A kulaya ku vhuna n’wanana lezvaku a simama ndleleni yi nene
KA VAPSWALI
Ya wu 6: Kulaya
LEZVI ZVI WULAKO ZVONA
A gezu kulaya gi nga wula kurangela kutani ku gondzisa. Ka zvikhati zvin’wani zvi wula ku kawuka n’wana wa wena ka mahanyela ya hava. Hambulezvo, a kutala ka zvikhati zvi patsa ku gondzisa vana va wena a mahanyela lawa ma to va vhuna gondza ku ti mahela zviboho zva wutlhari.
HIKUYINI ZVI NGA ZVA LISIMA?
Ka malembana ya zvezvanyana, a mingango yokari a ya ha layi vana hakuva a vapswali va chava ku zvi nga hungula lisima la vana vabye. Hambulezvo, a vapswali vo tlhariha va veka milayo yo olova va tlhela va gondzisa vana vabye lezvaku va yi ingisa.
“A vanana va lava ku byeliwa lezvi va nga zvona ni lezvi va faneleko ku maha. Loku va nga layiwi, va ta maha zviboho zva wupumbu lezvi zvi tova ni wuyelo ga hava.” — Pamela.
LEZVI U NGA MAHAKO
Yima u tiya ka lezvi u va gondzisako. Loku a vana va wena va nga hanyi hi lezvi u va gondzisako, va byele wuyelo ga kona. Tshama na u longile ku va dzundza loku va ingisa lezvi u va gondzisako.
“Ndzi tolovela ku dzundza vana va mina hi lezvi va ndzi ingisako tikweni legi a ku ingisa zvi kalako. A ku va dzundza zvi maha zvi va olovela ku vhumela ku kawukiwa loku zvi laveka.” — Christine.
TSHINYA GA NAYO GA BHIBHILIYA: ‘Hakuva lezvi munhu a ci byalako, xwalexo i ta ci tshovela.’ — Va Le Galatiya 6:7.
Ringanisela. Loku u va laya, ehleketa hi tangana yabye, wutlhari gabye, ni wuhombe ga lezvi va nga wonha. Hi cikombiso, loku va nga ingisi a milayo yo kari xungetano hi matirisela ya fone, u nga ha va tekela kutani ku va pimela cikhati ca ku yi tirisa. U nga hatliseli ku kwatisiwa hi zvilo zvo kala ku vhuna nchumu, ntsena hi ku zva ku swira.
“Ndzi zama ku pola ku a n’wana wa mina i no phazama kutani i no halahala a nga ingisi kutani ku i no sangula hi ku nga ehleketi hi zvona. Ku na ni kuhambana cikari ka ku phindaphinda ku maha zvo biha ni ku kombisa matshamela lawa ma lavako lezvaku ma lulamisiwa.” — Wendell.
TSHINYA GA NAYO GA BHIBHILIYA: ‘Vararu, mu nga zangarisi a vana va n’wina, va nga mbhela ntamu.’ — Va Le Kolosi 3:21.
Randza. A vanana zva va olovela ku vhumela ku layiwa ni ku hanya hi kona loku va tiva lezvaku a vapswali va va laya hi ku va randza.
“Loku a n’wana wa hina a maha zvihoxo, hi mu byela lezvaku hi na ni matshandza hi yena hi kota zviboho zva zvi nene lezvi a zvi mahileko. Hi mu tlhamusela lezvaku a zvihoxo a zvi nge wonhi wumunhu gakwe ga gi nene hi kota ya lezvi a nga simama ku cica lezvi zvi lavekako niku hinawu hi wa mu vhuna.” — Daniel.
TSHINYA GA NAYO GA BHIBHILIYA: ‘A lirandzo li na ni lihlazva-mbilu, li nene.’ — 1 Va Le Korinte 13:4.