Mahungu ya Mufumo N.° 38 ma to nyikelwa hi Novembro!
1. Ziwutiso muni lezi a vanhu va ti mahako xungetano hi vafileko, niku zi ta hlamuliswa kuyini hi Novembro?
1 A kufa i nala a xanisako vanhu vontlhe, na ku nga khataliseli lezi va zi kholwako. (1 Kor. 15:26) A vanhu vo tala va ti wutisa ku a vafileko va kwihi niku xana hi ta tshuka hi va wona kambe ke. Hikwalaho, misaveni yontlhe, a mabandla ma tava ni tsima ga ku nyikela Mahungu ya Mufumo N.° 38, ma nga ni hloko ya mhaka Xana a vafileko va zi kota ku tlhela va hanya hakunene? A tsima lego gi ta sangula hi 1 ka Novembro. Anzhako ka tsima lego go hlawuleka, a Mahungu ya Mufumo N.° 38 ma ta tirisiwa wutirelini kota xiphephana.
2. Xana a Mahungu ya Mufumo N.° 38 ma tshamisile kuyini?
2 Matshamela: A xiphephena Mahungu ya Mufumo N.° 38 xi mahelwe kuva xi petsiwa hi ndlela ya ku seno mahlweni kuva ni hloko ya mhaka leyi yi kokako kupima zinwe ni magezu lawa ma nge “Xana u taku . . . ina? ahihi? kuzilava?” Loku a mugonzi a vulula lomu nzeni, i ta wona lezi a Biblia gi wulako kota hlamulo wa xiwutiso lexi xi nga hloko mhaka ni lezi a xitsumbiso lexo xa Biblia xi nga mu khumbisako zona. I ta tlhela a wona a zigelo za ku tsumba lezi a Biblia gi zi wulako. Le nzhako ka Mahungu ya Mufumo i siyelwa xiwutiso xo tsakisa xa kuva a ehleketa hi xona a tlhela a kuciwa ku gonza zinwani.
3. Xana a Mahungu ya Mufumo N.° 38 ma ta nyikeliswa kuyini?
3 Lezi hi to nyikelisa zona: A tsima legi gi ta fana ni tsima ga ku nyikela a zirambo za Xialakanyiso kutani za gotsovanyano wa muganga. A madota ma ta nyika zileletelo xungetano hi lezi hi to nyikelisa zona lomu xipanzeni xa hina hi ku lanzela zileletelo zi nga ka papilo legi ma amukeleko ga 1 ka Abril wa 2013. A mabandla lawa ma nga ni xipanze xa xi tsongwani ma nga ti nyiketela kasi ku vuna mabandla ya lomu kusuhani lawa ma nga ni xipanze xa hombe. A xikhati u tekako a Mahungu ya Mufumo N.° 38, alakanya ku teka a ntsengo lowu u to wu lava ka viki lego ntsena. Nzeni ka xikhati xa tsima, hi nga ha nyikela Mahungu ya Mufumo lomu maruweni kutani ni kwihi hi kumanako ni vanhu loku hi mbhetile miti yontlhe xipanzeni xa hina. Loku a Mahungu ya Mufumo ma mbhela na yi nga se mbhela hweti, ku fanele ku tiriswa a mabhuku ma nyikelwako ka hweti leyo. Hi Mulongiso wo sangula, hi ta veka kupima tsimeni legi go hlawuleka wutshanwini ga ku sangula zigonzo za Biblia. Kumbheleni ka viki, hi fanele ku nyikela ni marevista laha hi zi wonako na zi ringana ku ma nyikela. Xana wa maha malulamiselo kasi ku tira hi kuhiseka tsimeni legi go hlawuleka ke?