Ndlela yo tirisa bhuku — Zini lezi a Biblia gi hi gonzisako?

A bhuku Hi gonzise ni bhuku Biblia gi gonzisako ma fana. A mabhuku lawa ma humako lomu ka kaxa ga hina ga zitiro za ku gonzisa, ma xaxametile lisine la leli la linwe ma tlhela ma li tlhamusela hi ndlela yo fana. Hambulezo, a bhuku Hi gonzise gi tirisa magezu yo olova niku a gi karati ku gi zwisisa. Gi mahelwe lava kuzilava zi va karatelako ku zwisisa a bhuku Biblia gi gonzisako. A bhuku Hi gonzise a gi na xiengetelo, kanilezi gova ni mitlhamuselo, yi tlhamuselako magezu ni timhaka to kari ti kumekako lomu ka xipimo. A zipimo za gona, a zi na ziwutiso laha kusanguleni ne kwadru ga kuvuxeta. Kanilezi, gova ni kwadru ga timhaka-tshinya ta lisine la Biblia leli li nga tlhamuselwa lomu ka xipimo lexo. A ku fana ni bhuku Biblia gi gonzisako, a bhuku Hi gonzise gi nga nyikelwa ni ka xihi xikhati, hambu loku gi nga hi gona gi nyikelwako ka hweti leyo. Makunu a xikhati lexi hi fambisako xigonzo xa Biblia, hi nga zi tirisisa kuyini a zipanze lezi zi kumekako ntsena lomu ka bhuku legi?

KWADRU GA TIMHAKA-TSHINYA: Ka vanhu vo tala a ku fambisa zigonzo za Biblia hi ku lera nzimana lomu ka bhuku Biblia gi gonzisako hi gumesa hi maha xiwutiso, zi tolovela ku vuna nguvu. Hambulezo, a hi nga zi vekeni laha kaku a munhu loye a nga li tivi khwatsi lirimi leli hi gonzako hi lona niku a nga zi koti ku lera khwatsi. Ka ziyimo lezo, u nga fambisa xigonzo hi ku tirisa bhuku Hi gonzise. Hi kulanzela, ku nga ha tirisiwa a kwadru ga timhaka-tshinya, u gumesa u mu kuca ku a sala a ti lerela xipimo xontlhe. A lisine linwe la Biblia li nga gonzisiwa hi xipimo xa 15 wa timeneti. Kota lezi a kwadru ga timhaka-tshinya gi nga hiko ni mitlhamuselo yo tala leyi yi nga lomu ka xipimo, a mugonzisi i fanele ku longisela khwatsi na a alakanyela lezi zi to vuna xigonzani xakwe. Loku u fambisa xigonzo hi ku tirisa xipimo xontlhe, a kwadru ga timhaka-tshinya mu nga gi tirisa kasi ku vuxeta hi gona.

MITLHAMUSELO: Lezi zi tlhamuselwako ka xipanze lexi, zi xaxametilwe hi kuya hi lezi zi nga lanzelisanisa zona lomu ka bhuku gontlhe. A mugonzisi a nga ha hlawula ku va gonza mitlhamuselo ka bhuku Hi gonzise zalezi a fambisako xigonzo lexo kutani hi xikhati xinwani.