Tisimu tiswa ta wukhozeli
1 Ka mutlhangano wo gumesa wa Sociedade Torre de Vigia de Bíblias e Tratados de Pensilvânia, wu mahilweko hi 4 ka Outubro wa 2014, ku tivisilwe makungo ya ku chukwatisa a bhuku ga tisimu legi hi gi tirisako. Lawo mave mahungu yo tsakisa hakunene! Vontlhe lava va nga hi kona va lo alakanyiswa a lisima leli a tisimu ta Mufumo ti faneleko kuva nalo wukhozelini. — Tis. 96:2.
2 U nga ha hlamala, uku: ‘Hikuyini a bhuku ga tisimu gi lavako ku chukwatiswa?’ Ku na ni zigelo zo tala. Xo sangula ka zontlhe, a kuzwisisa ka hina Mitsalo kuya mahlweni ku chukwatiswa, niku lezo zi khumba a magezu ya tisimu ta hina. (Mav. 4:18) A xinwani xigelo hi lexi: A magezu yo tala ma tirisilweko ka bhuku legi hi nga nago zezi ga tisimu ma susilwe ka Tradução do Novo Mundo le’ga kale hi xiNgiza. A magezu lawo ma fanele ku ciciwa kasi ma longoloka ni lawa ma nga ka legi ga giswa. Kota lezi wu nga ntiro wa hombe a ku chukwatisa a tisimu leti, ku bohilwe kuva ku engetelwa tisimu tiswa ka bhuku ga hina.
3 Xana zi ta boha a kuva hi rinzela kala ku gandliwa a bhuku giswa ga tisimu kasi ku sangula ku ti tirisa ke? Ahihi. Hi tsakela ku mu tivisa lezaku ka tihweti ti lanzelako, ku ta humesiwa tisimu to tala ta tiswa lomu ka site ya hina, jw.org. Neti ku huma lisimu liswa, li ta vekiwa magumo ka longoloko wa Mutlhangano wa Ntiro na li tsalilwe ku “lisimu liswa.”
4 Ndlela yo gonza a tisimu tiswa: Za karata ku gonza lisimu liswa. Hambulezo, a ku fana ni muyimbeleli wa tisimu, hi lava ku yimbelela mitlhanganweni ya bandla, hi “nga miyeli.” (Tis. 30:12) Kasi ku gonza lisimu la liswa, lanzela zigava lezi zi lanzelako.
• Ingisela hi kuphindaphinda a wucenje gi thepilweko ga piyano, legi gi to cheliwa ka site ya hina. Laha u yako u ingisela a lisimu lelo, zi taya zi ku olovela ku li alakanya.
• Gonza a magezu ya lona u tlhela u ma hlayisa hlokweni.
• Bisa wucenje lego na u yimbelela hi ku lanzela a maphepha ya kona. Maha lezo kala u li pasa.
• Vuxetani a tisimu tiswa ka Wukhozeli ga Ngango kala a ngango wa nwina wu ti tolovela.
5 Ka tihweti ti lanzelako loku a lisimu lo kari la liswa li vekilwe magumo ka longoloko wa Mutlhangano wa Ntiro, a bandla gi ta ranga hi ku ingisela khati ginwe a wucenje gi thepilweko ga piyano. Hi kulanzela a vaingiseli va ta yimbelela a lisimu lelo na va lanzelela a wucenje ga piyano, a ku fana ni lezi hi mahako hi le’tinwani.
6 Loku u ehleketa khwatsi u ta zi wona lezaku a ku yimbelela mitlhanganweni zi nyika litsako la kuva hi dumisa Jehova hi wumunwe hi magezu ya hina. Hikwalaho, a hi fanelangi kuva ni tolovelo wa ku huma na ku nga hi na xilaveko loku xi chikela xikhati xa ku yimbelela mitlhanganweni ya wuKristu.
7 Ku na ni ndlela yinwani leyi hi nga kombisako ha yona ku bonga a wucenje ga hina go basa. Mitlhanganweni ya xipanze ni migotsovanyanweni, ka bisiwa wucenje na xipanze xinwe ni xinwani xi nga se sangula. A vamakabye va hina va matlhelo wontlhe ya misava va enza kumbiri hi lembe vaya Patterson, Nova York, hi mali ya vona wutsumbu kasi ku ya chaya tisimu to saseka lezaku hi ti tirisa wukhozelini ga hina. Hikwalaho, loku a mukhomi wa nzima a hi kombela ku tshama, hi ingisela wucenje legi gi longiselweko, hi fanele ku maha zalezo. A ku maha lezo zi ta hi vuna ku longisela a timbilu ta hina kasi kuzwa timhaka leti ti to lanzela. — Ezra 7:10.
8 Hi ta gumesa a mutlhangano wa hina nyamutlha, hi ku yimbelela lisimu liswa li nga ni hloko ya mhaka ‘A Mufumo wu yimisilwe — a wute!’ A lisimu leli, li humesilweko ka mutlhangano wa lembe lowu wa ha hi ku hunzako, li mahelwe nguvunguvu ku funga a xialakanyiso xa 100 wa malembe ya kupswaliwa ka Mufumo.
9 A tisimu ta hina ta tiswa hakunene “zilo zi nene” zi tako hi ka Jehova. (Mat. 12:35a) Ngha hi ti yimisela ku gonza tisimu leti ta tiswa hi tlhela hi ti yimbelela hi mbilu, hi nyikela wudzunzo ni wudumo gi faneleko ka Nungungulu! — Tis. 147:1.