Xana Nza Maha Zontlhe Zi Lavekako?
1. Zini zi nga ha karatako a muKristu wo tsumbeka?
1 Wa tshuka u ti maha a xiwutiso lexo ke? Kuzilava a wa ha tiri nguvu wutirelini hi kota ya tanga, mababyi, kutani wutihlamuleli ga ngango gi engetelekileko, lezi zi ku mbhetako ntamu. A makabye wo kari wa xisati a nga ni vana vanharu i tsalile ku ngalo ka zikhati zo kari wa tizwa nanzu hi lezi a mbhetako xikhati xo tala ni ntamu na a khatalela ngango wakwe zonake a nga ha zi koti ku maha zo tala wutirelini. Xini xi to hi vuna a kuva ni mawonela yo ringanisela xungetano hi mhaka leyi?
2. Zini lezi Jehova a zi rinzelako ka hina?
2 Lezi Jehova A Zi Rinzelako Ka Hina: Handle ko kanakana, hina hontlhe hi wa ta tsakela ku maha zo tala wutirelini. Kanilezi, a kutala ka zikhati, ku na ni kuhambana ka hombe xikari ka lezi hi nga wa ta tsakela ku maha ni lezi hakunene hi zi kotako ku maha. Lezi hi tsakelako ku maha zo tala zi komba lezaku a hi tsakiswi hi ku kondla mawoko. Hi fanele ku alakanya lezaku Jehova wa ku tiva khwatsi a kutsanzeka ka hina niku a nga lavi zo tala ku hunza lezi zi nga ntanwini wa hina. (Tis. 103:13, 14) Zini a zi rinzelako ka hina? I lava lezaku hi mu tirela hi muhefemulo wontlhe, hi mu mahela za chukwana ka zontlhe hi zi kotako. — Kol. 3:23.
3. Hi nga yi hlolisa kuyini a mizamo ya hina wutirelini?
3 Xini xi to hi vuna a ku gema lezi hakunene hi zi kotako ku maha? Ha zi kota ku kombela Jehova a hi vuna ku hlola a xiyimo xa hina hi kufaneleko. (Tis. 26:2) A munghana wa muKristu a tsumbekako ni wo buva, loyi a hi tivako khwatsi, na a nga chavi ku hi byela lezi hi faneleko ku chukwatisa, yenawu a nga hi vuna. (Mav. 27:9) U nga rivali kambe lezaku kota lezi a matshamela ma cicako, i chukwana a ku hlola xiyimo xa hina xikhati ni xikhati. — Efe. 5:10.
4. Hi fanele ku zi wonisa kuyini a zikhumbuxeto zi seketelwako ka Biblia xungetano hi wutireli?
4 Lezi Hi Faneleko Ku Zi Wonisa Zona A Zikhumbuxeto: Kupalisaneni, a vahlaleli va tala ku khuzela. A kungo gabye ku vuna a zitsutsumi lezaku zi chikela magumo, na ku ngahi ku va mbheta ntamu. Hi kufanana, a magezu ya kutiyisa-hlana ma seketelwako ka Biblia ni zikhumbuxeto zi nyikiwako mitlhanganweni ya hina ni ka mabhuku ya hina za lezaku hi ‘kanela a mhaka hi xihatla,’ zi mahelwe a ku hi vuna; a zi kombi ku ngalo a mizamo ya hina a yi eneli. (2 Tim. 4:2) Ha zi kota ku tiyiseka lezaku loku hi zama ku maha za chukwana hi nga tsiki, Jehova i ta alakanya a ‘liranzo la hina ni mitiro ya hina.’ — Maheb. 6:10.