Engetela litsako la wena nguveni leyi ya Xialakanyiso!
1. Hi yihi a yinwe ya tindlela ta ku engetela litsako nguveni leyi ya Xialakanyiso?
1 Xana wa tsakela ku engetela litsako la wena hi Março, Abril, ni Maio? A yinwe ya tindlela to maha lezo ku engetela a wutireli ga wena u tlhela u teka wuphayona go vunetela loku zi koteka. Hikuyini lezo zi to ku engetela litsako?
2. Xana a ku engetela wutireli ga hina zi engetelisa kuyini a litsako la hina?
2 Engetela litsako la wena: Jehova i hi vangile hi ndlela yaku hi kuma litsako hi ku mu khozela laha hi tatisako a xilaveko xa hina xa moya xa mabeleko. (Mat. 5:3) I hi mahile hi ndlela yaku hi kuma litsako kambe hi ku nyika vanwani. (Miti. 20:35) A wutireli gi hi vuna ku maha zontlhe — a ku khozela Nungungulu ni ku vuna vanwani. Zi te dlunya lezaku a ku engetela wutireli zi ta hi engetela litsako kambe. Tlhatakumbiri, laha hi xumayelako nguvu hiya hi engetela a wutlhari ga hina kambe. A wutlhari lego gi hi nyika kutsumba gi tlhela gi hungula kuchava. Hi ta vululekelwa hi tindlela to tala ta ku nyika wukustumunyu ni ku sangula zigonzo za Biblia. Zontlhe lezo zi maha wutireli gi tsakisa nguvu.
3. Hikuyini a Março ni Abril ti nga tihweti ta ti nene nguvu ta ku teka wuphayona go vunetela?
3 Março ni Abril ti tava tihweti ta ti nene nguvu ta ku teka wuphayona go vunetela hakuva hi nga hlawula ku tira a 30 kutani 50 wa tihora. Ahandle ka lezo, kusukela Mulongiso wa 22 ka Março kala ka siku ga Xialakanyiso hi 14 ka Abril, hi tava ni tsima go tsakisa ga ku ramba vanwani lezaku vata Xialakanyisweni. A mabandla ma ta tala hi kutsaka laha a votala va to tira “hi mbilu yinwe” kasi ku eneta xipanze xa hombe nguvu hi laha zi kotekako hi kona. — Zef. 3:9.
4. Loku hi lava ku maha maphayona yo vunetela, zini hi faneleko ku maha?
4 Ti longisele zalezi: Loku u nga se maha lezo, ti nyike xikhati xa ku hlola matirela ya wena, u wona lezi u nga cicako kasi ku engetela wutireli ga wena ka hweti yinwe kutani ku hunza. Khongela hi zona. (Jak. 1:5) Bhula hi zona ni va ngango wa wena zinwe ni vanwani lomu bandleni. (Mav. 15:22) U nga ha pola lezaku hambu lezi u nga ni zikarato za mababyi kutani u tshamako na u khomekile, wenawu u nga zi kota ku kuma litsako la kuva phayona go vunetela.
5. Mabhinzu muni ma tova kona loku hi engetela wutireli ga hina nguveni leyi ya Xialakanyiso?
5 Jehova i lava lezaku a malanza yakwe ma tsaka. (Tis. 32:11) Loku hi ti karatela ku engetela wutireli ga hina nguveni leyi ya Xialakanyiso, hi nga ta engetela litsako la hina ntsena, kanilezi hi ta tlhela hi tsakisa Dadani wa hina wa le tilweni. — Mav. 23:24; 27:11.