“Tsombanyisa vanhu”
1. Kuyelana muni ku nga kona xikari ka migotsovanyano ya muganga ni ya matiko manyingi ni kutsombana ka vaIsraeli xikhatanyana nzhako ka kuva va sukile Gipite?
1 Xikhatanyana nzhako ka kuva Mosi a sukile Gipite, Jehova i lo mu leletela lezaku a “tsombanyisa vanhu” le Xitsungeni xa Sinai kasi vazwa mhaka Yakwe lezaku va mu chava va tlhela va gonzisa vana vabye a tindlela ta Jehova. (Deut. 4:10-13) Kunene lexo xi vile ximaho xo tiyisa kukholwa xi nga rivalekiko! Ka tihwetana ti lanzelako, a vanhu va Jehova va ta tlhangana migotsovanyanweni ya muganga ni ya matiko manyingi kasi ku gonzisiwa hi Jehova. Zini hi faneleko ku maha kasi hi vuneka khwatsi?
2. Zini hi faneleko ku maha kasi ku “ti longisela” kuya gotsovanyanweni wa hina?
2 ‘Ti longisele’: Jehova i layile vaIsraeli lezaku “va ti longisela” kasi kuya mutlhanganweni lowo wa lisima le Xitsungeni xa Sinai. (Ekso. 19:10, 11) Hi kufanana, a ku ti longisela khwatsi ka laveka ka vontlhe lava va tova kona ka migotsovanyano, na ku nga hi ntsena lava va tova ni xipanze ka longoloko. Hi xikombiso, a vanyingi va fanele ku kombela xikhati mitirweni yabye ya kutihanyisa. Kuzilava a xiyimo xa wena xa fana ni xa Nehemia. I wa lava ku tsika ntiro wakwe kota mucheleteli wa zakunwa za Hosi Artaxerxesi lezaku aya Jerusalema a ya aketa ligingisi, kanilezi i wa zi tiva lezaku a hosi yi nga tshuka yi ala. Nehemia i lo maha mukhongelo, zonake hi ku tiya hlana a maha xikombelo xakwe hi xichawo. A hosi yi lo vumela, laha ko tlhela yi mu vuna ntiro wakwe wo aka! (Neh. 2:1-9) Ahandle ka ku kombela xikhati ka mulungu wa wena, xana u mahile malulamiselo ya mafambela ni ko tshama kona ke? A madota ma ta tsaka hi ku vuna ni wihi a nga ha lavako xivuno. Maha malulamiselo ya kuva u chikela mahlweni ka xipanze xinwe ni xinwani, u tlhela u longa a “ku chela kota nguvu hi timhaka leti” u to tizwa. — Maheb. 2:1.
3. Xini xi to hi vuna ku longisela a mbilu ya hina?
3 A nchumu wunwani wa lisima wa kulonga, wu patsa ku longisela mbilu ya hina lezaku hi ingisa hi tlhela hi gonza. (Ezra 7:10) A longoloko wa gotsovanyano wu ta vekiwa na ka ha hi mahlweni lomu ka site jw.org niku wu tava ni tihloko ta mhaka ta tikanelo tontlhe, ni mutsalo-tshinya wunwe kutani yimbiri ka kanelo yinwe ni yinwani. Lezi zi nyika mahungu ya ma nene nguvu ya ku bhula hi wona ka Wukhozeli ga hina ga Ngango ka maviki ya mahlweni ka gotsovanyano wa hina. A vahuweleli vo kari va gandla a longoloko lowo zonake va wu tirisela ku tsala timhaka to kari nzeni ka gotsovanyano.
4. Xana a vapswali va nga yi lonzowotisa kuyini migotsovanyano kasi ku gonzisa vana vabye?
4 ‘Gonzisa vana va wena’: A ginwe ga makungo ya gotsovanyano wa le Xitsungeni xa Sinai ku wa hi lezaku a vapswali va vaIsraeli va “gonzisa a vanana vabye.” (Deut. 4:10) A gotsovanyano wu nyika vapswali a lungelo ga ku maha zalezo. A vapswali va fanele ku tshama ni vanana vabye ka xikhati xa longoloko va tlhela va va vuna ku demba ndleve. Kugumeseni ka siku ginwe ni ginwani ni nzhako ka wukhozeli gabye ga ngango, a mingango yi nga bhula zinwe hi longoloko.
5. Hi ta vunekisa kuyini hi kuva kona ka gotsovanyano lo’wu tako?
5 A gotsovanyano wa lisima, wa le Xitsungeni xa Sinai, wu vunile vaIsraeli a ku tsakela lungelo gabye gi nga faniko ni ginwani ga kuva vanhu va Nungungulu. (Deut. 4:7, 8) A gotsovanyano wa hina lo’wu tako wu mahelwe ku hi vuna hi ndlela yo fana. Ka masiku lawo ya manharu hi ta zi kota ku huma xiwuleni xo biha xa tiko ga Satani zonake hi ti buza hi kutangala ka moya ni ku akana hi wunakulobye paradiseni ga hina ga moya. (Isa. 35:7-9) Laha a siku ga Jehova gi tshinelako kusuhani, ngha hi nga tsiki lungelo legi ga ku tlhangana zinwe kasi ku tiyisana! — Maheb. 10:24, 25.