U hlakana na mani lomu ka Internet?

Ku wuliwa lezvaku a vanghana hi lava va randzanako va tlhela va kombisana cichavo. Hi cikombiso, Jonatani na Dhavhidha va sangulile wunghana go tiya nguvhu andzhako ka loku Dhavhidha a dele Goliyate. (1 Sam. 18:1) Mun’we ni mun’we i wa hi ni matshamela ma nga tsakisa mun’wani. Hi cigelo leco, kasi a vanhu vava vanghana va hombe, zvi lava ku va tivana khwatsi. A ku tiva munhu zvi lava ku ti karata niku zvi teka cikhati. Hambulezvo lomu ka Internet, zva olova nguvhu a ku kuma vanhu va ku u nga ti byela ku vanghana — u va kuma hi ku thitha basi. Phela lomu ka Internet a munhu i ranga hi ku pimisa khwatsi lezvi a lavako ku wula, a tlhela a hlawula lezvi a lavako ku tivisiwa zvona. Lezvo zvi maha ku zvi olova a ku va fihla lezvi hakunene va nga zvona. Hikwalaho, zvi lava ku hlola khwatsi u tlhela u tiva ku hlawula lava u to vhumela ku vava vanghana va wena. Loku a wokari u kalako u nga mu tivi khwatsi a kombela ku maha wunghana na wena, u nga chavi ku ala hi ku alakanya ku a nga khunguvanyeka. Kota lezvi zvi nga ni mhango a ku maha wunghana hi Internet, a vokari va zvi wonile zvi hi chukwana ku nga mahi futsi. Hambulezvo, loku u hlawula ku maha wunghana hi Internet, zvini u nga faneliko ku zvi rivala?

SIXTIRA VHIDHIO TIRISA INTERNET HI WUTLHARI, U GUMESA U HLAMULA ZVIWUTISO LEZVI:

• 

  Zvini u faneleko ku ehleketa hi zvona na u nga se chela mifota kutani ku tsala zvokari ka Internet?

• 

  Hikuyini u faneleko ku hlawula khwatsi a vanghana ka Internet?

• 

  Hikuyini u faneleko ku ti pimela cikhati u mbhetako na u hlakana lomu ka Internet? — Efe. 5:15, 16