Papilo Ga Hubye Yi Fumako
Timboni-kulori Ta Jehova Ti Ranzekako:
Hakunene hina hi vanhu va nga ni thomo hi lezi hi vitaniwako hi vito ga Hosi ya Hombe Wuakweni Gontlhe, Jehova! A vito lego ga pinzukelwa, a gi fuvi, niku a gi na kuecanyiswa. Hi Jehova loyi a hi nyikileko a vito gakwe, niku nguvunguvu kusukela lembe ga 1931, hi vitaniwa hi vito lego go hlawuleka. (Isa. 43:10) Hi tizwa matshanza ya hombe hi ku ti tivekisa kota Timboni ta Jehova.
Diabolus i zama hi tindlela tontlhe a ku fuvisa a vito ga Nungungulu. Na ma rangelwa hi yena, a matiko ma ala a vito ga Jehova. Babuloni wa Hombe, a mufumo wa misava yontlhe wa wukhongeli ga mawunwa, i venga a vito ga Nungungulu a tlhela a gi susa ka wuhunzuluseli go tala ga Biblia. A ku hambana ni lezo, Jesu i wa nyika nguvu lisima a vito ga Dadani wakwe, a gi rangisa mukhongelweni wa xikombiso lowu a wu gonzisileko a valanzeli vakwe. Yena i te ngalo: “Hikwalaho khongelani kota lezi: Dadani wa hina wa le tilweni, a vito ga wena a gi hlawuliwe [basiswe, NM].” (Mat. 6:9) Anzhako ka lezo, na a khongela ka Dadani wakwe hi mbilu yontlhe, yena i te ngalo: “Nzi wonekelisile a vito ga wena ka vanhu lava u va tekileko tikweni u nzi nyika vona.” (Joh. 17:6) A xikhati lexi hi lanzelako a xikombiso xa xi nene xa Jesu, hi ti yimisela nguvu a ku hunza zikhati zontlhe a ku huwelela a vito ga Jehova hi ntamu misaveni yontlhe.
A mutsalo wa lembe ga 2009, ‘Nyika wukustumunyu go mbhelela hi mahungu yo saseka,’ wu hi kucile a ku tatisa a wutireli ga hina. (Miti. 20:24) A ku na kukanakana ka lezaku Jehova i katekisile nguvu a mizamo ya hina ka lembe ga ntiro gi hunzileko. Ku nyikilwe wukustumunyu ga ntamu misaveni kasi ku dzunza a vito ga Jehova. A ntsengo wuswa wa 7.313.173 wa vahuweleli va tlhanganyisile a magezu yabye va xumayela vanhu vontlhe, zinwe ni ku gonzisa vanhu va timbilu ti nene lava va hlotako tindlela ta ku tlhatlha a zikarato zo tala lezi va yimisanako nazo siku ni siku. A ntsengo lowu wa 18.168.323 wa vanhu va vileko kona Xialakanyisweni xa kufa ka Kristu wu komba lezaku ka ha hi ni vanhu va timiliyoni lava kuzilava va to vitana a vito ga Jehova na magumo ya mafambisela lawa ya kubiha ya zilo ma nga se chikela.
Loku Jehova a ha vumelela, hi ta simama a ku xumayela a mahungu yo saseka ya Mufumo hi kuchivirika, na hi tirisa a tindlela tontlhe ti kotekako kasi ku chikelela vanhu lomu zipanzeni za hina. (Mat. 24:14; Mar. 13:10) Kani hi tira hi muti-ni-muti, lomu maruweni, hi ku tsala mapapilo ni ku kustumunya hi telefone, kutani hi xitshuketi, ngha hi ti karatela a ku tivisa a vito ga Jehova ni kungo gakwe ka vanhu vo tala hi laha hi zi kotako ha kona.
Hi na ni zigelo zontlhe za ku kholwa lezaku lokuloku Jehova i ta maha xo kari kasi ku basisa a vito gakwe. (Eze. 36:23) A xikhati xa tshinela hi xihatla laha vontlhe lava va gi chakisako va ta nga miyetwa. Hakunene gi tava siku ga hombe ka malanza wontlhe ya Jehova yo tsumbeka, lawa ma tivekisileko a vito ga Jehova ni ku seketela a wuhosi gakwe ga wuako gontlhe!
A kukhatala ka Jehova ka liranzo hi vanhu vakwe ku wonekile khwatsi Migotsovanyweni ya Miganga ni ya Matiko Wontlhe “Tshamani Na Mu Rinzele!” leyi yi mahilweko misaveni yontlhe hi 2009. A migotsovanyano leyo yi vile ximaho xa lisima nguvu matinwini ya hina ya ku tirela Nungungulu, yi hi kuca a ku tlharihela a xilaveko xa ku tshama na hi rinzela a siku ga Jehova. — Mar. 13:37; 1 Tes. 5:1, 2, 4.
Hakunene Jehova mu nene; i tata a timbilu ta hina hi litsako. Wa hi etlelisa mikoveni yo nyuka a tlhela a hi rangela matini ya malenga. — Tis. 23:1, 2; 100:2, 5.
Ngha a makatekwa ya Jehova ya simasima mava hehla ka nwina a xikhati lexi mu simamako mu khomekile ntirweni wa Mufumo ka tihweti ti tako!
Ngha a liranzo la wuKristu liva hehla ka vamakabye va hina misaveni yontlhe,
Vamakabye va nwina,
Hubye yi Fumako ya Timboni ta Jehova