Matshango

◼ Austrália: John, a nga munhu a gonzileko, i waya chechini wunwananeni gakwe. Kanilezi hi kufamba ka xikhati i lova “munhu a nga kholwiko ka Nungungulu.” A phayona go kari gi lo mu nyika broxura A Vida —  Teve um Criador? zonake ka lienzo li nga lanzela i lo mu nyika broxura Origem da Vida. A phayona legi gi lo simama ku hlakulela a kutsakela kakwe hi ku mu tela ni marevista ya maswa, gi ta mu komba tinzima ti wulawulako hi zivangwa ni ziprofeto za Biblia. A phayona lego gi lo nyika John a bhuku A Bíblia —  Palavra de Deus ou de Homem? a xikhati lexi gi nga wona lezaku za ringana. Anzhako ka kuva John a lerile a bhuku lego, i lo ti wula lezaku munhu a nga zi tiviko lezaku Nungungulu i kona ke. Anzhako ka lezo, a phayona lego gi lo vulula a bhuku A Biblia Gi Gonzisako, gi komba John a nzimana 8 ka phajina 20 ni tinzimana 13-16 ka maphajina 23-24. A mitsalo yi nga ka mahungu lawo yi lo mu khumba nguvu John laha ka kuva a wula lezi, “Kuzilava nza ha fanele ku tiva zinwani xungetano hi Biblia.”

◼ México: A wanuna wo kari i lo byela muhuweleli wo kari lezaku a nga kholwi ku a mahungu ya Biblia mata hi ka Nungungulu. A muhuweleli loye i lo zama tindlela ta ku mu komba zigelo zi kombako lezaku a mahungu ma nga lomu ka Biblia mata hi ka Nungungulu. Anzhako ka mabhulo yo kari, a mbilu ya wanuna loye yi lo sangula ku khumbiwa hi lezi a nga kari a gonza lomu ka Biblia. I khumbilwe nguvu a xikhati lexi a nga gonza hi matshinya ya milayo ya Nungungulu. I lo byela muhuweleli loye, aku: “Kusanguleni loku hi gonza zinwe Biblia, zi wa wonekisa ku khwatsi ho gonza wusungukati ga bhuku go fana ni manwani niku zi wa nga nzi khumbi. Kanilezi zalezi loku hi gi gonza, nguvunguvu a wusungukati ga gona xungetano hi mahanyela, gi khumba nguvu mbilu ya mina.”

◼ Estados Unidos: Na wu hi ka wukustumunyu go hlawuleka madoropeni ma nga ni vanhu vo tala, a patswa wo kari wu lo kuma wasati wa le Taiwan a nga kholwa ka Nungungulu, kanilezi a nga alakanya lezaku a Biblia ga vanhu va Estados Unidos ni va Europa. A wasati loye i lota laha ka meza yabye ya mabhuku hakuva i wa tizwa na a lahlekile hambu lezi a nga ganyile. I wa hi ni kutsumba ka lezaku a Biblia gi wa ta mu vuna a kuva ni kungo wutomini gakwe. A patswa lowo wu lo sangula xigonzo ni wasati loye hi ku tirisa a bhuku A Biblia Gi Gonzisako ni broxura Como Ter Verdadeira Paz e Felicidade. Wutshanwini ga ku gonza a xipimo 2 xa bhuku lego, va lo gonza a xipanze xa broxura lexi xi nge “Um guia prático para beneficiar toda a humanidade.” Anzhako ka ntlhanu wa tinzimana ni yinwe to ranga ta xipanze lexo, a wasati loye i lo kombisa kuhlamala hi lezi a Biblia gi hambeneko nguvu ni mabhuku manwani ya wukhongeli. Anzhako ka ku kambisisa ziprofeto za Biblia lezi zi tatisekileko, i lo wula lezi, “A ku na bhuku ginwani nzi gi alakanyako gi wulako lisine a ku fana ni Biblia!”

◼ Japão: A wanuna wo kari i lo byela muhuweleli wo kari lezaku a nga kholwi ka Nungungulu, kanilezi a muhuweleli loye i lo simama ku mu mahela maenzo yo koma, a mu komba a tinzima “Teve um Projeto?” ta Despertai! Hi kutsongwani-kutsongwani a wanuna loye i lo cica a mawonela yakwe zonake a sangula ku vumela lezaku kuzilava ku na ni Muvangi. Zalezi wa kholwa lezaku i kona Nungungulu, niku a muhuweleli loyi i gonza naye a broxura Mahungu yo Saseka ya Nungungulu!

◼ Canadá: A makabye wo kari wa xisati i lo nyikela marevista ka wasati wo kari a nga kari a suka laha kaya kakwe kasi ku ya nghena moveni wakwe. A xikhati lexi a makabye loye wa xisati a nga mu enzela kambe, a wasati loye i lo mu byela lezaku a nga lavi nchumu niku a nga kholwi ka Nungungulu. A makabye loye i lo boha ku tlhela a mu enzela kambe a ya mu nyika broxura Como Ter uma Vida Satisfatória. A xikhati lexi a makabye loye a nga kuma wasati loye laha kaya, i lo mu byela lezaku hambu lezi a zi tivako lezaku a wasati loye a nga kholwi ka Nungungulu, i wa tshama hi ku mu alakanyela hakuva i wa tiva lezaku a wasati loye i wa hi mupswali loyi a nga wundla vana yece. I lo mu komba a nzimana 6 ka phajina 4 ga broxura lego, leyi yi kombako lomu a nga kumako kona wusungukati ga gi nene. Anzhako ka lezo i lo mu kuca ku gonza a mahungu ma nga ka xigonzo 2 lexi xi wulawulako hi ku wundla vana. A wasati loye i lo teka a broxura lego hi kutsaka ka hombe nguvu.