Ingisela u tlhela u gonza
1. Hikuyini ku tshukako ku laveka a kutikarata ka hombe kasi ku ingisela hi tlhela hi gonza gotsovanyanweni wa muganga?
1 A migotsovanyano ya muganga ya 2013 yi ta sangula lokuloku. Ku sina ku mahilwe a ntiro wa hombe wa ku longisela a mutlhangano lowo wu khumbako a zilaveko za misava yontlhe. Xana u sangulile ku maha malulamiselo kasi uva kona ka masiku wontlhe ya manharu ya gotsovanyano? A migotsovanyano ya hombe yi nga ha va ni zilo zo tala za ku colopetela, hikwalaho ku laveka kutikarata ka hombe kasi ku ingisela khwatsi a longoloko. Kota lezi a nzima yinwe ni yinwani yi lehileko ku hunza a mitlhangano ya bandla, zi lava ku hi demba ndleve hi xikhati xo leha. Tlhatakumbiri, a pfhuka wa kuta hi kaya ni zilo zinwani zi nga ha vanga a mikaralo yo kari. Xini xi to hi vuna ku demba ndleve kasi hi ingisela hi tlhela hi gonza? — Deut. 31:12.
2. Xana hi nga longiselisa kuyini a mbilu ya hina kasi hi vuneka hi gotsovanyano?
2 Mahlweni ka gotsovanyano: Lomu ka Web site ya hina ya nayo, www.jw.org, ku na ni longoloko wa gotsovanyano, lowu wu nga ni tihloko ta mhaka ta tikanelo tontlhe ni mutsalo wunwe kutani yimbiri ka yinwe ni yinwani ya tona. Loku hi hi ni wuzikoti ga ku nghena ka Internet, a ku ranga hi wona mahungu lawo na ka ha hi mahlweni zi ta hi vuna ku longisela a mbilu ya hina kasi hi vuneka khwatsi ka lezi zi to kanelwa. (Ezra 7:10) Ka Wukhozeli ga nwina ga Ngango, xana mu nga bhulisana hi longoloko lowo kasi zontlhe a ziro za ngango zi langutela a gotsovanyano hi mahlo yo pswhuka?
3. Xini xi to hi vuna a kuva hi ingisela khwatsi?
3 Laha gotsovanyanweni: Loku zi koteka, famba xipetsweni na ku nga se sangula a longoloko. Tima a fone ya wena lezaku yi nga ku colopeteli hi ku vitana kutani ku nghena timesaje, kutani ku ringwa kuva u tsalela vanwani mahungu xikari ka longoloko. Loku u nga timangi a fone ya wena, yi veke ka xiyimo xa ku yi nga colopeteli vanwani loku u tshuka u fonelwa. Loku u tirisa a muchini wo kari xikari ka longoloko, wu tirise hi ndlela ya kuva wu nga colopeteli vanwani. Potsa a kuga kutani kunwa xikari ka longoloko. (Mutsh. 3:1) Cuwuka a mukaneli. A xikhati lexi ku gonziwako mutsalo, lanzela lomu ka Biblia ga wena. Tsala a timhaka leti u tsakelako ku ti tirisa wutomini ga wena.
4. Xana a vapswali va nga vunisa kuyini vana vabye lezaku va ingisela va tlhela va gonza?
4 Hi lava lezaku a vana va hina va ingisela va tlhela va gonza na vonawu. Mavingu 29:15 i ngalo: “A nwanana loyi a tsikwako a ti fuma, a wisa tingana nyine wakwe.” Hikwalaho, zi nene ku a ngango wu tshama zinwe kasi a vapswali va tiyiseka lezaku a vana vabye va demba ndleve ka longoloko wutshanwini ga ku bhula, ku tsala timesaje, kutani ku fambafamba. Hambu loku va ha hi vatsongwani nguvu, a vanana va fanele ku gonziswa a ku tshama na va khindlimukile va tlhela va nga vangi guwa.
5. Hikuyini zi nga zi nene a ku vuxeta lezi hi zi gonzileko, niku hi nga zi mahisa kuyini?
5 Anzhako ka longoloko wa siku ginwe ni ginwani: U nga tsiki wusiku gi tiyela na u nga se etlela. Hatlisa ku etlela kasi u humula khwatsi. A ku vuxeta lezi u nga gonza zi ta ku vuna a ku zi alakanya hi xikhati xo leha. Hikwalaho, zi tava zi nene a kuva mu tshama timeneti to kari siku ni siku mu bhulisana kota ngango hi lezi mu zi gonzileko ka siku lego. Loku uya restaurante ni vanghana, zi ngo yini loku u teka a phepha legi u nga tsala zo kari kasi ku va bhulela lezi zi nga ku tsakisa nguvu? Loku mu tlhela kaya anzhako ka gotsovanyano, mu nga ha mbheta xikhati xo kari ka Wukhozeli ga nwina ga Ngango na mu bhulisana hi lezi a ngango wu nga tirisisako zona lezi mu nga zi gonza. Mu nga ha ti siyela xikhati kambe viki ni viki kasi ku gonza a xipanze xo kari xa bhuku ginwe ni ginwani ka lawa ma humesilweko.
6. Xana za enela a kuva hi kumeka laha gotsovanyanweni? Tlhamusela.
6 Laha ka mubuzo, a hi nge vuneki loku hi ngagi a zakuga za kona hi tlhela hi bohlisa. Hi nga ha wula zalezo hi mubuzo wa moya lowu wu nyikelwako ka gotsovanyano wa muganga. Hi ta vuneka nguvu loku hi kumeka ka zipanze zontlhe za gotsovanyano, hi ingisela khwatsi hi tlhela hi tirisa lezi hi to zi gonza.