Kwadru Ga Ziwutiso

◼ Xana a muhuweleli i fanele ku tirisa nguvu internet kasi ku nyika wukustumunyu kutani ku gonza ni vanhu va hanyako ka tiko ginwani?

A vahuweleli vo kari va tirisa internet kasi ku kuma zigonzo za Biblia matikweni lawa a ntiro wa hina wu beletelwako kutani ku nga ni vahuweleli vatsongwani. Ka makhati yo kari, lezo zi pswala mihanzu ya yi nene. Hambulezo, zi na ni mhango kuva a vahuweleli va rumelana ti-email kutani ku bhula hi tisaite ta mabhulo ni vanhu vo kala ku va tiva. (Wona a Nosso Ministério do Reino ga Julho wa 2007, p. 3.) Hambu lezi a kungo ga kona ku nga ku chiketa mahungu ya Mufumo ka vanhu va timbilu ti nene, a mabhulo lawo ma nga maha makabye a tolovelana ni vakubiha, a ku patsa ni vahluwuki. (1 Kor. 1:19-25; Kol. 2:8) Tlhatakumbiri, matikweni lawa a ntiro wa Mufumo wu beletelwako, za koteka ku ngha a mahungu lawa vanhu va tsalelanako na ma wonelelwa hi wuhosi. Hi ndlela leyo, a kubhulisana loko ku wa ta veka mhangweni a vamakabye va tiko lego. Hikwalaho, a vahuweleli a va faneli ku nghena ka internet va hlota vanhu va tiko ginwani kasi ku va bhulela mahungu ya Mufumo.

Ahandle ka loku a hofisa ya ravi yi nyika zileletelo zinwani, loku hi nyika wukustumunyu ga xitshuketi ka munhu a tileko za xikhatanyana hi ka tiko ginwani, a hi faneli ku zama ku hlakulela kutsakela kakwe anzhako ka kuva a tlhelile kaya. Wutshanwini ga lezo, hi nga mu komba lezi a nga tirisisako zona a jw.org kasi ku kuma mahungu manwani kutani ndlela ya ku wulawula ni hofisa ya ravi ya tiko gakwe. Hi nga tlhela hi mu kuca kuya ka Salawu ya Mufumo yi nga kusuhani ni kaya kakwe. Kunene, ku na ni matiko ma kalako ma nga hi na tiSalawu ta Mufumo. Loku a zi lava ku enzelwa hi Timboni ta lomu a hanyako kona, hi fanele ku tatisa a formulario Queira Visitar (S-43) hi nyika matsalani, loyi a to gi rumela hi ku tirisa a jw.org. A hofisa ya ravi leyi yi wonelelako a ntiro ka tiko legi a munhu loye wo tsakela a hanyako ka gona ya xi zwisisa khwatsi a xiyimo xa seyo niku yi tava ka xiyimo xi nene xa ku nyika xivuno xa moya. — Wona a Wutireli ga hina ga Mufumo ga Junho wa 2014, p. 7, ni ga Novembro wa 2011, p. 2.

Loku a munhu hi mu enzelako zalezi a rura aya ka tiko ginwani kutani loku hi kari hi gonza ni munhu zalezi loyi a nga ka tiko ginwani hi mu tivako hi internet ntsena, hi fanele ku lanzela a wurangeli legi gi kombisilweko laha hehla. Hambulezo, hi nga ha simama ku hlakulela a kutsakela kakwe kala a enzelwa hi vahuweleli va xipanze xakwe. Hambulezo, loku a munhu a hanya ka tiko legi a ntiro wa hina wu beletelwako, hi fanele ku ti wonela nguvu loku hi wulawula naye hi timhaka ta Biblia hi ku tirisa mapapilo, telefone, kutani michini yinwani. — Mat. 10:16.