Hlawula lezi zi nga za lisima nguvu
‘Hlawulani lezi zi nga zi nene nguvu.’ — FIL. 1:10.
1, 2. Hi xihi a xiprofeto xungetano hi masiku ya kugumesa lexi a vapizani va Jesu va faneleko ku ngha va ti wutisile zotala ha xona, niku hikuyini?
PEDRO, na Johani, na Andreu makunu va ti tshamele voce ni Hosi yabye. A magezu lawa Jesu a nga ma wulile xikhatanyana mahlweni ka lezo xungetano hi kuloviswa ka tempeli ma va tsona wurongo. (Mar. 13:1-4) Hikwalaho, va te ngalo kakwe: “Hi byele a xikhati zi ta nga maheka ha xona lezi zilo, u hi tivisa ni xiwoniso xa kuwuya ka wena ni xa kugumesa ka tiko.” (Mat. 24:1-3) Jesu i lo sangula ku va hlawutela a zimaho, kutani matshamela lawa ma nga wa ta vanga kucica ka hombe wutomini, ma tlhela ma komba a masiku ya kugumesa ya tiko ga Satani. Ku na ni nchumu wo kari lowu a vapizani va Jesu va faneleko ku ngha va ti wutisile zotala ha wona. Anzhako ka ku hlawutela zilo lezo zo tsema hlana zo kota tiyimpi, tindlala, ni kuenzeleka ka kuonha, Jesu i profetile lezaku ku wa ta maheka nchumu wa wu nene lowu wonawu wu nga wa tava xikombiso xa masiku ya kugumesa. I te ngalo: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” — Mat. 24:7-14.
2 A vapizani va Jesu va wa ti buzile a ku xumayela a mahungu yo saseka ya Mufumo zinwe na Kristu. (Luka 8:1; 9:1, 2) Kuzilava va alakanyile lezaku i wa te ngalo: “A kutshovela ka hombe, kanilezi a zitiri zi tsongwani; hikwalaho kombelani a Nwinyi wa kutshovela lezaku a ruma zitiri kutshoveleni kakwe.” (Luka 10:2) Kanilezi, va wa ta zi kotisa kuyini a xumayela “misaveni yontlhe” ni ku nyika “wukustumunyu ka matiko wontlhe” ke? Va wa tata hi kwihi a vatiri? Loku a vapizani va wa zi kotile a ku wona lezi a magezu ya Jesu lawa hi ma gonzako ka Mateu 24:14 ma nga wa ta tatisekisa zona, handle ko kanakana ngha va tele hi kuhlamala.
3. Xana a bhuku ga Luka 21:34 gi tatisekisa kuyini nyamutlha, niku zini hi faneleko ku ti wutisa?
3 Hi hanya masikwini ya kutatiseka ka xiprofeto xa Jesu. A vanhu va timiliyoni va patsana zinwe lezaku va tata misava hi ku xumayela a mahungu yo saseka ya Mufumo. (Isa. 60:22) Hambulezo, Jesu i kombile lezaku a vokari zi wa ta va karatela a ku rangisa lezi zi nga za lisima masikwini lawa yo gumesa. Va wa ta colopetelwa hi zotala va tlhela va ‘binziwa.’ (Gonza Luka 21:34.) Ha zi wona lezaku a magezu lawo wonawu ma tatiseka. A vokari xikari ka malanza ya Nungungulu va hambukiswa. Lezo zi woneka ka ziboho lezi va zi mahako xungetano hi ntiro wa kutihanyisa, zigonzo zo tlakuka, ni ku ti lavela titshomba, zinwe ni xikhati lexi va xi mbhetako na va hi ka zibelabela ni kuhlakana. A vanwani va mbhetwa ntamu hi kota ya kukarateka ni ku binziwa hi wutomi siku ni siku. Ti wutise: ‘Mina ke, xana a ziboho nzi zi mahako wutomini ga mina za komba lezaku nza rangisa lezi zi nga za lisima?’
4. (a) Zini lezi mupostoli Paule a khongeleleko maKristu ya le Filipi, niku hikuyini? (b) Zini hi to wulawula hi zona ka nzima leyi ni leyi yi lanzelako, na hi hi ni kungo muni?
4 A maKristu lawa ma nga hanya ka zana ga malembe go sangula ma wa fanele ku ti karata nguvu lezaku ma rangisa zilo za moya. Mupostoli Paule i wonile xilaveko xa ku khongelela a maKristu lawa nga hi le Filipi lezaku ma ‘hlawula lezi zi nga zi nene nguvu,’ kutani lezi zi nga za lisima nguvu. (Gonza Va Le Filipi 1:9-11.) A ku fana na mupostoli Paule, a votala masikwini lawo va wa ‘tiya nguvu a ku kanela a mhaka ya Nungungulu na va nga chavi nchumu.’ (Fil. 1:12-14) Hi kufanana, a votala nyamutlha va xumayela a Mhaka ya Nungungulu hi kutiya-hlana. Hambulezo, a ku gonza xungetano hi lezi a hlengeletano ya Jehova yi zi mhako nyamutlha, xana zi nga hi vuna a ku simama hi rangisa a ntiro wa kuxumayela, wu nga wona a ntiro wa lisima nguvu ke? Handle ko kanakana, zi nga hi vuna! Ka nzima leyi, hi ta wona a malulamiselo lawa Jehova a ma mahako kasi ku hehukisa a kutatiseka ka Mateu 24:14. Xini lexi a hlengeletano yakwe yi xi rangisako? Xana loku hi zi tiva, zi ta hi kucisa kuyini hina wutsumbu zinwe ni maxaka ya hina? Ka nzima yi lanzelako, hi ta tiva lezi zi nga hi vunako ku timisela hi nga sali nzhako ni hlengeletano ya Jehova.
A XIPANZE XA LE TILWENI XA HLENGELETANO YA JEHOVA A XI NYIMI
5, 6. (a) Hikuyini Jehova a nyikileko miwoniso ya xipanze xa le tilweni xa hlengeletano yakwe? (b) Zini lezi Ezekieli a zi wonileko ka muwoniso?
5 Ku na ni zilo zo tala lezi Jehova a nga kala ku tsala Mhakeni yakwe. Hi xikombiso, a nga nyiki mitlhamuselo yo tala nguvu xungetano hi matirela ya wongo ga hina kutani matirela ya wuako, hambu lezi a ku tiva zilo lezo zi nga wa ta tsakisa nguvu! Wutshanwini ga lezo, Jehova i hi tlhamusele lezi zi lavekako kasi hi zwisisa a makungo yakwe ni ku zwananisa wutomi ga hina ni makungo lawo. (2 Tim. 3:16, 17) Hambulezo, a hi kutsakisa ka zona lezi a Biblia gi hi nyikako masemanyana ya xipanze xi nga wonekiko xa hlengeletano ya Jehova! Ha tsaka nguvu hi ku gonza xungetano hi malulamiselo ya Jehova ya le tilweni kota lezi ma tlhamuselweko hi Isaya, Ezekieli, Danieli, na Johani ka bhuku ga Kuvululelwa. (Isa. 6:1-4; Ezek. 1:4-14, 22-24; Dan. 7:9-14; Kuv. 4:1-11) Zi fana ni loku Jehova a hi vululele a nyangwa lezaku hi hlomela tilweni. Hikuyini a hi nyikileko mahungu lawa?
6 Jehova i lava lezaku hi nga tshuki hi rivala ku hi ziro za hlengeletano yakwe ya wuako gontlhe. Ku na ni zotala zi yelanako ni ku seketela a makungo ya Jehova zo hunza lezi hi zi wonako. Hi xikombiso, Ezekieli i wonile a xipanze xa hlengeletano ya Jehova xi nga wonekiko na xi yimelwa hi karata ya hombe ya le tilweni. A karata leyo yi famba hi kuhatlisa yi tlhela yi djika hi xihatla. (Ezek. 1:15-21) Khati ni khati a maroda ya yona ma hunzulukako, a karata leyi yi famba pfhuka wo leha. Ka muwoniso lowo, Ezekieli i zi kotile ku wonanyana Loyi a khileleko ka yona. I te ngalo: “Nzi lo wona xo fanana ni kungangamela ka suku, ku woneka ku khwatsi i nzilo . . . Zi wa wonekisa lezo le’zi nga fanana ni kungangamela ka Jehova.” (Ezek. 1:25-28) Handle ko kanakana Ezekieli i hlamalile nguvu hi ku wona a muwoniso lowu! I wonile Jehova na a rangela zontlhe hlengeletanweni yakwe, a yi kongomisa hi moya wakwe wa ku basa ni kwihi laha yi yako kona. Hi nga wona ku hlamalisa ka lezi a xipanze xa le tilweni xa hlengeletano ya Jehova xi fambisako zona!
7. Xana a muwoniso lowu Danieli a wu wonileko wu hi tatisa kuyini hi kutsumba?
7 Danieli yenawu i wonile zotala lezi zi hi nyikako kutsumba. I lo vumelelwa ku Jehova na a yimelwa hi ‘Wakale ka Masiku’ na a tshamile xitshanwini xa wuhosi ni malangavi ya nzilo. A xitshamu xa wuhosi xi wa hi hehla ka maroda. (Dan. 7:9) Jehova i wa lava ku komba Danieli lezaku a hlengeletano yakwe a yi nyimi; yi tshama hi ku famba, yi tatisa a kungo gakwe. Danieli i tlhelile a wona “loyi a fananako ni n’wana wa munhu,” ku nga Jesu, na a nyikiwa ntiro wa ku wonelela a xipanze xa laha misaveni xa hlengeletano ya Jehova. A kufuma ka Kristu ko mbhelela a hi ka xikhatanyana, “ka simasima, ku nga ta hunza, ni mufumo wakwe cima wu nga ta mbhetiswa.” (Dan. 7:13, 14) Lezo zi hi kuca ku tsumba Jehova ni ku nyika lisima lezi a zi tatisako. I lo nyikwa Jesu, a N’wana wakwe a ringilweko ku vumaleka xisolo a “kufuma, ni wukosi, ni mufumo.” Jehova wa mu tsumba a N’wana wakwe. Hinawu hi fanele ku tsumba a wurangeli ga Jesu.
8. A miwoniso ya Jehova ka Ezekieli na Isaya yi va khumbisile kuyini, niku xana hina yi fanele ku hi khumbisa kuyini?
8 Xana a ku wonanyana a xipanze lexi xi nga wonekiko xa hlengeletano ya Jehova zi fanele ku hi khumbisa kuyini? A ku fana na Ezekieli, ha tala hi kuhlamala hi tlhela hi wona a wutsongwani ga hina ka lezi Jehova a zi mahako. (Ezek. 1:28) Khwatsi hi Isaya, a ku ehleketa hi hlengeletano ya Jehova zi nga hi kuca ku maha xokari. A xikhati lexi a ngava ni lungelo ga ku byela vanwani lezi Jehova a zi mahako, Isaya i lo gi lonzowota na a nga kanakani. (Gonza Isaya 6:5, 8.) Isaya i wa tsumba lezaku hi ku vuniwa hi Jehova, i wa ta hlula ni xihi xikarato a nga wa ta kumana naxo. Hi kufanana, a ku wona zitsongwani ka xipanze xi nga wonekiko xa hlengeletano ya Jehova zi fanele ku hi hlamalisa nguvu zi tlhela zi hi kuca ku maha xokari. A hi kukuca ka zona a ku wona a hlengeletano ya Jehova, yi tshamako hi ku famba, leyi a ntiro wa yona ku nga ku tatisa makungo ya Jehova!
XIPANZE XA LAHA MISAVENI XA HLENGELETANO YA JEHOVA
9, 10. Hikuyini ku nga ni xilaveko xa xipanze xo woneka xa hlengeletano ya Jehova?
9 Hi ku tirisa a N’wana wakwe, Jehova i mahile lulamiselo laha misaveni legi gi tirako hi kuyelana ni xipanze xi nga wonekiko xa hlengeletano yakwe. Hikuyini ku lavekako a lulamiselo go woneka kasi ku tatisa a ntiro lowu wu kumbukiwako ka Mateu 24:14? A hi woneni zivangelo zinharu.
10 A xo ranga, Jesu i te a ntiro lowu wa kuxumayela wu ta mahiwa hi vapizani vakwe ‘kala magemeta-musi ya misava.’ (Miti. 1:8) Xa wumbiri, ku wa ta laveka a lulamiselo kasi ku nyika zakuga za moya ni ku hlayisa lava va mahako ntiro lowo. (Joh. 21:15-17) Xa wunharu, ku wa fanele ku mahiwa malulamiselo ya lezaku lava va xumayelako a mahungu yo saseka va tsombana kasi va khozela Jehova ni ku gonzisiwa lezi va faneleko ku wu mahisa zona a ntiro wa kuxumayela. (Maheb. 10:24, 25) A zilo zontlhe lezi zi wa nga ta maheka halahala. Hakuva kasi a valanzeli va Kristu va humelela kumaheni ka lezo, a ntiro lowu wu wa fanele ku xaxametiwa khwatsi.
11. Hi nga seketelisa kuyini a malulamiselo lawa ma mahiwako hi hlengeletano ya Jehova ke?
11 Hi nga seketelisa kuyini a malulamiselo lawa ma mahiwako hi hlengeletano ya Jehova ke? A yinwe ya tindlela ta lisima nguvu kuva xontlhe xikhati hi tsumba lava Jehova na Jesu va va nyikileko ntiro wa ku rangela a ntiro wa kuxumayela. Ku na ni zilo zo tala lezi a vamakabye lava va nga wa ta ti karatela ku zi lulamisa misaveni leyi. Hambulezo, zini lezi a xipanze xa laha misaveni xa hlengeletano ya Jehova xi zi rangisako xontlhe xikhati?
VEKA KUPIMA KA WENA KA ZILO LEZI ZI NGA ZA LISIMA NGUVU
12, 13. Xana a madota ya maKristu ma wu mahisa kuyini a ntiro wabye, niku hikuyini lezo zi ku tiyisako?
12 Misaveni yontlhe, a madota ya maKristu ma buvileko ma kari ma yimiswa lezaku ma wonelela ni ku yisa mahlweni a ntiro wa kuxumayela Mufumo matikweni lawa va tirako kona. A xikhati lexi a vamakabye lava va mahako ziboho, va hlota a wurangeli ga Mhaka ya Nungungulu, yiva ‘kandiya mikonzweni yabye ni kuwonekela ndleleni yabye,’ va tlhela va khongela hi mbilu yontlhe lezaku Jehova a va kongomisa. — Tis. 119:105; Mat. 7:7, 8.
13 A ku fana ni lava va nga rangele zaneni ga malembe go sangula, a madota ya maKristu lawa ma wonelelako a ntiro wa kuxumayela nyamutlha ma pinyamile “ntirweni wa mhaka.” (Miti. 6:4) Va tsaka nguvu hi ku wona kuanza loku ku nga kona ntirweni wa kuxumayela zipanzeni zabye ni misaveni yontlhe. (Miti. 21:19, 20) A va betheli milayo yo tala ge hambu mamahela. Wutshanwini ga lezo, va lanzela Mitsalo ni wurangeli ga moya wa ku basa wa Nungungulu a xikhati lexi va mahako malulamiselo ya lezaku a ntiro wa kuxumayela wu anza. (Gonza Mitiro 15:28.) Hi ku maha lezo, a vamakabye lava vo tsumbeka va nyika xikombiso xi nene ka vontlhe lomu mabandleni lawa va tirako ka wona. — Efe. 4:11, 12.
14, 15. (a) Malulamiselo muni ma mahiwako kasi ku seketela a ntiro wa kuxumayela misaveni yontlhe? (b) U ti zwisa kuyini hi lezi u zi mahako kasi ku vunetela a ntiro wa ku xumayela Mufumo ke?
14 Ku na ni mitiro yi nga woniwiko hi vanhu vo tala leyi yi yelanako ni ku longisela a zakuga za moya zi nga mabhukwini ya hina, mitlhangano, ni migotsovanyano. A makume ya mazana ya vatiri va kuziranza va tira yi nga chayi na va hunzulusela a zakuga lezi za moya hi xipimo xa 600 wa tirimi kasi a vanhu vo tala va gonza xungetano hi “mitiro ya ntamu ya Nungungulu” hi tirimi tabye hi laha zi kotekako hi kona. (Miti. 2:7-11) A vamakabye va hina va xinuna ni va xisati va ha hiko vaswa va tira ku gandla mabhuku hi michini yo kutsutsuma nguvu. Anzhako ka lezo, a mabhuku lawo ma rumelwa mabandleni ya lomu kusuhani ni ka matshamu ya le kule nguvu ya misava.
15 Ku mahiwa malulamiselo yo tala nguvu kasi hi zi kota ku veka kupima ka hina ntirweni wa ku xumayela mahungu yo saseka zinwe ni bandla hi nga ka gona. Hi xikombiso, a makume ya mazana ya vamakabye va ti hendleleta kasi ku aka tiSalawu ta Mufumo ni tiSalawu ta mitlhangano ya hombe, ku vunetela lava va welweko hi makhombo kutani va lwisanako ni mababyi yo kari, ku longisela mitlhangano ya zipanze ni migotsovanyano, ni ku gonzisa a zikola zi longiselwako hi hlengeletano, loku hi lava ku wula mitiro yi tsongwani leyi yi mahekako na yi nga woniwi hi vanhu vo tala. Hi gihi kungo ga mitiro leyo yontlhe? Kasi ku olovisa a ntiro wa kuxumayela mahungu yo saseka, ku tiyisa hi tlhelo ga moya lava va mahako a ntiro lowu, ni ku yisa mahlweni a wukhozeli ga lisine. Xana a xipanze xa laha misaveni xa hlengeletano ya Jehova xa rangisa lezi zi nga za lisima nguvu? Handle ko kanakana!
LANZELA XIKOMBISO XA HLENGELETANO YA JEHOVA
16. Zini hi nga gonzako a xikhati lexi hi mahako a wukhozeli ga hina ga ngango kutani xigonzo xa munhu wutsumbu?
16 Xana ha ti nyika xikhati xa ku ehleketa hi lezi a hlengeletano ya Jehova yi zi mahako ke? A vokari va zi wonile na zi hi chukwana a ku kambisisa ni ku ehleketa hi mahungu lawa a xikhati lexi va mahako wukhozeli ga ngango kutani xigonzo xa munhu wutsumbu. A ku gonza miwoniso leyi yi nyikilweko Isaya, Ezekieli, Danieli, na Johani zi nga maha xigonzo xa hina xiva xo tsakisa. A bhuku Testemunhas de Jeová — Proclamadores do Reino de Deus ni mabhuku manwani kutani maDVD lawa ma nga kona hi lirimi la wena ma nga ku vuna ku tiva ni ku zwisisa a hlengeletano ya Jehova hi ndlela yo hlamalisa.
17, 18. (a) A nzima leyi yi ku vunisile kuyini? (b) Ziwutiso muni hi faneleko ku ti maha?
17 A ku ehleketa hi lezi Jehova a zi mahako hi ku tirisa a hlengeletano yakwe zi nene nguvu ka hina. Zinwe ni hlengeletano leyi yo hlamalisa, ngha hi veka kupima ka hina ka lezi zi nga za lisima nguvu xontlhe xikhati. A ku maha lezo zi ta hi tiyisa a ku fana na Paule loyi a ngaku: “Kota lezi hi nga ni ntiro lowu, hi wuxinji legi hi mahelweko gona, a hi mbheli ntamu.” (2 Kor. 4:1) Tlhatakumbiri, i lo tiyisa hlana a vatiri-kulobye aku: ‘Ngha hi nga karali a ku maha lezi zi nga zi nene; hakuva loku hi nga rereki hi ta tshovela hi xikhati xi faneleko.’ — Gal. 6:9.
18 Xana xi kona lexi a munwe ni munwani wa hina kutani kota ngango hi faneleko ku chukwatisa kasi hi tiva ku hlawula ni ku veka kupima ka hina ka lezi zi nga za lisima nguvu ka lezi hi zi mahako siku ni siku? Hi nga olovisa a wutomi ga hina kutani ku hungula lezi zi hi colopetelako kasi hi zi kota ku khatalela khwatsi a ntiro wa lisima ku hunza yontlhe, wu nga ntiro wa kuxumayela ke? Ka nzima yi lanzelako, hi ta wulawula hi ntlhanu wa zilo zi to hi vuna ku famba ni hlengeletano ya Jehova hi nga sali nzhako.