Mav. 25:11.

4. Hi rini laha zi nga ringaniko ku zama a ku hlamula a xiwutiso xihi ni xihi?

⁴ Xana Hi Fanele Ku Hlamula A Xiwutiso Xihi Ni Xihi? Loku u nga wu tivi a hlamulo wa xiwutiso xo kari, u ngavi ni tingana ta ku wula lezi: “A nzi zi tivi, kanilezi nzi ta ya kambisisa a hlamulo wa kona nzi ku wuyela nawo.” A kutikoramisa loko ni kukhatala hi munhu loye zi nga ha mu kuca a ku vumela lezaku u wuya kambe. Loku u pola lezaku a xiwutiso lexo xi mahiwa hi vakaneti lava va zamako ku tlhotlha a kuphikizana, pimanyisa Jesu hi ku nga va hlamuli. (Luka 20:1-8) Hi kufanana, loku munhu a nga hiko na kukhatala ka lisine hi zinene a zama ku ku nghenisa kukanetisaneni, tsema a bhulo hi xichawo zonake u tirisa a xikhati xa wena kulaveni ka vanhu va timbilu ti nene. — Mat. 7:6.

5. Xikombiso muni xa ku hlamula a ziwutiso lexi Jesu a hi nyikileko?

⁵ Jesu i wa zi tiva lezaku a ku khegela ka Jehova zi wa hi za lisima kasi a tatisa a xiavelo xakwe xa ku “kustumunya hi zinene,” lezi zi nga patsa ku hlamula a ziwutiso zi mahilweko hi xigelo xi nene. (Joh. 18:37) A hi kusaseka ka lungelo hi nga nago ga ku pimanyisa Jesu kunyikeni ka mihlamulo ka lava va ‘ti yimiseleko wutomi ga pinzukelwa’! — Miti. 13:48.