Jehova i nzi nyika zo hunza lezi zi nzi faneleko

Nzi kulele doropeni ga Alicante, le mutsuwuka-gambo wa Espanya ko gamakana ni bimbi. A ngango wa hina wu wa nga hi na kuzwanana, hikwalaho nzi lo mbheta xikhati xo tala xa wuswa ga mina lomu ruweni. Kusuhani ni laha kaya ku wa hi ni wutshamu ga ku longisa mimova. Ka wutshamu lego nzi lo maha wunghana na José María, a nga hi mutiri wa kwalaho. I wa hi munhu wa liranzo loyi a nga nzi khatalela khwatsi a ku hunza va le kaya. Ka zikhati za zikarato, i wa fana ni makabye wa mina wa xiviri — i wa hi munghana wa lisine, hambu lezi a nga nzi hunza hi 20 wa malembe.

José María i wa sangulile ku gonza a Biblia ni Timboni ta Jehova. I wa yi ranza nguvu a Mitsalo, niku i wa tolovela ku nzi bhulela mahungu ya Biblia. Nzi wa mu ingisela hi xichawo, kanilezi nzi wa nga zi nyiki lisima. Nzi wa hi tangeni yo sangula ku ti tshotshota niku nzi wa tshama nzi khomekile. Kanilezi, ku wa tava ni kucica ko kari.

MHANGO YI CICILEKO WUTOMI GA MINA

A nzi zi ranzi ku wulawula nguvu hi mhango leyo yi humeleleko laha ruweni. Lezi nzi nga wulako ku nzi wa hi xipumbu niku nzi wa nga chavi mhango. Ka siku galego a wutomi ga mina gi lo cica hi kumbhelela. Nzi wa hi muswa a nga hi ni ntamu khwatsi, kanilezi hi xitshuketi nzi lo lamala zonake nzi yiswa xipitali nzi ya baxara. Nzi lo ti wutisa ku ‘kasi hi hanyela yini ke?’

José María i lota a ta nzi vuxela, zonake a maha malulamiselo hi xihatla ya lezaku a Timboni to kari ta Jehova ta bandla ga laha kusuhani ti ta nzi vuxela le xipitali. A maenzo lawo yo khanzakanya ma lo nzi khumba nguvu. Zalezo ku nga hunza matirelwa yo khanzakanya ni yo karata, nzi lo sangula ku gonza a Biblia.Nzi lo tiva a lisine xungetano hi lexi xi mahako lezaku kuva ni kuxaniseka, kufa ni xigelo xa kuva Nungungulu a tsika zilo za kubiha zi humelela. Nzi lo tlhela nzi tiva a kungo ga Nungungulu hi xikhati xa ha tako, laha a misava yontlhe yi to tala hi vanhu va ku hanya khwatsi na ku nga hi na munhu a to wula ku: “Nza babya!” (Isaya 33:24) Nzi wa nga se tshuka nzi rinzela zilo zo saseka zo kota lezo wutomini ga mina!

Laha nzi nga huma xipitali, nzi lo hatlisa ku tiva zotala ka xigonzo xa mina xa Biblia. Hi ku tirisa xitulo xo kari xo hlawuleka xa maroda, nzi loya ka mitlhangano yo kari ya Timboni ta Jehova nzi tlhela nzi patseka ka ntiro wa tona wa kuxumayela. Hi 5 ka Novembro wa 1988, na nzi hi ni 20 wa malembe, nzi lo bapatizwa hi mati lomu ka bhanyera go kari. Jehova Nungungulu i lo nzi vuna kuva ni mawonela ma nene. Makunu nzi wa ta mu bongisa kuyini?

A NZI KONDLI MAWOKO HAMBU LEZI NZI NGA XILEMA

Nzi wa ti yimisele ku nga tsiki xiyimo xa mina xi nzi valela ku maha lezi nzi zi kotako ntirweni wa Jehova. Nzi wa lava kuya mahlweni. (1 Timote 4:15) Kusanguleni, lezo zi wa nga olovi, hakuva a ngango wa hina wu wa kaneta nguvu a kukholwa ka mina ka kuswa. Kanilezi, nzi wa hi ni makholwa-kulori lawa ma nga hi vamakabye va mina va moya. Va lo maha zontlhe va nga zi kota kasi nzi nga luzi mitlhangano ni lezaku nzi zi kota kuya ntirweni wa kuxumayela.

Hambulezo, hi kufamba ka xikhati, nzi lo wona lezaku nzi wa ta lava ku khatalelwa siku gontlhe. Anzhako ka kuva ku hunzile xikhati xo leha na ku hlotiwa, nzi lo gumesa nzi kuma wutshamu ga gi nene ga ku tshama zilema le doropeni ga Valência, ku nga pfhuka wa 160 wa tikilometro kuya nwalungu wa Alicante. A wutshamu lego gi lo maha kaya.

Hambu lezi nzi nga tshama mubhedini, nzi wa ti yimisele ku simama ku tirela Jehova. Nzi lo xava a komputadori hi mali nzi nga nyikiwa kota xilema ni yinwani nzi nga yi kuma hi tlhelo, zonake wu ligarelwa laha mubhedini wa mina, nzi tlhela nzi xava telefone. Zezi, mixo ni mixo, a muhlayisi wa mina hi yena a lumekako a komputadori ni telefone ya mina. Kasi ku lava zilo lomu ka komputadori wa mina, nzi tirisa a xilevu. Niku nzi na ni xinhongana xo hlawuleka nzi xi khomako hi nomu. A xinhongana lexo xi nzi vuna ku tsala zilo ni ku ligarela vanhu hi ku tirisa fone ya mina.

Xana a tekinolojiya leyi yi nzi vunisa kuyini?A xo sangula, yi nzi vuna ku nghena ka saite jw.org ni ku wona Murinzeli ka BIBLIOTEKA YA SITE. A zitiro lezi zo saseka zi nzi vuna nguvu! Siku ni siku nzi mbheta xikhati xo tala na nzi gonza ni ku hlota mabhuku ma seketelweko lomu ka Biblia kasi nzi simama ku gonza hi Nungungulu ni matshamela yakwe yo saseka. Ni ka xihi xikhati nzi tshukako nzizwa xiwunza kutani ku khunguvanyeka, nzi nghena ka saite leyi yi pepisako moya wa mina.

A komputadori wa mina wu tlhela wu nzi vumelela ku ingisela ni ku patseka mitlhanganweni ya bandla. Nza wula xo kari loku zi laveka, nzi maha mikhongelo, nzi veka tikanelo, hambu ku gonza a Murinzeli loku nzi hlawulilwe ku gonza. Hambu lezi nzi kalako nzi ngayi mitlhanganweni hi xiviri, nzi tizwa na nzi lumba bandla legi nzi nga ka gona.

A kuva ni telefone ni komputadori zonawu zi nzi vuna ku xumayela hi kuhiseka. Lisine lezaku a nzi nge fambi hi muti ni muti a ku fana ni lezi a Timboni to tala ta Jehova ti mahako. Kanilezi lezo a zi nzi nyimisi. Hi ku tirisa a zitiro lezi nza zi kota ku bhulela vanwani a kukholwa ka mina. Hi lisine nzi zi ranza nguvu ku xumayela hi telefone, laha ka kuza a madota ya laha bandleni ma nzi kombela kuva muwoneleli wa matsima ya kuxumayela hi titelefone. A matsima lawo ma va vuna nguvu a vamakabye va laha bandleni lava va kalako va nga zi koti ku suka laha kaya.

Kanilezi, a wutomi ga mina a gi mbheleli ka tekinolojiya. Siku ni siku kuta vanghana va mina vo ranzeka va ta nzi vuxela. Vata ni maxaka ni vanghana vabye va tsakelako a Biblia. Ka zikhati zo tala va nzi kombela ku nzi bhula navo. Ka zikhati zinwani, a mingango ya maKristu ya nzi vuxela yi tlhela yi nzi ramba ku patseka ka wukhozeli ga yona ga ngango. Nzi tsaka nguvu a xikhati lexi a zivanana zi tshamako laha tlhelweni ga mubhedi wa mina zi nzi byela lezi zi va mahako va ranza Jehova.

Zi nzi tsakisa nguvu a ku amukela vapfhumba. A kwarutu ya mina yi tolovela ku tshama ni vanhu vo tala — vanghana va le kule ni va laha kusuhani va telako ku ta nzi vuxela. Kota lezi u nga zi alakanyelako, a kukhatalelwa loko ka liranzo ku va hlamalisa nguvu a vahlayisi va laha nzi tshamako kona. Siku ni siku nzi bonga Jehova hi ku nzi vumelela kuva xiro xa ngango wa hombe wa vamakabye.

NZI SIMAMA KULWA!

Xontlhe xikhati loku a munhu a nzi wutisa ku wo yini ku vuka, hi magezu matsongwani nzi mu byela lezi: “Hi mina loyi, nza ha simama kulwa!” Hi lisine, nza zi tiva lezaku a hi mina nzoce nzi nga kulweni loku. Na ku nga khataliseki a ziyimo za hina kutani zikarato, a maKristu wontlhe molwa — “a kulwa ko saseka ka kukholwa.” (1 Timote 6:12) Xini xi nzi vunako ku simama kulwa ka malembe wontlhe lawa? Siku ni siku nzi khongela ka Jehova nzi mu bonga hi ku nzi maha nzi tiva lexi nzi hanyelako xona. Niku nzi ti karatela ku tshama na nzi khomekile hi laha zi kotekako ha kona ntirweni wa Nungungulu, na nzi veka kupima ka mina ka zilo za ha tako.

Nzi tolovela ku alakanyela a misava yiswa ni lezi zi to nanzihisa zona a ku tsutsuma ni ku tlulatlula. Ka zikhati zo kari, nzata nzi hlakanisa munghana wa mina wo ranzeka, José María — a xanisekako hi mababyi ya milenge — xungetano hi ku hi maha mapalisana ya ku tsutsuma. Nzi mu wutisa lezi: “Himani a to siya munghana? I hlamula aku: “A ku siya munghana a hi mhaka. Lexi xi nga mhaka kuva seyo, Paradiseni, kasi kuva kona ka mapalisana lawo.”

A zi nzi oloveli ku hanya ka xiyimo lexi xo binza. Nza zi tiva lezaku nzi mahile zilo za wupumbu wusweni ga mina, niku zi nzi vangele tiphanja ta hombe. Hambulezo, a nzo ku mu bonga Jehova hi lezi a nga kala ku nzi tsika. I nzi nyikile zotala — ngango wa hombe wa moya, ku tsakela ku hanya, litsako la ku vuna vanwani, ni kurinzela ko tsakisa ka ha tako. Loku ku wo laveka lezaku nzi songa a kutizwa ka mina hi magezu ma tsongwani, nzi wa ta wula lezaku hakunene Jehova i nzi nyika zo hunza lezi zi nzi faneleko.