Ti karatele ku sasekisa a paradise ga hina ga moya

1, 2. Lomu ka Mitsalo ya xiHeberu, a gezu “xikhegetelo xa mikonzo” gi nga wula yini?

JEHOVA NUNGUNGULU i huwelele hi kufaneleko aku: “A tilo xitshamu xa mina xa wuhosi, a misava xikhegetelo xa mikonzo ya mina.” (Isa. 66:1) Xungetano hi “xikhegetelo xa mikonzo” yakwe, Jehova i engeta aku: “Nzi ta ngangamelisa a wutshamu legi ku yimileko ka gona a milenge ya mina.” (Isa. 60:13) I zi mahisa kuyini lezo? Niku lezo zi wula yini ka hina, kota lezi hi hanyako ka “xikhegetelo xa mikonzo” ya Nungungulu?

² Ahandle ka ku wula misava, a gezu “xikhegetelo xa mikonzo” ga tiriswa kambe hi ndlela yo fananisa ka Mitsalo ya xiHeberu kasi ku tlhamusela a tempeli ya kale leyi yi nga tiriswa hi vaIsraeli. (1 Kro. 28:2; Tis. 132:7) A tempeli leyo, yi nga hi laha misaveni, yi wa tiriswa kota tsinza ga wukhozeli ga lisine. Hi xigelo lexo, yi wa sasekile hakunene mahlweni ka Nungungulu, niku a kuvakona ka yona ntsena ku wa dumisa a wutshamu ga mikonzo ya Jehova.

3. Xini a tempeli ya hombe ya moya ya Nungungulu, niku yi sangulile rini kuva kona?

³ Inyamutlha a tsinza ga wukhozeli ga lisine a ka ha hi tempeli ya xiviri laha misaveni. Hambulezo, ku na ni tempeli ya moya leyi yi dumisako Jehova ku hunza muako wa ni gihi tshamela. Legi i lulamiselo gi hi vululelako ndlela ya ku vuxa kuzwanana ka hina na Nungungulu hi ku tirisa a wupristi ni muphahlo wa Jesu Kristu. Gi sangulile kuva kona hi 29 Nguveni ya Hina kubapatizweni ka Jesu, a xikhati lexi Jesu a nga totiwa kota Mupristi wa Hombe wa tempeli ya hombe ya moya ya Jehova. — Maheb. 9:11, 12.

4, 5. a) A Lisimu 99 li ku tlhamuselisa kuyini a kuxuva ka hombe loku a vakhozeli va Jehova va nga nako? b) Xiwutiso muni lexi munwe ni munwani wa hina a faneleko ku ti wutisa?

⁴ Hi ku bonga a lulamiselo ga tempeli ya moya, hi dumisa Jehova hi ku tivisa a vito gakwe hi tlhela hi mu dzunza hi kota ya lulamiselo gakwe ga wuxinji ga ku hi longiselela nzhiho. A zo ku tsakisa a ku tiva lezaku inyamutlha ku na ni xipimo xa 8 wa timiliyoni ta maKristu ya lisine ma dumisako Jehova hi kuhiseka! A ku hambana ni vanhu vo kari va wukhongeli lava va alakanyako lezaku va ta dumisa Nungungulu anzhako ka kuva va sukile misaveni vaya tilweni, a Timboni tontlhe ta Jehova ta zi tiva lezaku ti fanele ku dumisa Nungungulu zalezi niku kwalaha misaveni.

⁵ Hi ndlela leyo, hi lanzela a xikombiso xo tsumbeka xa malanza ya Jehova xi tlhamuselweko ka Tisimu 99:1-3, 5-7. (Gonza.) A lisimu leli li komba lezaku Mosi, na Aroni, na Samueli va seketele a lulamiselo ga wukhozeli ga lisine masikwini yabye hi ntamu wabye wontlhe. Inyamutlha, a misalela ya vamakabye va totilweko va Jesu lava va kalako va nga se famba kasi ku ya tira naye kota vapristi le tilweni va tira hi kutsumbeka xipanzeni xa laha misaveni xa tempeli ya moya. Va seketelwa hi timiliyoni ta “tiyivu tinwani” ta Jesu. (Joh. 10:16) Hambu lezi yi nga ni kutsumba ko hambana, a mitlawa leyi ya yimbiri yi khozela Jehova hi wumunwe laha xikhegetelweni xa mikonzo ya Nungungulu. Kanilezi, a munwe ni munwani wa hina i fanele ku ti wutisa lezi: ‘Nza gi seketela hi kumbhelela a lulamiselo ka Jehova ga wukhozeli gi basileko ke?’

HI VAMANI VA TIRAKO TEMPELENI YA NUNGUNGULU YA MOYA?

6, 7. Xikarato muni xi nga humelela xikari ka maKristu yo sangula, niku zini zi nga laveka anzhako ka mazana ya malembe?

⁶ Na ku nga se hunza zama ga malembe na a bandla ga wuKristu gi yimisilwe, a wuhluwuki legi ku nga wulilwe lezaku gi wa ta humelela, gi lo sangula ku woneka. (Miti. 20:28-30; 2 Tes. 2:3, 4) Kusukela kwalaho, zi lo karata nguvu a ku tiva lava hakunene va nga tirela Nungungulu ka tempeli yakwe ya moya. Anzhako ka mazana ya malembe hi kona ku nga chikela xikhati xa ku Jehova a zi dlunyatisa hi ku tirisa a Hosi yakwe yi nga ha hi ku yimiswa, ku nga Jesu Kristu.

⁷ Hi 1919, lava va nga tirela Jehova tempeleni yakwe ya moya va tlhela va amukeleka ka yena va lo tiveka khwatsi. Va wa hlutilwe khwatsi hi tlhelo ga moya kasi a ntiro wabye wu amukeleka khwatsi ka Nungungulu. (Isa. 4:2, 3; Mal. 3:1-4) Lezi mupostoli Paule a nga sina a zi wonile ka mazana ya malembe nzhako zi lo sangula ku tatiseka.

8, 9. Tlhamusela a zilo zinharu lezi a ‘paradise’ legi Paule a gi wonileko gi wulako zona.

⁸ Hi kuma a muwoniso wa Paule wu tlhamuselwako ka 2 Va Le Korinte 12:1-4. (Gonza.) A zilo lezi Paule a nga zi wona ka muwoniso lowo zi tlhamuselwa kota kuvululelwa. Zi wa yelana ni ximaho xi nga hata, na ku hi zilo zi nga hi kona ka masiku yakwe. A xikhati lexi Paule “a nga tlakuselwa tilweni ga wunharu” i ‘paradise’ muni legi a gi wonileko? A paradise legi Paule a nga wulawula hi gona, gi wa tava ni kutatiseka ka xiviri, ni ka moya, ni ka le tilweni, loku ku to kotlana ku maheka xikhatini xi tako. Gi nga ha wula a paradise ga xiviri ga laha misaveni legi ga ha tako. (Luka 23:43) Gi nga ha wula kambe a paradise ga moya legi hi to ti buza hi gona misaveni yiswa. A ku hunza lezo, gi nga ha wula a matshamela ma nene ma tova kona “paradiseni ga Nungungulu” le tilweni. — Kuv. 2:7.

⁹ Kanilezi, hikuyini Paule a wulako lezaku i zwile “magezu ma nga wulekiko, lawa ma nga faneliko ku wuliwa hi munhu” ke? Xi wa nga hi xona xikhati xa kuva a tlhatlhambutela a zilo zo hlamalisa lezi a nga zi wonile ka muwoniso lowo. Kanilezi, za fanela a ku wulawula hi makatekwa lawa ma kumiwako hi vanhu va Nungungulu inyamutlha!

10. Hikuyini a magezu “paradise ga moya” ni “tempeli ya moya” ma nga wuliko nchumu wunwe?

¹⁰ A gezu “paradise ga moya” gi mahile xipanze xa magezu ya hina ya moya. Gi tlhamusela a xiyimo xo hlawuleka, xa mubuzo wa moya, lexi xi hi mahako hiva ni kurula na Nungungulu zinwe ni vamakabye va hina. Hambulezo, a hi fanelangi hi chikelela magumo ya lezaku a magezu “paradise ga moya” ni “tempeli ya moya” ma wula nchumu wunwe. A tempeli ya moya i lulamiselo ga Nungungulu ga wukhozeli ga lisine. A paradise ga moya gi tirela ku komba ziku dlunya lezaku hi vamani va amukelekako ka Nungungulu ni ku mu tirela tempeli yakwe ya moya nyamutlha. — Mal. 3:18.

11. Inyamutlha i lungelo muni hi nga nago mayelano ni paradise ga moya?

¹¹ A zo ku tsakisa a ku tiva lezaku kusukela hi 1919, Jehova i tsika vanhu va nga mbhelelangiko va tira naye kasi ku hlakulela, ni ku tiyisa, ni ku anzisa a paradise ga moya laha misaveni! Xana wa ti wona na u maha xipanze ka ntiro lowu wu hlamalisa? Xana lezo za ku kuca ku simama u tira na Jehova kasi ku dumisa a ‘xikhegetelo xa mikonzo yakwe’?

A HLENGELETANO YA JEHOVA YIYA MAHLWENI YI SASEKISWA

12. Kutsumba muni loku hontlheni hi nga nako xungetano hi kutatiseka ka Isaya 60:17 ke? (Wona mufota kusanguleni ka nzima.)

¹² Ka Isaya 60:17, ku profetilwe ntiro wo hlamalisa wa kucica mayelano ni xipanze xa laha misaveni xa hlengeletano ya Jehova. (Gonza.) A vaswa kutani lava va ha hi ku gonzako lisine va gonza zikombiso za kucica loko mabhukwini ya hina kutani ku zizwa ni vanwani. Kanilezi, hi nga ehleketa hi lungelo ga vamakabye va xinuna ni va xisati lava va ku wonileko ha voce wutomini ga vona wutsumbu! A va kanakani lezaku Jehova i kongomisa a hlengeletano Yakwe hi ku tirisa a Hosi leyi a yi yimisileko! Va zi tiva lezaku a kutsumba kabye, loku hontlheni hi nga nako, ku na ni xiseketelo xo tiya. A kuzwa a magezu yabye ma humako mbilwini zi ta tiyisa a kukholwa ka wena ni kutsumba ka wena ka Jehova.

13. Wutihlamuleli muni legi hi nyikwako ka Tisimu 48:12-14?

¹³ Na ku nga khataliseki a xikhati lexi hi nga naxo lisineni, hi fanele ku byela vanwani xungetano hi hlengeletano ya Jehova. A kuvakona ka paradise ga moya tikweni legi go biha, ni go bola, gi nga hiko la liranzo, hakunene xihlamaliso xa hombe! A zilo zo hlamalisa lezi hi zi tivako xungetano hi hlengeletano ya Jehova kutani “Zioni,” zinwe ni lisine xungetano hi paradise ga moya hi fanele ku zi hlawutela “ka xizukulwana xa ha tako.” — Gonza Tisimu 48:12-14.

14, 15. Kucica muni ku mahilweko hlengeletanweni lomu ka malembe ya va 1970, niku zi nehile mabhinzu muni?

¹⁴ Kufambeni ka malembe, a vanhu va kulileko lava va nga kona xikari ka hina va wonile kucica ko kari hlengeletanweni, loku ku engeteleko a kusaseka ka xipanze xa laha misaveni xa hlengeletano ya Jehova. Va xi alakanya a xikhati lexi a mabandla ma nga hi ni nanza ga bandla wutshanwini ga hubye ya madota, laha a matiko ma nga hi ni nanza ga ravi wutshanwini ga Kometi ya Ravi, ni xikhati lexi a wurangeli gi ngata hi ka murangeli wa Sociedade Torre de Vigia wutshanwini ga Hubye yi Fumako ya Timboni ta Jehova. Hambu lezi vontlhe vamakabye lava vo hiseka va nga hi ni vavuneteli vo tsumbeka, hi lisine munhu munwe ntsena a nga hi ni wutihlamuleli ga ku maha ziboho lomu bandleni, hofiseni ya ravi, ni le tsinza ga misava yontlhe. Lomu ka va 1970, a zilo zi lo cica kasi a wutihlamuleli ga ku wonelela gi mahiwa hi ntlawa wa madota wutshanwini ga munhu munwe.

¹⁵ Xana a kucica loku kuve ni mabhinzu ke? A hi zo kala u wutisa! Hikuyini? Hakuva a kucica loko ku seketelwe ka wutivi go engeteleka xungetano hi xikombiso hi nyikwako hi Mitsalo. Wutshanwini ga ku a zilo ziva mandleni ya munhu munwe, a kupatsana ka matshamela ma nene ya zontlhe a “zinyikiwo ka vanhu” lezi Jehova a hi nyikako ku neha mabhinzu hlengeletanweni. — Efe. 4:8; Mav. 24:6.

16, 17. Kucica muni ku mahilweko ka malembana ya kuta seno ku ku tsakisileko nguvu, niku hikuyini?

¹⁶ Ehleketa kambe hi kucica ku mahilweko ka malembana ya kuta seno, ko kota kucica ka matshamela, timhaka, ni tindlela ta ku avela mabhuku ya hina. A zo ku tsakisa a ku nyikela mabhuku yo saseka, ma vunako, ni yo koka mahlo wutirelini! Niku a xikhati hi tirisako a tekinolojiya ya nguva leyi kasi ku hangalasa a lisine, zo kota ku tirisa a saite jw.org, hi pimanyisa a kukhatala ka Jehova ka ku vuna vanhu ni kwihi lomu va nga kona lezaku va kuma wurangeli legi va gi lavako nguvu va gi vumala.

¹⁷ Hi nga rivali kambe a wutlhari ga kucica loku ku hi nyikileko xikhati xa Wukhozeli ga Ngango kutani xikhati xo engeteleka xa xigonzo xa munhu wutsumbu. Ha bonga kambe a kuchukwatiswa ka zilo ka milongoloko ya mitlhangano ya xipanze ni migotsovanyano. Hi tolovela ku wula lezaku a lembe ni lembe yiya yi chukwata! Niku hi tsaka nguvu kambe hi gonziselelo yo engeteleka hi nyikwako hi zikola zo tala za Mufumo lezi zi nga kona. Ka zontlhe lezi zi cicileko, za woneka ku Jehova wa tlhateka a canja gakwe. Hi kutsongwani-kutsongwani, iya a engetela a kusaseka ka hlengeletano yakwe ni paradise ga moya legi hi ti buzako hi gona hambu zalezi!

XIPANZE XA WENA KUSASEKISENI KA PARADISE GA MOYA

18, 19. Hi nga engetelisa kuyini a kusaseka ka paradise ga hina ga moya?

¹⁸ I thomo ga hombe a kuva Jehova a hi vumelela kuva ni xipanze kusasekiseni ka paradise ga hina ga moya. Hi maha lezo hi ku xumayela a mahungu yo saseka ya Mufumo ni ku maha vapizani hi kuhiseka. Khati ni khati hi vunako munhu lezaku a kula aza a ti hendleleta kota muKristu, hi mahile ntiro wa ku anamisa a paradise ga hina ga moya.— Isa. 26:15; 54:2.

¹⁹ Hi nga engetela a kusaseka ka paradise ga hina ga moya kambe hi ku chukwatisa a wumunhu ga hina ga wuKristu. Hi ndlela leyo, hi maha lezaku a paradise ga hina ga moya gi koka nguvu a mahlo ya lava va gi wonako. A kutala ka zikhati, a mahanyela ya hina ya kubasa ni kurula ma koka nguvu vanhu ku hunza wutivi ga Biblia lezaku vata hlengeletanweni, zonake va tshinela ka Nungungulu na Kristu.

20. Hi kuya hi Mavingu 14:35, kuxuva muni hi faneleko kuva nako?

²⁰ Jehova na Jesu a vo ku tsaka loku va wona a paradise go saseka ga moya legi hi ti buzako hi gona nyamutlha! A litsako hi li kumako nyamutlha a xikhati hi ti karatelako ku engetela a kusaseka ka gona, masemanyana ntsena ya litsako leli hi to li kuma a xikhati lexi hi to maha ntiro wa ku hunzula misava yiva ga paradise ga xiviri. Ngha hi tshama na hi alakanya a magezu ya Mavingu 14:35, lawa ma nge: “A nanza gi tlharihileko ga dzunzeka ka hosi ya gona.” Ngha hi tirisa wutlhari xontlhe xikhati laha hi kululako hi nwatseka kasi ku engetela a kusaseka ka paradise ga hina ga moya!