A milayo leyi . . . yi tava mbilwini ya wena
A vapswali va fana ni varisi. Va fanele ku hlayisa khwatsi vana vabye, lava zi olovako kuva va lahleka va tlhela vava mhangweni. (Mav. 27:23) A vapswali va nga gi tatisisa kuyini a wutihlamuleli legi? Siku ni siku va fanele ku ti nyika xikhati va bhula ni vana vabye kasi ku tiva lezi zi nga maalakanyweni yabye ni timbilwini tabye. (Mav. 20:5) A vapswali va fanele ku aka kambe hi zitiro zi nga swiko kasi ku tiyisa kukholwa ka vana vabye. (1 Kor. 3:10-15) A vidiyu “Marito Lawa . . . Ma Fanele Ma Va eMbilwini Ya Wena” yi khanyisa a lisima la wukhozeli ga ngango. Hikwalaho, yi hlaleleni kota ngango mu tlhela mu bhulisana hi ziwutiso lezi zi lanzelako.
(1) Xini xi nga maha ngango wa va ka Maswanganye wu tsika ku rangisa zilo za moya? (2) Hikuyini Makabye Maswanganye a nga kala ku humelela ka khati go sangula a nga ringisa ku maha wukhozeli ga ngango? (3) I mahela muni ga Mitsalo gi vunako ku wundla khwatsi vana? (Deut. 6:6, 7) (4) Xini xi nga vunako ngango lezaku wuva ni kubhulisana ku nene? (5) Kutikarata muni loku a vapswali va faneleko ku mahela vana vabye? (6) Vamakabye Mathevula va wu vunisile kuyini a ngango wa va ka Maswanganye? (Mav. 27:17) (7) A hloko ya ngango yi fanele ku maha yini na ka ha hi mahlweni kasi a wukhozeli ga ngango gi famba khwatsi? (8) Makabye Maswanganye i cicisile kuyini a zilo ngangweni wakwe? (9) Hikuyini a ku khomelela a longoloko wa wukhozeli ga ngango zi nga za lisima? (Efe. 6:4) (10) Hi wahi a mawonela yo kari ma vunako wukhozelini ga ngango? (11) Makabye Maswangane i wulawulile hi kurula, ni kutiya kambe hi ndlela muni a xikhati a nga vuna Wisani lezaku a wona a lisima la ku maha lezi zi nga zi nene? (Jer. 17:9) (12) Makabye Thomasi na makabye Monika va mu vunisile kuyini Basani a ku maha xiboho xa xi nene xungetano hi wunghana legi a nga hi nago na Nyiko? (Mar. 12:30; 2 Tim. 2:22) (13) Makabye Thomasi na makabye Monika va kombisisile kuyini kukholwa a xikhati va nga cica zo kari wutomini gabye? (Mat. 6:33) (14) A vidiyu leyi yi khanyisisa kuyini a xilaveko xa ku a tihloko ta mingango ti gisa mingango ya tona hi tlhelo ga moya? (1 Tim. 5:8) (15) Kota hloko ya ngango, zini u ti yimiseleko ku maha?
XIALAKANYISO KA TIHLOKO TA MINGANGO: A drama leyi ya zilo za masiku ya hina yi kombisilwe ka migotsovanyano ya miganga hi 2011. Xikhatini lexo, u wonile xilaveko xa ku chukwatisa zokari ka wukhozeli ga nwina ga ngango? Ahati zalezi ke? Loku ka ha laveka kucica kunwani, khongela hi zona u tlhela u maha kucica loko ku to vuna a ngango wa wena kala kupinzuka. — Efe. 5:15-17.