A Marevista Ya Hina Ma Mahelwa Ku Tsakisa Vanhu Vo Hambanahambana
1. Xana a ntlawa wa nanza gi tsumbekileko ni go tlhariha wu pimanyisisa kuyini mupostoli Paule?
1 A ku fana ni lezi Paule a nga zwananisa a manyikela yakwe ya mahungu yo saseka ni ziyimo za vanhu kasi ku vuna “vanhu vontlhe,” a ntlawa wa nanza gi tsumbekileko ni go tlhariha wu tirisa a mabhuku ya hina lezaku wu chikelela a vanhu va midawuko ni kukholwa ko hambanahambana. (1 Kor. 9:22, 23) Kasi hi zi kota ku tirisa khwatsi A Murinzeli ni Despertai! hi fanele ku alakanya a vanhu lava a marevista lawa ma tsalelwako vona.
2. Xana a Despertai! gi mahelwa ku tsakisa vamani?
2 Despertai!: A revista legi gi tsalelwa vanhu vo fana ni lava mupostoli Paule a nga wulawula hi vona a xikhati a nga wulawula ni “madota ya le Atensi.” (Miti. 17:22) A vavanuna lavo va wa nga tivi nchumu xungetano hi wuKristu, niku va wa hi ni wutivi gitsongwani ga Mitsalo. Hi kufanana, a vanhu lava a Despertai! gi tsalelwako vona va na ni wutivi gitsongwani kutani ku nga tivi nchumu futsi xungetano hi Biblia. Za koteka ku ngha va nga tivi nchumu xungetano hi tigonzo ta wuKristu, va ngha va hi ni kukanakana ko kari xungetano hi wukhongeli, kutani ku ngha va nga tivi lezaku a Biblia ga vuna. A kungo go ranga ga Despertai! ku kholwisa vagonzi va gona lezaku a Nungungulu wa lisine i kona. A ginwani kungo ga revista legi ku aka a kukholwa ka Biblia ni ku vuna a vagonzi a ku zwisisa lezaku a Timboni ta Jehova ta hambana ni yinwani mitlawa ya wukhongeli.
3. Xana a tixaka timbiri ta Murinzeli leti hi nga nato ti tsalelwa vamani?
3 A Murinzeli: A revista legi gi nyikelwako sinwini gi tsalelwa vanhu va kombisako xichawo xo kari hi Nungungulu ni Mitsalo. A vanhu lavo va na ni wutivi go kari ga Biblia kanilezi a va ti zwisisi khwatsi a tigonzo ta gona. Vona va fana ni lava Paule a nga va kumbuka kota lava va “chavako Nungungulu.” (Miti. 13:14-16) A Murinzeli loyi a gonziwako bandleni i tsalelwa nguvunguvu a Timboni ta Jehova. Paule i wa alakanya lezaku lava va nga gonza a mapapilo yakwe va wa yi tiva a Mitsalo niku va wa hi ni wutivi go mbhelela ga zinene. (1 Kor. 1:1, 2) Hi kufanana, a tinzima leti ti nga lomu ka revista ga xigonzo ti tsalelwa lava va tako mitlhanganweni ya hina na va hi lava va zwisisako a mawulawulela ni tigonzo ta Timboni.
4. Hikuyini hi faneleko ku gonza a revista ginwe ni ginwani hi gi nyikelako sinwini?
4 Hambu lezi hi tolovelo hi nyikelako marevista na ma hi mambiri, hi tala ku wulawula hi ginwe ntsena ka zingheniso za hina. Hikwalaho, ti yimisele ku gonza a revista ginwe ni ginwani gi chikelako. Loku u maha lezo, u ta zi kota khwatsi ku nyikela a marevista hi ndlela yi tsakisako vanhu lava u va kumako.