Kwadru Ga Ziwutiso

◼ Himani A Faneleko Ku Tatisa A Makwadru Ya Makhero Ma Kombeliwako Mabhukwini Ni Ka Internet?

Hi tolovelo, a mabhuku ya hina ma na ni wutshamu ga ku tsala makhero legi gi nga ha tatiswako gi rumelwa hofiseni ya ravi kasi ku kombela mabhuku kutani ku enzelwa hi Timboni ta Jehova. A ku hunza lezo, a Web site ya hina www.watchtower.org yi nga ha tiriselwa ku kombela xigonzo xa Biblia. A malulamiselo lawo ma vuna a vanhu vo tala a ku gonza a zinene. Kanilezi, ka humelela zikarato a xikhati lexi a vahuweleli va tirisako a zitiro lezo kasi ku maha malulamiselo ya lezaku a maxaka yabye ni vanwani va enzelwa hi Timboni.

A vokari va rumelelweko mabhuku hi ravi na va nga kombelangi va vilela, va ti zwisa ku khwatsi a hlengeletano ya hina yo va karata ni kuva yi va vekile ka xaxameto wo kari wa vanhu va ku va rumelela mabhuku hi kukhanzakanya. A vahuweleli lava va amukelako a mubiko wa lezaku va enzela a munhu a nga kombelangiko ha yece a kuva a enzelwa va tizwa na va hi ka xiyimo xo nonoha loku a munhu loye a kombisa kuswireka. Hikwalaho, a zikombelo zi mahiwako ka Web site ya hina kutani hi ku tirisa a makwadru ya ku tsala makhero zi fanele kuta hi ka vatsakeli wutsumbu, a zi faneli kuta hi ka vahuweleli na va mahela vanwani. Hi tolovelo, loku a zikombelo lezo zi poliwa lezaku zi mahelwe munhu munwani, a zi khatalelwi.

Makunu, hi nga vunisa kuyini hi tlhelo ga moya a xaka ga hina kutani munhu hi tivanako naye? Loku u tsakela lezaku a amukela mabhuku, hikuyini u nga ma rumeliko kota xinyikiwo ka yena hi kukongoma? Loku a kombisile kutsakela na a xuva ku enzelwa hi Timboni kanilezi wena na u nga tivi ndlela ya ku bhula ni madota ya bandla ga lomu xipanzeni xakwe, u fanele ku nyikela a formulario Queira Visitar (S-43-T) ka matsalani wa bandla ga wena, loyi a to yi hlola a guma a yi rumela hofiseni ya ravi. Hambulezo, loku a mutsakeli loye a hi paxweni, ka wutshamu ga ku valela vadeleli va mimuri yo lahlisa mapimo, kutani xipitali, a wu faneli ku mu kombelela xivuno xa hofisa ya ravi. Kanilezi, u nga ha mu kuca lezaku a bhula ni vamakabye lava va enzelako a wutshamu lego kutani ku tsalela a hofisa ya ravi ha yece.