Vuna vanhu lezaku va ingisa Nungungulu

1. Mabroxura muni ma humesilweko ka Gotsovanyano wa Muganga “A Wute Mufumo Wa Nungungulu!” niku xini xi ma mahako mava ni xivuno nguvu wutirelini?

¹ Ka Gotsovanyano wa Muganga “A Wute Mufumo Wa Nungungulu!” ku humesilwe mabroxura mambiri. A ginwe i Ingisa Nungungulu Kasi U Hanya Kala Kupinzuka. Legi ginwani i Ingisa Nungungulu, ku nga wuhunzuluseli gi hehukisilweko. Kota lezi ma nga ni timhaka titsongwani, ma olova ku ma hunzulusela hi xikhati xitsongwani. Kunene, a xikhati lexi a broxura Ingisa Nungungulu Kasi U Hanya Kala Kupinzuka gi nga humesiwa gi wa sina gi hunzuluselwe hi 431 wa tirimi.

2. Hi vamani lava va to vuneka hi mabroxura lawa?

² Hi vamani lava hakunene va to vuneka hi wona? Wona lezi zi tolovelako ku humelela matikweni yo tsalangana:

• A muhuweleli i bhulisana ni nwinyi wa muti, hi khati go sangula kutani ka lienzo lo wuyela, zonake a wona lezaku a nwinyi wa muti a ga zi tivi ku lera kutani a nga leri khwatsi.

• A muhuweleli i xumayela munhu a wulawulako a lirimi leli a hlengeletano yi hunzuluseleko a mabhuku ma tsongwani kutani ne ni ginwe. Kutani a vanhu vo tala lomu xipanzeni a va zi tivi ku lera a lirimi leli va wulawulako va tlhela va li zwisisa khwatsi.

• A muhuweleli i xumayela ziwiri xipanzeni xakwe hi lirimi la mawoko.

• A mupswali i lava ku gonzisa lisine a nwanana wakwe kanilezi, a nga se zi kota ku lera.

3. Xana a broxura Ingisa Nungungulu gi mahisilwe kuyini?

³ Lezi ma mahisilweko zona: A broxura Ingisa Nungungulu gi tsalilwe timhaka ti tsongwani nguvu. A kutala ka zikhati i linya yinwe ya magezu yo olova ni Mutsalo wu tsalilweko laha hasi ka phajina lowu wu kombako a timhaka-tshinya. Hikuyini? Hi nga ti alakanyela na u nyikwa a broxura gi tsalilweko hi lirimi u nga zi tiviko ku lera, kuzilava ni maletela ya kona a wu ma tivi. Hambu loku go wa ni zithombe zo saseka, xana gi wa ta ku tsakisa? Kuzilava ahihi. Hi kufanana, a vanhu lava va nga zi tiviko ku lera va dzuka loku va wona mabhuku ma nga ni timhaka to tala. Hikwalaho, phajina ni phajina gi na ni zithombe za zi nene ni za ku saseka nguvu, lezi zi tsalilweko hi ndlela yi vunako kuva u bhulisana ni munhu hi timhaka leti ti tlhamuselako a xithombe xinwe ni xinwani.

4. Xana a broxura Ingisa Nungungulu Kasi U Hanya Kala Kupinzuka gi mahisilwe kuyini?

⁴ A broxura Ingisa Nungungulu Kasi U Hanya Kala Kupinzuka gi na ni zithombe zo fana ni lezi za broxura Ingisa Nungungulu. Gi mahelwe ku gonza ni lava va zi tivakonyana ku lera kutani lava va gonzako ku lera. A broxura legi gi nga tiriswa kambe hi mugonzisi a xikhati lexi a gonzako ni munhu hi broxura Ingisa Nungungulu. Ka khona ga le hehla hi tlhelo ga xibhabha ka xigonzo xinwe ni xinwani ku na ni xiwutiso xi hlamuliwako ka phajina lego ni ka legi gi lanzelako. Ahandle ka zithombe, ku na ni magezu ma tlhamuselako a zithombe lezo ni mitsalo ya Biblia yi kumbukilweko. Kusuhani ni makhona ya seno hasi ka maphajina yo tala ku na ni kwadru go kwalala gi nga ni manwani mahungu zinwe ni mitsalo yinwani yi kumbukilweko leyi u nga ha yi tirisako maringano ni wuzikoti ga xigonzani.

5. Hi nga ma tirisisa kuyini a mabroxura lawa?

⁵ Matirisela: U nga nyikela mabroxura lawo a xikhati u tirako hi muti ni muti laha u zi wona zi hi chukwana, hambu loku ku nga hi hweti ya mabroxura. (Wona a kwadru “Manyikelela.”) Loku a broxura lego u lava ku gi nyikela ka lienzo lo wuyela u nga ha wula lezi: “Nzi na ni nchumu nzi nga navela ku ku nyika” zonake u mu nyika a broxura lego.

6. Xana hi nga fambisisa kuyini a xigonzo hi ku tirisa a mabroxura lawa?

⁶ Kota lezi a broxura Ingisa Nungungulu gi nga hiko na ziwutiso, a kubhulisana loko ku nga tava ka ziwutiso ni mihlamulo a ku fana ni lezi hi mahako loku hi gonza a bhuku A Biblia Gi Gonzisako. A vanhu va midawuko yontlhe va zi ranza a ku ingisela matimu. Hikwalaho, tirisa zithombe za broxura lego kasi ku hlawutela matimu ya Biblia. Tlhamusela lezi a xithombe xinwe ni xinwani xi wulako zona. Wulawula hi ndlela yi kombisako ku tsaka. Kombela a xigonzani lezaku xi wula mawonela ya xona. Lera a mitsalo yi nga lahasi ka phajina zonake u bhulisana naye hi lezi a mitsalo leyo yi wulako zona. Mu mahe ziwutiso kasi mu bhulisana ni ku tiyiseka lezaku wa zi zwisisa. Loku yena a tirisa a broxura Ingisa Nungungulu Kasi U Hanya Kala Kupinzuka, lerani zinwe a timhaka ni mitsalo leyi yi yelanako ni xithombe lexi mu wulawulako hi xona.

7. Hi nga xi vunisa kuyini a xigonzani xa hina lezaku xi kula?

⁷ Vuna a xigonzani lezaku xi kula: Kunene, ku rinzelwa lezaku a mabhulo lawo ma vuna a xigonzani xa wena lezaku xi navela ku gonza ku lera kasi xikha wutivi ga Jehova ha xoce. (Mat. 5:3; Joh. 17:3) Hikwalaho, loku ku hi lezaku mu gonza hi broxura Ingisa Nungungulu, hi kufamba ka xikhati wa zi kota ku mu gonzisa ku lera zonake mu cica mu gonza hi broxura Ingisa Nungungulu Kasi U Hanya Kala Kupinzuka. Kani u tirisa broxura muni, a xigonzani xi nga ta ringanelwa hi ku bapatizwa hi ku gonza a mabroxura lawa ntsena. U fanele ku mu gonzisa hi bhuku A Biblia Gi Gonzisako kutani a bhuku ginwani gi faneleko, legi gi to mu nyika a wutivi go enela ga Biblia.

8. Hikuyini u bongako hi lezi hi nga ni mabroxura lawa ya maswa ke?

⁸ Kasi va hanya kala kupinzuka, a vanhu va fanele ku ingisa Hosi ya Hombe wuakweni gontlhe. (Isa. 55:3) A kuranza ka Jehova hi lezaku a “vanhu vontlhe,” a ku patsa ni lava va nga zi tiviko ku lera, va gonza ku mu ingisa. (1 Tim. 2:3, 4) A ho ku bonga hi lezi hi nga ni mabroxura lawa ya maswa ma hi vunako ku gonzisa vanhu a ku ingisa Nungungulu!

[Tlhamuselo wa mifota ka phajina 3]

Manyikelela

Mu kombe a maphajina 2 ni 3 a nwinyi wa muti, zonake uku: “Wa zi lava ku hanya ka tiko go fana ni legi laha? U wa ta tsaka hi ku hanya ka tiko go fana ni legi laha ke? [Rinzela hlamulo.] A Biblia gi tsumbisa lezaku lokuloku Nungungulu i ta cica misava yiva wutshamu go saseka ni go rula, laha ku to kala ku nga hi na xisiwana ge hambu mubabyi. Wona lezi hi faneleko ku maha kasi hi zi kota ku hanya misaveni leyo. [Gonza Johani 10:27, 28, legi gi kumbukilweko le hehla ka phajina 3.] A mavesi lawa me ngalo hi fanele ku ingisa gezu ga Nungungulu. Makunu hi nga mu ingisisa kuyini?” Vulula ka phajina 4 ni 5, mu bhulisana hi hlamulo wa kona. Loku a nwinyi wa muti a nga hi na xikhati, mu siyele a broxura zonake u bhula naye siku ga ku ta bhulisana hi hlamulo wa kona.