Wu gonzisa a vatireli va Mufumo

1-3. Xana Jesu i engetelisile kuyini a ntiro wa kuxumayela, niku lezo zi vuxa ziwutiso muni?

HI MALEMBE mambiri, Jesu i xumayele le Galilea kontlhe. (Gonza Mateu 9:35-38.) I lo enzela madoropa ni zidoropana zo tala, a gonzisa masinagogeni ni ku xumayela a mahungu yo saseka ya Mufumo. Kontlhe lomu a nga kari a xumayela kona, i wa lanzelwa hi zidlemo. Hikwalaho Jesu i te ngalo “a kutshovela ka hombe,” ku wa laveka vanwani vatshoveli.

² Jesu i mahile malulamiselo ya ku engetela a ntiro wa kuxumayela. Hi ndlela muni? Hi ku rumela 12 wa vapostoli lezaku va ya “kanela a mufumo wa Nungungulu.” (Luka 9:1, 2) A vapostoli va nga ngha va vile ni ziwutiso xungetano hi mamahela ya ntiro lowo. Na a nga se va rumela, Jesu hi liranzo i lo va nyika a nchumu lowu Dadani wakwe wa le tilweni a nga mu nyikile yenawu — a gonziselelo.

³ Makunu ku vuka ziwutiso zo hlaya: I gonziselelo muni leyi Jesu a nyikilweko hi Dadani wakwe? I gonziselelo muni leyi Jesu a nyikileko a vapizani vakwe? Niku ahati inyamutlha — xana a Hosi ya wuMessia ya gonzisa a valanzeli va yona lezaku va tatisa a ntiro wabye wa kuxumayela? Loku zi hi tano, yi zi mahisa kuyini?

“Nza kanela kota lezi a nzi gonzisileko Dadani”

4. Xana Jesu i gonzisilwe rini hi Dadani wakwe, niku kwihi?

⁴ Jesu i tekele ku vumela lezaku i wa gonzisilwe hi Dadani wakwe. Xikhatini xa wutireli gakwe, Jesu i te ngalo: “Nza kanela kota lezi a nzi gonzisileko Dadani.” (Joh. 8:28) Xana Jesu i gonzisilwe rini niku kwihi? Zi la su dlunya lezaku a gonziselelo yakwe yi lo tekela ku sangula neti — a N’wana wa matewula wa Nungungulu — a nga vangiwa. (Kol. 1:15) Na a hi zinwe ni Dadani wakwe le tilweni, a N’wana i mbhetile malembe ya tsanza-vahlayi na a ingisela ni ku cuwukisela a Mugonzisi wa Hombe. (Isa. 30:20) Kota wuyelo ga kona, a N’wana i nyikilwe a gonziselelo ya yi nene ka tontlhe xungetano hi matshamela, mitiro, ni makungo ya Dadani wakwe.

5. I gonziselelo muni leyi Dadani a nyikileko N’wana xungetano hi wutireli legi a nga wa ta gi maha misaveni?

⁵ Hi xikhati xi faneleko, Jehova i lo gonzisa N’wana wakwe xungetano hi wutireli legi a nga wa ta gi maha laha misaveni. Wona a xiprofeto lexi xi tlhamuselako a kutirisana ka Mugonzisi wa Hombe ni N’wana wakwe wa matewula. (Gonza Isaya 50:4, 5.) A xiprofeto xi ngalo Jehova i wa vuxa N’wana wakwe loku “gica ni mixo.” A mufananiso lowo wu hi alakanyisa a mugonzisi a vuxako a xigonzani xakwe ni mixo nguvu kasi ku xi gonzisa. A bhuku go kari gi tlhamuselako a Biblia, gi ngalo: “Ko khwatsi Jehova . . . i mu yisa xikoleni a ku fana ni lezi a xigonzani xi mahiwako, a tlhela a mu gonzisa a maxumayelela ni lezi a faneleko ku xumayela.” Le “xikoleni” xa le tilweni, Jehova i gonzisile N’wana wakwe ‘lezi a ta nga wulawula, ni lezi a ta nga kanela.’ (Joh. 12:49) Dadani i tlhelile a gonzisa a N’wana wakwe a magonzisela.a Na a hi misaveni, Jesu i lo tirisa khwatsi a gonziselelo yakwe hi ku maha wutireli gakwe ni ku gonzisa a valanzeli vakwe a ku tatisa a wutireli gabye.

6, 7. (a) I gonziselelo muni leyi Jesu a nyikileko vapostoli vakwe, niku zini lezi a va gonzisileko ku maha? (b) I gonziselelo muni leyi Jesu a ti karatelako ku nyika valanzeli vakwe masikwini ya hina?

⁶ I gonziselelo muni leyi Jesu a nyikileko vapostoli vakwe, kota lezi hi zi kumbukileko kusanguleni? Hi kuya hi Mateu xipimo 10, i lo va nyika zileletelo zo kongoma xungetano hi wutireli, lezi zi nga patsa: a ko xumayela kona (mavesi 5, 6), mahungu ya kona (vesi 7), xilaveko xa ku tsumba Jehova (mavesi 9, 10), ndlela ya ku wulawula ni venyi va miti (mavesi 11-13), ndlela ya ku yimisana ni kukanetwa (mavesi 14, 15), ni lezi va nga fanele ku maha loku va xaniswa (mavesi 16-23).b A gonziselelo yo dlunyateka leyi Jesu a nga nyika vapostoli vakwe yi va vunile a ku rangela a ntiro wa ku xumayela a mahungu yo saseka ka zana ga malembe go sangula Nguveni ya Hina.

⁷ Ahati inyamutlha ke? Jesu, a Hosi ya Mufumo wa Nungungulu, i nyikile valanzeli vakwe a ziavelo za lisima nguvu, ku nga ku xumayela “a ivangeli leyi ya mufumo . . . misaveni yontlhe, kasi yiva wukustumunyu ka matiko wontlhe.” (Mat. 24:14) Xana a Mufumo wa hi gonzisa a ku tatisa a ntiro lowu wa lisima nguvu? Handle ko kanakana wa hi gonzisa! Hi kwale tilweni, a Hosi yi maha zontlhe zi lavekako lezaku a valanzeli va yona va gonzisiwa a ku xumayela handle ka bandla ni ku tatisa ziavelo zo hlawuleka nzeni ka gona.

Wu gonzisa a vatireli lezaku vava vavangeli

8, 9. (a) Gi wa hi gihi a kungo-tshinya ga Xikola xa Wutireli ga Nungungulu? (b) Xana a mutlhangano wa xikari ka viki wu ku vunisa kuyini a ku humelela wutirelini ga wena?

⁸ Kusukela kale, a hlengeletano ya Jehova yita na yi tirisa mitlhangano ya hombe, migotsovanyano, ni mitlhangano ya bandla — yo kota a Mutlhangano wa Ntiro — kasi ku gonzisa wutireli a vanhu va Nungungulu. Kanilezi, kusukela ka va 1940, a vamakabye va rangelako le tsinza va lo sangula ku maha malulamiselo ya ku gonzisa hi ku tirisa zikola zo hambanahambana.

⁹ Xikola xa Wutireli ga Nungungulu. Kota lezi hi zi wonileko ka xipimo xa ha hi ku hunzako, a xikola lexi xi sangulile ku fambisiwa hi 1943. Xana a kungo ga xikola lexi gi wa hi ku gonzisa zigonzani a ku veka tikanelo to saseka mitlhanganweni ya bandla ntsena? Ahihi. A kungo-tshinya ga xikola lexi gi wa hi ku gonzisa vanhu va Nungungulu a ku tirisa a xinyikiwo xa ku wulawula lezaku va dumisa Jehova wutirelini. (Tis. 150:6) A xikola lexi xi vunile a vamakabye vontlhe lava va ti tsalelisileko ka xona a kuva vatireli va Mufumo va bhinzulako. Nyamutlha, a gonziselelo leyo hi yi kuma mutlhanganweni wu mahiwako xikari ka viki.

10, 11. Hi vamani lava va zi kotako ku tsaleliswa Xikoleni xa Gileade makunu, niku hi gihi a kungo ga xikola lexo?

¹⁰ Xikola xa Biblia xa Gileade. Lexi makunu xi vitaniwako ku Xikola xa Biblia xa Gileade xa Torre de Vigia xi sangulile ku tira hi Muvulo wa 1 ka Fevereiro wa 1943. A kusanguleni, a xikola lexi xi wa hi ni kungo ga ku gonzisa a ntiro wa wurumiwa a maphayona ni manwani malanza ya xikhati xontlhe lezaku va tira ni kwihi ku nga ni xilaveko misaveni. Kanilezi, kusukela Outubro wa 2011, ku tsalelwa ntsena lava va sinako va hi ntirweni wo hlawuleka wa xikhati xontlhe — maphayona yo hlawuleka, vawoneleli va fambafambako ni vasati vabye, vatiri va Beteli, ni varumiwa va le sinwini lava va kalako va nga se gonza a xikola lexi.

¹¹ Hi gihi a kungo ga Xikola xa Gileade makunu? A munwe wa vagonzisi va xona va kale i hlamulisa lezi: “Ku tiyisa a kukholwa ka zigonzani hi xigonzo xo eta xa Mhaka ya Nungungulu ni ku zi vuna a ku hlakulela matshamela ya moya lawa ma lavekako kasi ku yimisana khwatsi ni zikarato ziavelweni zabye. A xinwani, ku nga kungo-tshinya ga xikola, ku vuna a zigonzani a ku hlakulela a kunavela ka hombe ka ku lava ku hlengela ntirweni wa wuvangeli.” — Efe. 4:11.

12, 13. Xana a Xikola xa Gileade xi khumbisa kuyini a ntiro wa kuxumayela misaveni yontlhe? Nyika xikombiso.

¹² Xana a Xikola xa Gileade xi wu khumbisa kuyini a ntiro wa kuxumayela misaveni yontlhe? Kusukela 1943, ku gonzisilwe vanhu vo hunza 8.500 xikoleni lexi,c niku a varumiwa va gonzileko Gileade va tirela matikweni yo hunza 170 misaveni yontlhe. A varumiwa va tirisa khwatsi a gonziselelo yabye, vava zikombiso zo hiseka wutirelini ni kugonziseni ka vanwani lezaku va va pimanyisa. Ka matiko yo tala, a varumiwa va rangela ntiro ka matshamu lawa ku nga ni vahuweleli vatsongwani kutani ku nga hiko na vahuweleli va Mufumo.

¹³ Wona lezi zi mahekileko le Japão, lomu ku nga wonekisa ku khwatsi a ntiro wa kuxumayela wu wa nyimile hi kumbhelela xikhatini xa Yimpi ya Wumbiri ya Misava. Hi Agosto wa 1949, a vahuweleli va tiko gontlhe ga Japão va wa nga chikeli khume. Kanilezi, kumbheleni ka lembe lego, ku wa chikele a 13 wa varumiwa va gonzileko Gileade lava va nga khomekile hi ku xumayela le Japão. Ku no guma kuta vanwani varumiwa vo tala. Kusanguleni, a varumiwa va lo tira nguvu madoropeni ya hombe; hi nzhako vaya ka manwani madoropa. A varumiwa va wa kuca nguvu a zigonzani zabye ni vanwani a ku patsana navo ntirweni wa wuphayona. A kutikarata ka hombe ka varumiwa lavo ku pswalile mihanzu yo tala. Zalezi ku na ni ku hunza 216.000 wa vahuweleli va Mufumo le Japão, niku kwalomo ka 40 wa tipursento ta vona maphayona!d

14. Xana a zikola za Nungungulu xikombiso xa ntamu xa kuyini? (Wona kambe a kwadru “Zikola zi gonzisako vatireli va Mufumo”)

¹⁴ Zinwani zikola za Mufumo wa Nungungulu. A Xikola xa Ntiro wa Wuphayona, a Xikola xa Biblia xa Mipatswa ya Makristu, Xikola xa Biblia xa Vamakabye va Magwenza za vuna lava va ti tsalelisileko ka zona a ku kula hi tlhelo ga moya ni ku rangela a ntiro wa wuvangeli hi kuhiseka.e A zikola zontlhe lezi za Mufumo wa Nungungulu xikombiso xa ntamu xa lezaku a Hosi ya hina yi longisele khwatsi a valanzeli va yona lezaku va tatisa a wutireli gabye. — 2 Tim. 4:5.

Wu gonzisa vamakabye va xinuna lezaku va rwala wutihlamuleli go hlawuleka

15. Xana a vavanuna va nga ni wutihlamuleli va fanele ku pimanyisa Jesu hi ndlela muni?

¹⁵ Alakanya a xiprofeto xa Isaya lexi xi wulawulako hi Jesu na a gonzisiwa hi Nungungulu. “Xikoleni” lexo xa le tilweni, a N’wana i gonzile “ku tangalisa loyi a kareleko.” (Isa. 50:4) Jesu i tirisile a gonziselelo leyo; loku a hi misaveni, i wa humuta lava va nga ‘tira ni ku binzwa.’ (Mat. 11:28-30) Na va pimanyisa Jesu, a vavanuna va nga ziyinweni za wutihlamuleli va fanele ku humuta vamakabye vabye. Kasi ku maha lezo, ku yimisilwe zikola zo hambanahambana lezi zi vunako vamakabye va xinuna a ku tirela khwatsi a makholwa-kulobye.

16, 17. Hi gihi a kungo ga Xikola xa Vavangeli va Mufumo? (Wona kambe a tlhamuselo wa lahasi.)

¹⁶ Xikola xa Wutireli ga Mufumo. A turma yo sangula ya xikola lexi yi sangulile hi 9 ka Março wa 1959, le Dzongeni wa Lansing, Nova York. Ku lo rambiwa vawoneleli va fambafambako ni malanza ya bandla lezaku vava kona ka xikola lexo xi nga mbheta hweti. Hi nzhako ka xikhati, a kurso leyo yi lo hunzuluselwa hi ka xiNgiza yiya ka tinwani tirimi, niku hi kutsongwani-kutsongwani a xikola lexo xi lo sangula ku gonzisa vamakabye va misava yontlhe.f

¹⁷ Xungetano hi kungo ga Xikola xa Wutireli ga Mufumo, a Anuário das Testemunhas de Jeová de 1962 gi te ngalo: “Tikweni legi gi tatelako vanhu a zo khoma, a muwoneleli bandleni ga Timboni ta Jehova i fanele kuva wanuna a zi kotako ku xaxameta a wutomi gakwe lezaku a zi kota ku khatalela vontlhe laha bandleni a tlhela ava xikatekiso ka vona. Niku a nga faneli kuva wanuna a tsikako ngango wakwe hi kota ya bandla, kanilezi i fanele kuva ni kuringanisela. Mayiwako a lungelo legi gi nyikilweko malanza ya bandla misaveni yontlhe ga ku tlhangana Xikoleni xa Wutireli ga Mufumo kasi ku kuma gonziselelo leyi yi to ma vuna a ku maha lezi a Biblia gi nge a muwoneleli i fanele ku zi kota ku maha!”— 1 Tim. 3:1-7; Tit. 1:5-9.

18. Xana a vanhu vontlhe va Nungungulu va vunekisa kuyini hi Xikola xa Wutireli ga Nungungulu?

¹⁸ A vanhu vontlhe va Nungungulu va vuneka hi Xikola xa Wutireli ga Mufumo. Hi ndlela muni? A xikhati lexi a madota ni malanza ya wutireli va tirisako lezi va zi gonzako xikoleni lexo, vona, a ku fana na Jesu, va humuta makholwa-kulobye. Xana a wu bongi hi ku byeliwa magezu yo tangalisa, hi ku kuma ko chulula kona zikarato za wena, kutani hi ku enzelwa hi dota kutani nanza ga wutireli gi khatalako? (1 Tes. 5:11) A vavanuna lavo va ringanelwako makatekwa mabandleni yabye!

19. Hi zihi a zinwani zikola lezi a Kometi ya Gonziselelo yi zi wonelelako, niku hi gihi a kungo ga zikola lezo?

¹⁹ Zinwani zikola za Mufumo wa Nungungulu. A Kometi ya Gonziselelo ya Hubye yi Fumako yi wonelela zikola zinwani lezi zi gonzisako vamakabye va nga ni wutihlamuleli hlengeletanweni. A zikola lezo zi mahelwa ku vuna vamakabye va nga ni wutihlamuleli — madota ya bandla, vawoneleli va fambafambako, ni ziro za Kometi ya Ravi — lezaku va humelela kutatiseni ka mitiro yabye yo tala. A tikurso leto ti seketelwako ka Biblia, ti kuca vamakabye lavo a ku hlayisa a wumoya gabye va tlhela va tirisa matshinya ya milayo ya Mitsalo kutirisaneni kabye ni tiyivu ta lisima leti Jehova a va nyikileko lezaku va ti hlayisa. — 1 Ped. 5:1-3.

20. Hikuyini Jesu a nga wula lezaku hontlheni hi “vapizani va Jehova,” niku zini u ti yimiseleko ku maha?

²⁰ Zi te dlunya lezaku a Hosi ya wuMessia yi maha zontlhe zi kotekako kasi ku gonzisa khwatsi a valanzeli va yona. A gonziselelo yontlhe leyi yi sukela hehla: Jehova i gonzisile N’wana wakwe, a N’wana a gonzisa valanzeli vakwe. Hikwalaho, Jesu a nga hembangi loku aku “vontlhe va ta gonziswa hi Nungungulu.” (Joh. 6:45; Isa. 54:13) A hi ti yimiseleni ku lonzowota khwatsi a gonziselelo leyi a Hosi yi hi nyikako. Niku a hi alakanyeni lezaku a kungo ga hombe ga gonziselelo yontlhe leyi ku hi vuna a ku simama hi tiyile hi tlhelo ga moya kasi ku tatisa khwatsi a wutireli ga hina.