Va lave hi xihatla lava va nga ni xilaveko!

Kusukela loku a Web site ya hina yi sangula, a vanhu va kombelako ku gonza Biblia hi ku tirisa a Internet va engeteleka hi ndlela yo hlamalisa. A zikombelo zinwani zi engetelwa hi kota ya tindlela tiswa ta ku nyika wukustumunyu ga laha kubaseni. A hofisa ya ravi yi khatalela a zikombelo lezo hi xihatla xa hombe nguvu hi laha zi kotekako ha kona. Hi xikombiso, loku ku mahiwa xikombelo lomu ka jw.org, a kutala ka zikhati a madota ya xipanze xa munhu loye a tsakelako ma kuma a xitiviso lexo hi ka hofisa ya ravi ntsena ka masiku mambiri anzhako ka xikombelo lexo. Hambulezo, a mibiko ya vanhu va lomu sinwini yi komba lezaku ku hunzile maviki yo tala na vokari va kombeleko xigonzo xa Biblia va nga se khatalelwa. Hi nga tiyisekisa kuyini lezaku a xivuno hi xi nyikile na munhu a tsakelako a nga se mbhela ntamu? — Mar. 4:14, 15.

Loku a munhu wo kari a nga hanyiko lomu xipanzeni xa nwina a kombisa kutsakela, tekela ku tatisa a formulario Queira Visitar (S-43) zonake u yi nyikela ka matsalani na ku nga se hunza a mutlhangano wa bandla lo’wu to lanzela. Nzeni ka siku ginwe kutani mambiri, a matsalani i fanele ku nyikela a formulario leyo ka bandla legi gi faneleko kutani ku yi rumela ka hofisa ya ravi hi ku tirisa a khero ga bandla lomu ka jw.org. A madota ma fanele ku kamba mahungu lomu ka Web site hi kukhanzakanya. Loku ma amukela a xitiviso xa kuva ma enzela a wokari, ma fanele ku mu lava hi xihatla. Ni wihi muhuweleli a kombeliwako a ku maha lienzo lelo i fanele ku li wona kota nchumu wo ranga wu faneleko ku mahiwa. Loku a munhu loye a nga hi kona laha kaya, kuzilava u nga siya mahungu yo kari ya kuva a ku kuma hi wona.